З.Батцэцэг

Канадын хоккейд секс дуулиан дэгдэв. Сүүлийн хэдэн сарын хугацаанд 2003, 2018 онд болсон залуучуудын дэлхийн аварга шалгаруулах тэмцээнтэй холбоотой хоёр гутамшигтай түүх ил боллоо. Цагдаа нарын мэдээлснээр Канадын шигшээ багийн хоккейчид бүлэглэн хүчингийн хэрэг үйлдсэн бөгөөд хохирогч нь залуу эмэгтэйчүүд байжээ. Эдгээр баримтыг үндэсний холбооны удирдлага удаан хугацаанд нууж байсан тул  цагдаагийн томоохон шалгалтыг явуулж байгаа бөгөөд энэ үеэр бүх буруутай этгээдийг илрүүлэх ёстой юм. Мөрдөн байцаалтын явцад холбоонд хориг арга хэмжээ авсан, төрийн санхүүжилт зогссон, ивээн тэтгэх гэрээг түдгэлзүүлсэн байгаа. Эдгээр хэргийн мөрдөн байцаалтын явц хэрхэн өрнөж байгаа, ямар нарийн ширийн зүйл ил болж байгаа, хэрэг явдлыг нууцлах нь хэнд ашигтай вэ гэдгийг Lenta.ru тодруулсан байна.

Канадын эмэгтэйчүүдийн хоккейн лигийн тэргүүн асан Бренда Андрессийн хэлснээр Канадын хоккейн гол асуудал бол "чимээгүй байх соёл" юм. “Бидний ихэнх нь илчлэгдэх үнэнийг даван туулж чадахгүй байх гэж би бодож байна. Спортын ертөнцөд юу болж байгааг хүлээн зөвшөөрөх боломжгүй" гэж тэр хэлэв.

2003 оны үйл явдлыг TSN портал 2022 оны зургадугаар сард мэдээлсэн. Сэтгүүлчид нэрээ нууцалсан гурван эх сурвалжаас иш татан, ДАШТ-ий үеэр Канадын багийн зургаан тоглогч залуу эмэгтэйг хүчиндсэн гэж мэдээлсэн бөгөөд түүний хэн болох нь тодорхойгүй байна. Цагдаа нар мөрдөн байцаалтын ажиллагаа эхлүүлсэн гэдгээ хэвлэлд нотолсон байна.

Залуучуудын дэлхийн аварга-2003 тэмцээнд канадчууд шигшээд Оросын багт 2:3-аар хожигдсон. Финландчууд хүрэл медаль хүртсэн. Тэмцээн Канадын Сидней, Халифакс хотуудад болсон юм.

Нотлох баримт болгон TSN-ийн эх сурвалжууд хүчирхийллийг харуулсан видеог үзүүлжээ. Хэвлэл мэдээлэл, цагдаа нараас гадна Консерватив парламентын гишүүн Жон Натерт энэ бичлэгийн талаар мэдээлэл өгсөн байна. “Надад өгсөн мэдээллийг би Халифаксын цагдаад өгсөн. Мөн би мэдээлэгчдийг цагдаад шууд хандахыг уриалсан. Бичлэгийн эзэн гэж өөрийгөө нэрлэсэн эх сурвалжийн мэдээлснээр тус багийн нэг тоглогч ДАШТ-д зориулж видео камерыг түүнээс зээлж авсан бөгөөд бичлэгээ устгахаа мартсан байна. Дараа нь хоккейчид бичлэгийг устгаж, цагдаад мэдэгдэхгүй байхыг шаардсан” гэжээ.

Канадын баг ЗДА-2003 он

Тус багийн 21 тоглогчоос хамгаалагч Карло Колаяково, довтлогч Пьер-Александре Паренто нар болсон явдлын талаар хамгийн түрүүнд мэдэгдэл хийсэн. “Би үүнд оролцоогүй, юу болсныг мэдээгүй гэдгийг хүн бүр мэдэх нь чухал. Би мөрдөн байцаалтад бүрэн хамтран ажиллах болно ”гэж Колаяково бичжээ. Паренто өөрийгөө энэ асуудалд "Ямар ч хамаагүй" гэж онцолсон бөгөөд энэ нь түүнийг цочирдуулсан гэв. Дараа нь довтлогч Скотти Апшелл, Жордин Туту, мөн хамгаалагч Натан Петч нар үүнтэй төстэй мэдэгдэл хийсэн.

