Д.НАДМИД
Чөлөөт бөхийн эмэгтэйчүүдийн уламжлалт “Дэлхийн цом” тэмцээн өнгөрсөн амралтын өдрүүдэд Японы Такасаки хотноо болов. Уг тэмцээнд Монгол, БНХАУ, Япон, АНУ, Канад, Румын, Белорусь, Швед гэсэн найман орны баг өрсөлдсөн юм. Манай бүсгүйчүүд сүүлийн жилүүдэд дэлхийн хүчтэй багийн тоонд багтаж чадсан бөгөөд “Дэлхийн цом”-ын тэмцээнд 2009 оноос хойш тасралтгүй оролцож мөнгө, хүрэл медальтай ирж байлаа. Тэгвэл энэ жилийн тэмцээнд мөн л хүчирхэг байдлаа хадгалж гурав дахь хүрэл медалиа хүртсэн байна. Өмнөх тэмцээний медалийн өнгөө хувиргах зорилгоо яагаад биелүүлж чадсангүй вэ гэвэл тэд эхний тойрогтоо БНХАУ-ын багт тун хүлцэнгүй мэт ялагдсан явдал байлаа. Арван жинд барилдсан бөхчүүдээс ДАШТ-ий мөнгөн медальт Э.Сумъяа ганцаараа өрсөлдөгчөө ялж бусад нь дийлдэв. Энэ онцгүй ялагдал байлаа.
Харин дараа нь Белорусийн багийг 6:4-өөр, Румыныг 8:2-оор ялж медалийн төлөө барилдах эрх авч чадсан юм. Тэгээд медалийн төлөө АНУ-ын бүсгүйчүүдтэй хүч үзэж дийлснээр медалийн тавцанд зогсож чадав. Барилдааны явцыг тодруулбал, хамгийн хөнгөн жин буюу 50 кг-д Э.Нарангэрэл учраадаа дийлдсэн ч Э.Сумъяа, Э.Даваачимэг, А.Батцэцэг, Б.Шоовдор нар дараалан ялжээ. Харин баттай ялалт авчрах магадлалтай гэх П.Орхон, С.Батцэцэг нар өрсөлдөгчөө дийлсэнгүй нь тун эвгүйдэл бий болгов. Тэгэвч 68, 72 кг-ын жингийн шилдгүүд Ш.Түмэнцэцэг, О.Насанбурмаа нар туршлага зааж хоёр ялалт авснаар АНУ-ын хүчтэй багийг буулган авсан байна. Манай бүсгүйчүүдээс сүүлчийн барилдаанд Э.Сумъяа, А.Батцэцэг, Ш.Түмэнцэцэг, О.Насанбурмаа нар онооны илүүгээр буюу цэвэр ялалт авч онцгой сайхан барилдаан үзүүлсэн ажээ. Тэр дотроос ОУХМ Ш.Түмэнцэцэг багтаа тун чухал ялалт авчирсан. Түүнийг нь гавьяат тамирчин О.Насанбурмаа багийн ялалтыг баталгаажуулсан гэж хэлж болно. Ингээд манай бүсгүйчүүд 17 дахь удаагийн “Дэлхийн цом”-оос хүрэл медаль хүртснээр нэг мөнгө, гурван хүрэл медальтай болсон байна.
Эх сурвалж: "Зууны мэдээ" сонин
