Х.Мөнхбаатар: Н.Ганбаатарыгаа нэг удаа дэмжчих, ах нь 70 саяыг өгье гэсэн
Р.Нямдорж: Би чамайг шүүхэд өгнө
Д.ЖАВХЛАН
Өчигдөр Монголын үндэсний бөхийн холбооны тэргүүн Р.Нямдорж сэтгүүлчдэд хэвлэлийн бага хурал зарлав. Хэвлэлийн хурлын үеэр Үндэсний бөхийн холбоо өнгөрсөн хугацаанд хийж бүтээснээ тайлагнав. Мөн энэ үеэр үндэсний их баяр наадмын бөхийн барилдаанд шөвгөрсөн бөхчүүдээс сэргээшийн шинжилгээ авахад улсын арслан Х.Мөнхбаатар, улсын начин Б.Сугаржаргал нар допингийн төрлийн эм бэлдмэл хэрэглэсэн болохыг үндэсний бөхийн холбооны тэргүүн Р.Нямдорж тэнд цугласан хэвлэл мэдээллийнхэнд албан ёсоор зарласан нь анхаарал татав. Сэргээшийн хариуг зарлах үеэр улсын арслан Х.Мөнхбаатар ирсэн бөгөөд Монголын үндэсний бөхийн холбооны тэргүүн Р.Нямдорж болон улсын арслан Х.Мөнхбаатар нар маргалдсан юм.
-Та сэргээшийн шинжилгээнд хэдэн удаа орсон бэ?
-Би үндэсний их баяр наадамд ес дэхь жилдээ шөвгөрч байна. Мөн Гуанжугийн наадамд сэргээшийн шинжилгээ өгсөн гэхээр 10 дахь удаагаа сэргээшийн шинжилгээ өгөөд байна.
-Сэргээш хэрэглэсэн нь үнэн юм уу?
-Би өнгөрсөн сар шинийн барилдаанд аварга С.Мөнхбаттай үзүүр түрүүнд барилдахдаа баруун мөрөндөө бага зэргийн бэртэл авсан юм. Бэртлийн төрөлд ууж болох Хятадын уламжлалт эмчилгээнд хэрэглэдэг бидний нэрлэдгээр Чилийсэн палийсан гэх эм уусан нь үнэн. Тэр эмийг бэртэл гэмтлийн үед хэрэглэхийг зөвшөөрдөг юм билээ.
Түүнээс биш сэргээшийн төрлийн хүчтэй эм тан уугаагүй. Тэр эмэнд гармон өндөрсүүлэгч байсан. Зөвшөөрөгдсөн хэмжээ нь 5-9 байх байтал миний гармонд 15 хувьтай гарсан гэсэн. Би энэ эмийг өмнө нь тэмцээн уралдаанд оролцохдоо үргэлж уудаг байсан. Тэглээ гээд надаас сэргээш илэрч байгаагүй. Би юмыг яаж мэдэхэв гэж бодоод “Улаанбаатар сонгодо” эмнэлэгт очиж шинжилгээ хийлгэсэн. Надаас сэргээш илрээгүй. Би тэр шинжилгээний хариуг Р.Нямдорж тэргүүнд үзүүлсэн. Гэтэл тэргүүн Р.Нямдорж наадах чинь хамаагүй гэсэн юм. Би хувийнхаа зардлаар БНСУ-д өөрийн биеэр допингийн төв лабораторид шинжилгээ хийлгэсэн. Энэ лабораторийн хариу 14 хоногийн дараа гардаг юм билээ. Би Р.Нямдорж тэргүүнээс БНСУ-аас ирэх сэргээшийн хариуг хүлээнэ үү гэсэн хүсэлтийг бичгээр хүргүүлсэн. Энэ хүн миний хүсэлтийг авсан. Гэхдээ шинжилгээний хариуг аваагүйд гайхаж байна. Шинжилгээний хариу ямар ч гарах байсан юм билээ.
