П.АМГАЛАНБАЯР
Хорвоо дээр орших долоон тэрбум гаруй хүн арьс өнгө, үзэл бодол, хүсэл сонирхол, соёл уламжлалаас эхлээд сонсдог хөгжим, уншдаг ном, үздэг киногоороо харилцан адилгүй. Тэр дундаа нас чацуу хүмүүс ч өссөн орчин, хувь хүний хандлага, төрсөн улсаасаа шалтгаалан тэс өөр байх нь бий. Тиймээс бид Монголын болон дэлхийн нас чацуу алдартнуудын амьдралын хэв маяг, эерэг дадал, биеэ авч явах соёлоос хуваалцах “Чацуутнууд” буланг хүргэж байна. Энэ удаа барууны кантри дуучин О.Энх-Эрдэнэ, болон алдарт “BTS” хамтлагийн гишүүн Jungkook нарыг онцоллоо.
Азийн шилдэг каунтри дуучин О.Энх-Эрдэнэ
Отгонбатын Энх-Эрдэнэ нь 1997 оны дөрөвдүгээр сарын 10-нд төрсөн. Хүүхэд наснаасаа урлагт сонирхолтой болж, түүнийгээ хөгжүүлэн ирээдүйн мэргэжлээ болгож яваа өнөө цагийн авьяаслаг залуусын нэг. Тэрээр багаасаа хөл бөмбөг, уран зохиолын хичээлдээ сонирхолтой байсан тул гар бичмэл бичих дуртай болжээ. О.Энх-Эрдэнэ нэг эгчтэй, айлын бага хүү.
Ийнхүү багаасаа гитар, морин хуур тоглож, дуулж эхэлсэн тэрээр 2016 онд 19 настайдаа “Авьяаслаг монголчууд” шоунд оролцсон түүний амжилтын эхлэлийг тавьсан цаг хугацаа байв. “Авьяаслаг монголчууд” шоуны эхний шатанд “Amarillo by Morning” дууг дуулахад түүний өвөрмөц содон хоолой шүүгчид хийгээд олны анхаарлыг татсан юм. Классик каунтри буюу барууны каунтри жанраар дуулдаг түүний өвөрмөц өнгө төрх нь ийнхүү урлагийн ертөнцөд нэгэн том орон зайг бүтээсэн гэж хэлж болно.
Түүний дараагийн аялал, өөрийгөө сорьсон томоохон тайз нь Америкийн “The World’s Best” шоу байв. Тэрбээр 2018 онд дэлхийн олон авьяастнууд оролцсон тус шоунд оролцож, өөрийгөө нэгэн шинэ өнгөөр дэлхийн тайзнаа харуулж, элэг нэгт монголчууд ч огшоож чадсан. Үүний дараа Андрив Лэйн студитэй хамтран ажиллаж шинэхэн хоёр уран бүтээлээрээ үзэгчиддээ бэлэг барьсан юм.
Мөн тэрээр “America’s Got Talent: Fantasy League” шоуны “хамгийн хатуу шүүгч” гэдгээрээ үзэгчдийн дунд алдаршсан Саймон Коуэллийг гайхшруулж чадсан. Тэрээр тус шоуны эхний шатанд “Friends in Low Places” дууг дуулахад шүүгч Саймон Коуэлл хамгийн эхэнд босож, “Чи сая ам барьсан уу. Үнэхээр гайхалтай, гайхалтай сайхан хоолой байна. Надад үнэхээр таалагдлаа. Би чамайг багтаа авахыг хүсэж байна” хэмээн сэтгэгдлээ хуваалцаж байсан удаатай. Ийнхүү тэрээр 2023 онд анхны уран бүтээлийн цомгоо “Амьдрал баян” нэртэйгээр гаргасан байдаг. Уг цомог нь “Арван тавны сар”, “Epilogy”, “Зүрхний хайр” зэрэг есөн дуу багтсан.
Түүний томоохон амжилтын нэг нь “The Outstanding Country of the Year” номинацид нэр дэвшиж, Азийн шилдэг каунтри дуучнаар шалгарсан явдал байв. Мөн тэрээр “Тал нутгийн зомби” кинонд мөн ажилласан.
Ийнхүү монголын хийгээд дэлхийн урлагийн салбарт өөрийн гэсэн өвөрмөц өнгө төрхийг бүтээж яваа түүнийг урлагийн хойрхотнууд, үнэнч сонсогчид нь “Монгол ковбой” хэмээн нэрийдэх нь ч бий.
“Spotify”-ийг амжилтаараа тэргүүлсэн Jungkook
Дэлхийн дээр орших долоон тэрбум хүн олон зүйлээр ондоошдог ч бидний сонсох мэдрэмж, хүсэл сонирхол нэгэн сэжмээр холбогдож байдаг. Энэ бол урлаг. Тиймээс дэлхийн олон залуусын шүтээн болсон алдарт BTS хамтлагийн гишүүн Чон Чон Кукыг (Jungkook) бид удаад онцолсон юм. Тэрбээр мөн л 1997 оны есдүгээр сарын 1-нд төрсөн. Түүний Солонгос нэр нь 전정국.
Бага байхдаа теннисчин болох сонирхолтой байжээ. Гэвч тэрээр интернэтээр G-Dragon -ыг харснаас хойш түүний мөрөөдөл нь өөрчлөгдөж дуучин болохоор шийдсэн байна.
Тэрээр дунд сургуульд байхдаа тэр Өмнөд Солонгосын алдартай нэвтрүүлэг Superstar K3-ын сонгон шалгаруулалтад оролцсон боловч анхан шатнаас хасагдсан. Шалгаруулалтаас гарсны дараа түүнд долоон өөр энтертайнментаас санал ирсэн бөгөөд “Big Hit Entertainment”-г сонгосон байдаг.
Алдарт “BTS” хамтлагийн гишүүн Jungkook 2023 оны долоодугаар сард “Seven” нэртэй ганцаарчилсан уран бүтээлээ гаргаж фенүүддээ гэнэтийн бэлэг барьсан юм. Уг дуу нь гарсан даруйдаа хит болж, дэлхийн чартуудыг тэргүүлж эхэлсэн. “Seven” дуу цацагдсан даруйдаа “Billboard”-ийн чартыг тэргүүлж, Их Британийн чартын гуравдугаар байрыг эзэлсэн билээ.
Мөн түүний уран бүтээл нь “Spotify”-ийн долоо хоногийн шилдэг дууны чартыг зургаан долоо хоногийн турш тэргүүлсэн анхны Ази хүн болсон юм.
Үүний дараа “3D” нэртэй шинэ дуугаа хөгжмийн платформуудад байршуулсан. Энэхүү шинэ дуугаа Жэйк Харлоу нэртэй Америк рэппертэй хамтран бүтээсэн нь сонирхолтой хувилбар байсан гэдгийг түүний фенүүд нь онцолж байв. Дашрамд дурдахад Жэйк Харлоу нь 2021 онд рэппер Lil Nas X-тэй хамтран “Industry Baby” нэртэй дуу гаргаж “Billboard”-ийн топ 100 дууны жагсаалтад бичигдэж байсан алдартай уран бүтээлч юм.
Ийнхүү тэрбээр ганцаарчилсан уран бүтээл гаргасан “BTS”-ийн зургаа дахь гишүүн болсон юм.
Эх сурвалж: “Зууны мэдээ” сонин
2024 ОНЫ АРВАННЭГДҮГЭЭР САРЫН 22. БААСАН ГАРАГ. № 227 (7471)
