Б.ДОЛЖИНЖАВ
Засгийн эрхийг цэргийнхэн хүчээр авсныг эсэргүүцсэн жагсаал дан ганц Мьянмарын бус дэлхий нийтийн асуудал болоод байна. Учир нь олон нийтийн сүлжээнд байршуулсан зураг, бичлэгийн тусламжтайгаар олон улсын иргэд тус улсад болж буй зэвсэгт мөргөлдөөний талаарх нөхцөл байдлын мэдээллийг цаг алдалгүй авч байна. Тиймээс мэдээлэл олон нийтэд хүрэхээс сэргийлэн цэргийнхэн интернетийн сүлжээг хаахаар төлөвлөжээ. Гэсэн ч жагсагчид радио эсвэл гар утасны дуудлага ашиглан бие биедээ мэдээллээ дамжуулан, ардчиллын төлөө үргэлжлүүлэн тэмцэнэ гэдгээ мэдэгдэв.
Жагсаал эхэлсэн хоёрдугаар сарын нэгнээс хойш цэргийнхний гарт 540 гаруй иргэн амиа алдаад байна. Эдгээр иргэдийг цэргийнхэн сүүлчийн замд нь үдэх үеэр жагсагчид автобусны буудал дээр цэцэг үлдээхийг уриаллаа. Энэ тухай жагсаалыг удирдагч Хин Садар “Интернетийн сүлжээг унтраахаас өмнө бид та бүхэндээ хэлэх зүйл байна. Амиа алдагсдыг маргааш оршуулах үеэр автобусны буудлууд дээр хүндэтгэлд нь зориулж цэцэг үлдээцгээе. Цаашид ч бид гудамжны жагсаалаа үргэлжлүүлнэ. Бидэнтэй нэгдээрэй. Радиогоо сайн сонсоорой. Мөн утсаар ярьж хоорондоо холбогдоно шүү” хэмээн фэйсбүүктээ бичжээ.
Тус улсад пүрэв гаригт жагсаалын үеэр цагдаа гал нээсний улмаас хоёр хүн амиа алдсаны нэг нь 18 настай хүүхэд байсан аж. Жагсагчид өчигдөр 2008 онд цэргийнхний боловсруулсан үндсэн хуулийн хуулбарыг гудамжинд шатаажээ.
Хоригдож байгаа Мьянмарын удирдагч Аун Сан Сү Чи-гийн биеийн байдал сайн байгааг өчигдөр бичлэгээс харсан гэж хуульч нь ярьсан байна. Гэхдээ өөрийнх нь улсад өрнөж байгаа аймшигт хүчирхийллийн талаар мэдэж байгаа эсэх талаар юу ч хэлсэнгүй.
Эх сурвалж:Reuters