-Та гомдолтой байгаа юм уу?
-Тэгэлгүй яахав. Р.Нямдорж тэргүүн намайг олон жил нүд үзүүрлэдэг байсан. Би ч олон жил тэсч тэвчиж ирлээ. Яагаад гэвэл 2007 оны улсын баяр наадмаар би гарьд Н.Ганбаатартай долоогийн даваанд гарч барилдсан юм. Тэгээд бид хоёрыг барилдахын өмнө Р.Нямдорж гуай надад санал тавьж байсан. Би түүний тавьсан саналыг аваагүй учир намайг өдий олон жил зуугаад байгаа юм.
-Нууц биш бол ямар санал тавьсан юм бэ?
-Миний хүү зургаа давчихлаа. Чи Н.Ганбаатарыгаа нэг удаа дэмжих хэрэгтэй байна. Ах нь чамд 70 сая төгрөг өгье гэсэн. Би ард түмнээ болон өөрийгөө хуурахыг хүсээгүй. Залуу хүн зөвхөн цолны төлөө л барилдья гэж бодсон. Тэгээд шударгаар барилдаж Н.Ганбаатар унасан. Тэр барилдааны дараа Р.Нямдорж тэргүүн миний хажууд ирээд “Чи яасан овоо хүү вэ, би чамайг харна аа” гээд явсан. Би энэ хүний үгэнд нэг их юм бодоогүй. Эцэг хүний хувьд хэцүү байгаа байх гэж бодоод өнгөрсөн. 2009 оны баяр наадмаар шөвгийн дөрөвт Г.Өсөхбаяр аварга бид хоёрын барилдаан дүрмийн бус болсон гэдгийг ард түмэн сайн мэдэж байгаа. Тэр барилдааныг хөлийн цэц А.Ганбаатар, засуул Х.Пүрэвээ гуай нар дэндүү муухай нэг талыг барьж шүүсэн нь энэ хүнтэй салшгүй холбоотой. Тэр барилдаанд Өсөхөө аваргыг хутгах мэх хийх гэтэл барилдааныг зогсоочихсон. Дараа нь бусгаад мордох гэтэл бас л зогсоосон. Би тэр үед Монгол төрийн наадмаа хүндлээд гомдол санал гаргаагүй. Мөн Ж.Бат-Эрдэнэ гарьд бид хоёр түүхт 90 жилийн ойн баяр наадмаар долоогийн даваанд барилдаад бид хоёрын хөл ойролцоо унасныг бичлэгээр харахад ойлгомжтой байгаа юм. Гарьд Ж.Бат-Эрдэнэ бид хоёрын барилдаан талбайн баруун талд болсон. Тэнд хөлийн цэцээр Д.Бадрах шүүж байсан юм. Тэр хүн Р.Нямдорж болон гарьд Ж.Бат-Эрдэнэ хоёрын нутгийн хүн. Би гомдолтой гээд талбайгаас гарахгүй зогсч эсэргүүцлээ илэрхийлж байсан. Мөн л Монгол төрийн наадмаа хүндлээд талбайгаас гарсан. Энэ жил намайг допингийн хэрэгт холбоод байгаа нь учир битүүлэг хэрэг юм. Энэ хүнтэй маргасан хэн ч болов хариу амсах учиртай гэж үү. А.Сүхбат аварга, Б.Гантогтох гарьд нар залуугаараа зодог тайлсан нь гарцаа байхгүй Р.Нямдорж тэргүүнтэй холбоотой.
Р.Нямдорж:
-Би Х.Мөнхбаатарыг ингэж ярьсанд харамсч байна. Энэ залууг хүүхэд байхаас нь сайн мэднэ. “Х.Мөнхбаатар аа би чамд 70 сая төгрөг өгсөн гэж үү. Ийм муухай бодол хаанаас төрдөг байна.
