П.АМГАЛАНБАЯР
Театр бол уран бүтээлч, үзэгчдийг нэгэн орон зайд уулзуулдаг амьд харилцааны урлаг. Тэр цаг хугацаанд яг л тухайн уран бүтээлийн оршихуйд амьдарч мэдрэмж, догдлолыг аваад танхимаас гарна гэдэг театрын бүтээлийн дахин давтагдашгүй мөн чанар гэлтэй. Тэгвэл Монголын театрын урлагт цоо шинэ өнгө төрхийг бүтээж, төрөл бүрийн жанраар уран бүтээлээ туурвидаг хамт олон бол “Pro” театрынхан. “Инээмтгий хүн”, “Шадар гурван цэрэг” зэрэг жүжиглэлт, тайзны засалт, найруулгаараа ялгарч чаддаг тэдний нэрийн хуудас болсон жүжгүүд бий. Тэгвэл “Pro” театрынхан энэ удаа Монголд өмнө тавигдаж байгаагүй мета драмын хэлбэрээр Александр Вампиловын алдарт “Нугасны ан” жүжгийг “Сүүлчийн бороо” нэртэйгээр үзэгчдэд хүргэхээр болсон байна.
Тиймээс “Зууны мэдээ” сонин тус театрын найруулагч, зураач, жүжигчин Б.Анхбаатарыг онцоллоо. Тэрээр “Инээмтгий хүн” жүжгийн зураачаар ажиллаж, 2024 оны “Мөнгөн мод” наадмын “Шилдэг зураач”-ийн шагналыг хүртсэн юм. Түүнтэй ярилцсанаа хүргэе.
-Александр Вампиловын олон алдартай зохиолын нэг бол яах аргагүй “Нугасны ан”. Уг жүжгийг мета драмын хэлбэрээр “Сүүлчийн бороо” нэртэйгээр үзэгчдэд хүргэж байгаа нь их сонирхолтой санагдаж байна?
-Зөвлөлтийн үеийн гол зохиолчдын нэг бол яах аргагүй Александр Вампилов. Монголчууд маань уг алдарт зохиолчийн “Ууган хүү”, “Нугасны ан” жүжгийн зохиолыг илүү мэдэх болов уу.
Энэ удаад бид алдарт “Нугасны ан” жүжгийг “Сүүлчийн бороо” нэртэйгээр үзэгчиддээ хүргэх гэж байна. Уг зохиолд зөвлөлтийн үеийн уналт хэсгийг харуулдаг. Хүмүүс амьдралын утга учрыг хайх гэхээсээ илүү хүсэл тэмүүлэлгүй болсон дүр төрх гарна. Мөн жүжгийн гол илэрхийлэх санаа бол итгэл найдварын талаар өгүүлнэ. Хүн ямар ч байдалд хүрсэн, хамгийн дотны хүмүүс, найз нөхөд, бүх зүйл нь орхисон ч хэзээ ч орхиж явахгүй зүйл бол итгэл найдвар. Харин итгэл найдварыг хүн өөрөө л эрж хайж олох хэрэгтэй гэдгийг харуулахыг зорьсон.
Үргэлжлэлийг zuuniimedee.mn сайтаас цахим сонин захиалан уншаарай.
Эх сурвалж: “Зууны мэдээ” сонин
2025 ОНЫ ДӨРӨВДҮГЭЭР САРЫН 3. ПҮРЭВ ГАРАГ. № 61 (7558)
