Б.ДОЛЖИНЖАВ
Шинэ хичээлийн жил эхэлсэнтэй холбогдуулан дэлхийн улс орнууд хичээлийн шинэ жилийн нээлтээ хэзээ хийдэг болон сургалтын хөтөлбөрийн онцлогийн талаар тоймлон хүргэж байна. Тухайн улсын онцлогоос хамааран зарим орон өвөл, зарим нь хавар, зарим нь манай улстай адил есдүгээр сарын 1-нд хичээлийн шинэ жилийг угтдаг.
ОРОС ЕСДҮГЭЭР САРЫН 1-НИЙГ “МЭДЛЭГИЙН ӨДӨР” ХЭМЭЭН НЭРЛЭДЭГ
ОХУ-ын тухайд манай улстай ижил бүх сургуулийн хичээлийн жил есдүгээр сарын 1-нд эхэлдэг. Тус улс энэ өдрийг “День Знаний” буюу “Мэдлэгийн өдөр” хэмээн нэрлэдэг байна. Учир нь зуны амралт дуусч сурч, боловсрол эзэмших цаг эхэллээ хэмээн бэлгэдэн ийн нэрлэдэг аж. Хичээл өглөө 08:30 цагаас 15:00 цаг хүртэл үргэлжилнэ. Дүрэмт хувцас өмсөхийг шаардахгүй. Нэг ангид 16 хүүхэд суралцдаг. Ерөнхийдөө аравдугаар анги бол бүрэн дунд боловсролын сүүлийн жил нь байдаг. сурагчид арваннэг, арванхоёрдугаар ангидаа их сургуульд элсэх шалтгалтандаа бэлдэх болон бусад шаардлагатай ур чадварыг эзэмшдэг. Их Британи улсын сурагчид ч мөн өчигдөр буюу есдүгээр сарын 1-нд хичээлдээ явж эхэллээ.
ХЯТАДАД ДОЛДУГААР САРД СУРГАЛТ НЬ ЭХЭЛДЭГ
Хятад улсад хичээлийн шинэ жил нь долдугаар сарын дунд үеэс есдүгээр сарын эхэн үеийн хооронд эхэлдэг байна. Амралтаараа сурагчид нь зуны хичээлүүдэд сууж, эсвэл элсэн орох шалгалтандаа бэлддэг аж. Ихэнх сургуулийн хичээл 07:30 цагт эхэлж, орой 17:00 цагт тардаг. Энэ хооронд хоёр цаг нь өдрийн хоолны завсарлагаа байдаг юм байна. Сурагчид есөн жил хичээллэх агаад нэг ангид 30 сурагч суралцана. Жил бүрийн төгсгөлд математик болон Хятад хэлний шалгалт өгдөг.
АМЕРИКТ СУРГУУЛИЙН ХИЧЭЭЛ МУЖ БҮРТ ӨӨР ХУГАЦААНД ЭХЭЛНЭ
АНУ-ын тухайд хичээлийн шинэ жил нь мужаасаа хамааран өөр өөр хугацаанд эхэлдэг. Муж дотроо дүүргээсээ хамааран хичээл эхлэх өдөр нь өөр байдаг аж. Тухайлбал, Нью Йорк мужийн “Addison Central”-ын хичээл энэ сарын 6-нд эхэлнэ. Харин Алабама мужийн “Alabaster” хотын сургуулийн хичээл наймдугаар сарын 17-нд эхэлсэн бол “Madison” хотын сургууль наймдугаар сарын 3-нд хичээлийн шинэ жилийн нээлтээ хийсэн байна. Мөн Флорида мужийн зарим хотын сургууль наймдугаар сарын 3-наас, зарим нь наймдугаар сарын 10-наас хичээлээ орж эхэлжээ. Америкийн сургуулийн хичээл 07:30 цагт эхэлж, өдөр 14:30 цагт тарах нийтлэг хуваарьтай. Нэг ангид 23 хүүхэд суралцах агаад 11 жилийн сургалттай.
