Т.САЙХАН
Ерөнхийлөгч Х.Баттулга зарлиг гаргаж, Э.Батбаярыг Шүүхийн ерөнхий зөвлөлийн даргаар томиллоо.
ШЕЗ-ийн даргыг ерөнхий зөвлөлийн гишүүд дотроосоо нэр дэвшүүлэн хуралдаанаараа хэлэлцэж, гишүүдийн олонхын санал авсан хүнийг санал болгосноор Ерөнхийлөгч томилдог бөгөөд Ерөнхийлөгчийн Тамгын газрын дарга З.Энхболд өнөөдөр /11.06/ ШЕЗ-д хүрэлцэн ирж Ерөнхийлөгчийн зарлигийг уншиж сонордуулснаар Э.Батбаяр ажлаа хүлээн авсан байна.
Э.Батбаяр нь
- 1980-1990 онд нийслэлийн 10 жилийн 6 дугаар дунд сургууль,
- 1990-1992-онд ЗХУ-ын Курган хотын Металлургийн сургууль
- 1995-2000 онд МУИС-ийн Хууль зүйн сургуульд эрх зүйн бакалавр, хууль зүйн ухааны магистр,
- 2002-2005-онд ОХУ-ын Краснодар хотын Кубаний Улсын Их сургуульд хууль зүйн ухааны докторын (Ph.D) зэрэг хамгаалсан.
Тэрээр “Түшээ” дээд сургуулийн тэнхимийн эрхлэгч, зөвлөх багш, УИХ-ын гишүүний зөвлөх, Нийслэлийн шийдвэр гүйцэтгэх албаны дарга, Хууль зүйн үндэсний хүрээлэнгийн захирал, өмгөөлөгчөөр ажиллаж байгаад Ерөнхийлөгчийн 2019 оны хоёрдугаар сарын 12-ны өдрийн 22 дугаар зарлигаар Шүүхийн ерөнхий зөвлөлийн гишүүнээр томилогдсон байна.
Эх сурвалж:www.polit.mn