Канадын Үндэсний хоккейн холбоо албан ёсны төлөөлөгчдийнхөө хэлснээр 2003 оны талаарх зарим нэг "Сэтгэл түгшээсэн нарийн ширийн зүйлийг" өмнө мэддэг байсан гэсэн ба сэтгүүлчдэд тайлбар өгөх хүсэлт гаргахад нарийн ширийн зүйлийг мэддэггүй гэв. Одоо тус байгууллага мөрдөн шалгахаа амласан. Удирдлага нь энэ талаар мэдээлсэн мэдээлэгчид болон Халифаксын цагдаа нартай аль хэдийн холбогджээ. Тэд хэргийн талаар мэдээлэлтэй хүн бүр хууль хяналтын байгууллагад яаралтай хандахыг хүссэн байна.

“Бид хоккейн "чимээгүй байдлын соёл"-ыг зогсоохыг зорьж байна. Бид хэргийг шалгах ёстой гэж үзэж байгаа. Эрх баригчидтай хамтран ажиллаж, бүх талаар дэмжинэ” гэж Канадын Спортын сайд Паскаль Сен-Онге хэлэхдээ, энэ нь тус улсын хоккейн нэр хүндэд ноцтой цохилт болсон. “Бид 2003 онд болсон нэгэн аймшигт түүхийг олж мэдсэн. Бүх канадуудын нэгэн адил би цочирдож, бухимдаж байна” гэж хэлэв.

Маш төстэй боловч сүүлийн үеийн нэгэн хэрэг багагүй дуулиан дэгдээгээд байна. 2022 оны дөрөвдүгээр сард нэрээ нууцлахыг хүссэн нэгэн бүсгүй 2018 оны залуучуудын дэлхийн аварга шалгаруулах тэмцээнд түрүүлсэн Канадын найман хоккейчин өөрт нь бэлгийн хүчирхийлэл үйлдсэн гэж мэдэгджээ.

2018 онд канадууд түүхэндээ 17 дахь удаагаа хоккейн Залуучуудын дэлхийн аваргад түрүүлсэн. Мөнгийг Швед, хүрэл медалийг Америк хүртсэн. Тэмцээн Буффало (АНУ) хотод болсон юм.

Хэрэг гарах үед 20 настай байсан бүсгүйн хэлснээр 2018 оны зургадугаар сард тэрбээр тэмцээнээс буцаж ирсэн хоккейчидтэй Онтариогийн баарнуудын нэгэнд очиж, архи ууж, дараа нь тэд түүнийг зочид буудлын өрөөнд аваачсан. Тэр өөрөө согтуу байсан тул бэлгийн харьцаанд орохыг зөвшөөрөх эсвэл татгалзах боломжгүй байсан гэжээ. Хоккейн тоглогчид түүнийг хэдэн цагийн турш хүчирхийлжээ. Үүний дараа түүнийг цагдаад мэдэгдэж болохгүй, энэ тохиолдолд мөрдөн байцаалтад хамтран ажиллахгүй байхыг шаардаж, заналхийлсэн байна. Хохирогч Канадын хоккейчдын эсрэг 3.55 сая долларын нэхэмжлэл гаргаж, тус байгууллагыг системийн хүчирхийлэлтэй тэмцээгүй гэж буруутгаж байна. Шүүгдэгчдийн тоонд Канадын хоккейн лиг болон нэр нь тодорхойгүй найман тоглогч багтсан байна. 2019 онд цагдаагийнхны оролцоотойгоор мөрдөн байцаалтын ажиллагаа явуулсан ч, дараа нь хэргийг хаасан нь анхаарал татаж байгаа юм. Нэмж дурдахад, үндэсний спортын газарт энэ хэргийн талаар мэдэгдсэн ч тухайн үеийн спортын сайд Кирсти Дунканд мэдээлэл хүрээгүй байна.