АВСТРАЛИД 11 ЭСВЭЛ 12 ЖИЛ ХИЧЭЭЛЛЭХ НЬ СУРАГЧИЙН СОНГОЛТ
Австралийн сургуулиуд жилд 200 өдөр хичээллэдэг. Хичээл 09:00 цагт эхэлж, 15:30 цагт тарна. Зургаан настайдаа сургуульд элсэж 11-12 жил хичээллэнэ. Тухайн сурагч 11 эсвэл 12 жил хичээллэхээ өөрөө шийдвэрлэдэг аж. Нэгээс зургадугаа анги хүртлээ сурагчид долоо хоногт 12 цагийг математик болон Англи хэлний хичээлд зарцуулна.
БРАЗИЛИЙН СУРАГЧИД ӨДРИЙН ХООЛОО ГЭРТЭЭ ИДДЭГ
Бразилийн сургуулиуд өглөөний 07:00 цагт хичээлээ эхэлж, 12:00 цагт тардаг. Тиймээс сурагчид өдрийн хоолоо гэр бүлийнхэнтэйгээ гэртээ идэх нь тус улсын нэгэн чухал уламжлал болжээ. Ихэнх сургуулийн сурагчид дүрэмт хувцас өмсдөг юм байна. Түүх, газарзүй, шинжлэх ухааны хичээлүүдийг их үздэг ч урлаг, дуу хөгжмийн хичээл үзэх санхүүжилтээр Бразилийн захын бүс нутгийн сургуулиуд дутмаг байдаг аж. Нэг ангид 23 ба түүнээс олон сурагч суралцдаг.
ФРАНЦЫН СУРГУУЛЬ ЛХАГВА ГАРАГТ АМАРНА
Францын сургуулиуд өглөөний 08:00 цагаас оройн 16:00 цаг хүртэл хичээллэнэ. Бямба гарагт хагас өдөр хичээллэдэг агаад лхагва гараг, ням гарагт хичээллэдэггүй аж. Дүрэмт хувцас өмсөх шаардлагагүй.
ЯПОНД ДӨРӨВДҮГЭЭР САРААС ХИЧЭЭЛЛЭЖ ЭХЭЛДЭГ
Японы сургуулийн хичээл дөрөвдүгээр сард эхэлдэг. Зун, өвөл, хавартаа гурван удаа амардаг. Сурагчид дүрэмт хувцас өмсөхийн сацуу үс засалт, гутал, оймс, юбканы урт, нүүр будалт, гоёл чимэглэлээс эхлээд нарийн дүрэмтэй. Нэг ангид 29 сурагч байх агаад 5-6 компьютерийг дундаа ашигладаг.
СОЛОНГОСЫН АНГИ БҮР 10 КОМПЬЮТЕРТЭЙ
-БНСУ-д хоёроос гуравдугаар сард шинэ хичээлийн жил нь эхэлдэг. Ингэхдээ есөөс хоёрдугаар сар хүртэл, гурваас долдугаар сар хүртэл гэсэн хоёр семесртэй. Хичээл өглөөний 08:00 цагаас 16:00 цаг хүртэл үргэлжилнэ. Гуравдугаар ангиасаа эхлэн долоо хоногт хоёр цаг Англи хэл үздэг. Нэг ангид 30 хүүхэд хичээллэх бөгөөд анги бүрт 10 компьютер байдаг аж. Харин Хойд Солонгост таван настайдаа сургуульд элсэж 11 жил хичээллэнэ. Засгийн газраас олгосон дүрэмт хувцасыг хүүхэд бүр өмсдөг юм байна.
Эх сурвалж: “Зууны мэдээ” сонин
2022 ОНЫ ЕСДҮГЭЭР САРЫН 2. БААСАН ГАРАГ. № 169 (6901)
