Б.ӨЛЗИЙ
Жүдо бөхийн “Их дуулга” тэмцээн ОХУ-ын Екатеринбург хотноо болж өндөрлөв. Энэ тэмцээнд 35 орны 280 гаруй жүдоч оролцсон байна. Энд манай улсаас эрэгтэйчүүд 10, эмэгтэйчүүд найман жинд 18 бөх зодоглож тэмцээний эхний өдрийн байдлаар нэг алт, гурван хүрэл медаль авсан юм. Тэднээс 73 кг-д барилдсан залуучуудын ДАШТ-ий хошой мөнгөн медальт, “Сүлд” спорт хорооны бөх Ц.Цогтбаатарыг дийлэх бөх гарсангүй. Учир нь тэр шинэ жиндээ гайгүй дасч байгаа бололтой. Хоёр долоо хоногийн өмнө болсон Парисын “Их дуулга”-аас хүрэл медаль хүртсэн бол сая хүчтэй өрсөлдөгчид таарсан ч тун гарамгай барилдсан байна. Тэрээр хэсгийн аваргын төлөө барилдаанд дэлхийн гурван удаагийн аварга, Японы алдарт бөх М.Эбинумаг ялаад байсан Казахстаны З.Сагумов, хагас шигшээд ДАШТ-ий хүрэл медальт АНЭУ-ын В.Сквортов нарыг цэвэр орхиж улмаар алтан медалийн төлөө Армений бөх Ф.Карапетяныг өвдөг шороодуулж энэ тэмцээний аваргаар тодорчээ.
Тэгвэл эмэгтэйчүүдийн 48 кг-д Г.Наранцэцэг, 57 кг-д Хөдөлмөрийн баатар Д.Сумъяа нар хүрэл медалийн болзол хангасан байна. Сонирхуулахад олимпийн мөнгөн медальт Д.Сумъяа “Их дуулга” тэмцээнээс алт 10, мөнгө зургаа, хүрэл тав гээд тийм олон медаль хүртээд байгаа юм байна. Г.Наранцэцэгийн хувьд “Их дуулга”-аас анхны медалиа авч байгаа нь энэ ажээ. Тэмцээний хоёр өдөр Г.Алтанбагана хүрэл медаль хүртэж багийнхаа медалийн буухиаг үргэлжлүүлэв.
Эх сурвалж: "Зууны мэдээ" сонин