Канадын баг Залуучуудын дэлхийн аварга-2018

2022 оны тавдугаар сард Канад хоккей энэ асуудлыг чимээгүйхэн шийдэхийг хүсч, нэхэмжлэлийг хэрэгсэхгүй болгосны хариуд бүсгүйд бүх мөнгийг нь төлөхийг зөвшөөрөв. Тус байгууллага бүртгэлийн хураамжаас авсан мөнгөө ашигласан (Канадчууд хүүхдүүдээ хоккейн тэмцээнд оролцуулсны төлбөр төлдөг) байна. Мөн энэ нь анх удаа тохиолдсон зүйл биш юм. Энэ нь тус улсын спортын дээд албан тушаалтнуудын сонирхлыг татсан бөгөөд тэд үйл явдлын бүх нарийн ширийнийг тодруулж, хүчирхийлэл үйлдэж, баримтыг нуун дарагдуулсан гэмт этгээдүүдийг илрүүлэх ёстой өргөн цар хүрээтэй мөрдөн байцаалтыг эхлүүлсэн.

Мөрдлөг үргэлжилж байгаа үед Канадын Засгийн газар Канад хоккейг санхүүжүүлэхгүй. Тухайн тус улсын Спортын сайд Сен-Онж дуулиан түүнийг "шоконд оруулсан" гэдгээ хүлээн зөвшөөрсөн. Асуудлыг шүүхээс гадуур шийдвэрлэх, хэргийг цаашид таслан зогсооход зориулж байгууллага нь төсвийн хөрөнгийг ашиглахгүй байгаа эсэхийг хянахыг тэрээр тушаажээ.

1989 оноос хойш Канад хоккейн дарамт шахалт, "бусад хүчирхийлэл"-тэй холбоотой зөрчилдөөнийг шийдвэрлэхэд 7.6 сая доллар зарцуулсан гэж CBC мэдээлэв. Энэ дүнд 2018 оны  төлөх төлбөрийг оруулаагүй болно.

Энэ бүтэц нь мөн гол ивээн тэтгэгчээ алджээ. Scotiabank, харилцаа холбооны Telus компани, Canadian Tire томоохон жижиглэн худалдааны сүлжээ нь холбоотой байгуулсан гэрээгээ цуцлах эсвэл түдгэлзүүлэхээ мэдэгдэв. Газрын тосны компани Imperial Oil болон хоккейн тоног төхөөрөмж үйлдвэрлэгч Bauer Hockey асуудлыг ажиглаж байна.

Канадын хоккейн баг эх орон нэгтнүүддээ хандан "Та нар бидэнд уурлаж, бидний зан авирд сэтгэл дундуур байгааг бид мэднэ, тэр нь ч зөв. Өсвөрийн багийн зарим тоглогчид арга хэмжээ авахаас урьдчилан сэргийлэх талаар бид хангалттай зүйл хийгээгүй. Болсон явдлыг хүлээн зөвшөөрөх боломжгүй бөгөөд хохирсон бүх хүмүүсээс дахин уучлалт гуйж байна. Мөрдөн байцаалтын ажиллагааг сэргээж байгаа нь шүүх хурлын үр дүнгийн талаар олон хүний ​​бухимдлыг арилгах алхам юм” гэжээ.

Одоо Канад хоккей аль хэдийн мэдэгдэж байсан тохиолдлуудыг судалж, баримтыг нуун дарагдуулсан бүх хүмүүсийг огцруулахаас гадна гомдол гаргах тусгай механизмыг бий болгоно гэж амлаж байна.

“Бид хохирогчдыг бүх хэрэгслээр хангах, дэмжлэг үзүүлэх хэрэгтэй. Манай спорт дахь хорт зуршил нь системчилсэн асуудал бөгөөд үүнийг арилгах шаардлагатай гэдгийг бид хүлээн зөвшөөрдөг. Өөрчлөлтүүд нэг л өдөр гарахгүй гэдгийг бид мэдэж байгаа ч нөхцөл байдлыг сайжруулахын тулд бид маш их зүйлийг хийж байна" гэж холбооноос мэдэгдсэн байна.

Эх сурвалж: www.polit.mn