Х.Мөнхбаатар:
-Та өөрөө надад санал тавьсан. Би сайн санаж байна. Би таны саналыг зөвшөөрөөгүй учир ийм шийтгэл амсах ёстой юм гэж үү. Та хүргэн, хүүхдүүдээ чичирч дайрч цолонд зүтгүүлдгээ зогсоо.
Р.Нямдорж:
-Чи ингэж ярих юм бол би чамтай шүүхдэнэ. Х.Мөнхбаатарт цаанаас нь ингэж яриарай гэж захисан биз. Миний хүүг Монголын ард түмэн сайн мэднэ. Чам шиг юмаар заан болох хүн биш. Чамайг гуйж цол авах ч үгүй. Чи ийм боловсролгүй юм ярьдаг байхгүй юу. Ард түмэн намайг мөнгө өгөөд хүүдээ цол гуйх хүн биш гэдгийг гэрчлэнэ.
Х.Мөнхбаатар:
-Та миний шинжилгээний хариуг яагаад хүлээгээгүй шалтгаанаа тайлбарла.
Р.Нямдорж:
-Би чиний шинжилгээний хариуг 40 хоног хүлээлээ. Үүнээс илүү хэд хоног хүлээх байсан юм. Намайг яасан муухай гөрдөж байна вэ. Тэгж ярих юм бол наадмаар хүүгээ барилдахад нь би суудлаасаа огтхон ч босоогүй. Би чамайг ингэж ярьсанд гайхаад барахгүй үзэн ядаж байна. Чи баримтгүй зүйлээр хов жив хөөцөлдөхөө боль. Яс юман дээрээ Ж.Бат-Эрдэнэ гарьдад унасан. Тэгээд талбайгаас гарахгүй болохоор Б.Бат-Эрдэнэ аварга индэр дээрээс бууж ирээд чамайг талбайгаас гаргасан. Мундаг хүний шавь ийм хөгийн юм ярьж байгаад харамсч байна. Чамаас сэргээш илэрсэн биз дээ. Тэгээд Р.Нямдорж руу дайраад салчихаж болдог гэж бодож байна уу. Хууль нарийн болсон шүү гэдгийг анхаараарай. Чиний ярьж байгаа шиг мөнгө төгрөг, өгч авч байсан удаа надад байхгүй. Олон хүн чи бид хоёрын яриаг сонссон шүү. Би чамайг шүүхэд өгнө. Чамайг сайн бөхөө болоосой гэж бодож байхад чи мунхаг юм ярьж байх гэж дээ. Өөрийнхөө зам дээр чулуу хаяж байгаагаа ухаарч байна уу. Би монгол бөхийн найраа гэдэг зүйлтэй 1990 оноос хойш тэмцэж ирсэн. Хүүгээ найраагаар улсын начин болсноос насаараа аймгийн арслан цолтой үлдээрэй гэж захидаг байсан. Чи намайг шалгуулаарай. Би амьдралдаа 70 сая төгрөг барьж үзээгүй. Ийм юм яриад чи хол явахгүй. Надаас болж А.Сүхбат зодог тайлаагүй юм шүү. А.Сүхбат давдаг хүнээ давахаа больсон учир зодог тайлсан гэж хэлсэн биз дээ. Тэр яриа бидний архивт байгаа. Залуу хүн ийм болхи аргаар амьдарч болохгүй.
Х.Мөнхбаатар:
-Миний замын өмнө чулуу тавина гээд намайг заналхийлж болохгүй. Би үгээ ард түмэндээ хандан хэлж байгаа болохоос биш Р.Нямдоржид хэлээгүй юм шүү. Та намайг яс үндсээр нь гадуурхах эрхгүй шүү. Би энэ хүний золиосонд олон удаа өртсөн. Тиймээс надад айх зүйл алга. Та надтай шүүхдэнэ гэлээ. Шүүхээр явах нь таны эрх. Би ч мөн шүүхээр явна.
