С.УЯНГА   Монголын залуу хоккейчдыг дэмжих  Канад, Монголын хамтарсан төслийн албан ёсны нээлтийг хийлээ. Монголд хоккейн спорт социализмын үеэс эхлэн хөгжсөн ч хувцас хэрэгсэл, талбай, дасгалжуулагч дутмаг байгаа юм. Монгол залуучуудын сонирхлыг дэмжиж Канад Улсын Элчин сайдын яам, Монголын хоккейн холбоо, хоёр улсын аж ахуйн нэгжүүд хамтран Канадад хоккейн хувцас хэрэгслийг хандиваар цуглуулжээ. Хандиваар цугларсан чингэлэг дүүрэн хувцас хэрэгслийг Монголын хоккейн холбоо баг, тамирчдадаа тараах юм байна. Төслийн нээлтийн үеэр Канадын Элчин сайд Дэвид Спрул “Төслийн хүрээнд Монголд авчирч буй хоккейн хэрэгсэлд Канадын олон зуун иргэний зүрх сэтгэл шингэсэн учраас иргэн хоорондын харилцааг хөгжүүлсэн маш чухал үйл явдал болж байна. Цаашид ч Монголд хоккейн спортыг хөгжихөд бид бүх талаар тусалж дэмжих болно. Мөн манай улсаас алдартай дасгалжуулагч ирж нөхөрсөг тоглолт зохион байгуулах болно” гэлээ. Монголын хок­кейн холбооны дэд ерөнхийлөгч А.Мэргэн “Канад, Монголын маш олон компани хоккейн спортыг дэмждэг.Монголд ойролцоогоор 1200 гаруй хоккейчид бий. Энэ спорт цаашид ч хөгжих бүрэн боломжтой. Хоккейн спорттой холбоотой гурван төсөл амжилттай хэрэгжиж байна. Хоккейн ордон барих газар, зураг төсөл бэлэн болсон. Ордон баригдах хүртэл энэ спортыг хөгжүүлж, залуучуудыг татан оролцуулахад анхаарна” гэв. Тэшүүр 260, малгай 500 зэрэг зургаан төрлийн 3000 хэрэгсэл бэлэглэж байгаа юм. Монголын залуу хоккейчдыг дэмжих төслийн хүрээнд ирэх оны хоёрдугаар сард болох “Монгол дахь хоккейн өдрүүд” арга хэмжээний үеэр Канадын Ванкувэр хотын Лэсли глобал спортс клубын Нэйт Лэсли тэргүүтэй дасгалжуулагчид манай улсад ирж  мөсөн талбайд сургалт хийх юм байна. Эх сурвалж: "Зууны мэдээ" сонин