З.БАТЦЭЦЭГ
Оросыг хэсэгчлэн эсвэл бүрмөсөн орхисон олон улсын компаниуд тус улсын 200 мянга гаруй хүнийг ажлын байраар хангадаг байжээ. Энэ тухай Forbes сэтгүүл лхагва гарагт мэдээлэв.
Тус хэвлэлд бичсэнээр McDonald's компани хамгийн том ажил олгогч юм. Орос улсад түргэн хоолны сүлжээ ресторанд 62 мянган хүн ажилладаг байжээ. Pepsico бол ажилчдынхаа тоогоор хоёрдугаарт ордог. Forbes сэтгүүлийн мэдээлснээр Солнечногорск дахь ундааны үйлдвэрт 8000 гаруй хүн ажилладаг. Кашира дахь чипс үйлдвэрлэдэг Frito Lay Manufacturing компанид 1.5 мянга гаруй хүн ажилладаг. Сүүн бүтээгдэхүүн, хүүхдийн хоол үйлдвэрлэдэг Wimm-Bill-Dann-д 8.6 мянган хүн, Лебедянскийн шүүсний үйлдвэрт 462 хүн ажилладаг байна. Орос улсад нийтдээ 19 мянга орчим хүн Pepsico компанид ажилладаг гэж тэмдэглэжээ.
IKEA Мегад байрлах 14 худалдааны төвийг эс тооцвол Оросд байгаа үлдсэн бүх дэлгүүрийг гурван сарын турш хааж, дотоодын үйлдвэрлэл, дотоодын гэрээт компаниудаас худалдан авалт хийхийг зогсоосон. Тус компанид 15 мянган ажилтан ажилладаг бөгөөд IKEA тэднийг одоогоор ажлаас нь халаагүй байна. Гурван сар тэд цалинтай ажиллана. IKEA-ийн ОХУ дахь төлөөлөгч Константин Тютрин сэтгүүлд хэлэхдээ, энэ бол ажлаас халагдсаны тэтгэмж биш бөгөөд ажилчид ердийнхөөрөө ажиллаж, цалингаа авч байгаа гэв.
Бусад компани
KFC болон Pizza Hut брэндүүдийг эзэмшдэг Yum!Brands нь үйл ажиллагаагаа түр зогсоосон, ажилчдынхаа тоогоор гуравт ордог том компани юм. Тус компаний 14.5 мянга гаруй ажилтантай. Тус компанийн шууд хяналтанд байдаг 70 KFC рестораны ажлыг зогсоосон бол бүхэл бүтэн сүлжээ нь 1000 орчим цэгтэй байсны ихэнх нь франчайзинг эрхэлдэг гэдгийг тодотгосон.
Zara, Pull & Bear, Massimo Dutti, Bershka, Stradivarius, Oysho болон бусад брэндийг эзэмшдэг Испанийн Inditex компанийн шийдвэрээр Орост 502 дэлгүүр ажлаа түр зогсоолоо. Дэлгүүрүүдээ түр хаасны дараа Inditex 9000 орчим ажилчдад санхүүгийн дэмжлэг үзүүлсээр байна.
Үйл ажиллагаагаа зогсоосон автомашин үйлдвэрлэгчдийн дунд хамгийн том ажил олгогч нь бараг 5.8 мянган хүн ажилладаг Volkswagen концерн юм. Тус компанийн мэдээлснээр Орос дахь ажилчид богино хугацааны ажлын тэтгэмж авах болно гэж тодотгосон байна. Нижний Новгород дахь Газ группын автомашины үйлдвэрийн талбайд VW болон Skoda-ийн гэрээний угсралт хийгддэг аж. Одоо ажилчдын цалин, нийгмийн баталгааны 2/3-ыг хадгалан, үйлдвэрийг түр зогсолтын горимд орууллаад байна.
Мөн ОХУ-д харилцагчийн үйлчилгээгээ зогсоож байгаагаа 6 мянга гаруй хүн ажилладаг EPAM Systems мэдэгдсэн байна.
Эх сурвалж: www.tass.ru
