Бүгд Найрамдах Ардчилсан Солонгос улсаас Японы тэнгис руу харвасан пуужин анх удаагаа байндаа хүрчээ. Японы эрх баригчид Пхеньяны хөөргөсөн “Подон” ангиллын дунд тусгалын пуужин 620 миль нисч наймдугаар сарын 3-ны өглөө Японы тэнгист унасныг мэдээлсэн байна. Японы Ерөнхий сайд Шинзо Абэ пуужин хөөргөснийг буруушаагаад “Японд аюул нүүрлэлээ” гээд Токио үүнийг хүчтэй эсэргүүцэж буйг мэдэгдлээ.
Өмнөд Солонгосын Нэгдсэн штабын удирдлага “Хойд Солонгос пуужин хөөргөсөн нь “хөрш орнуудад шууд болон өргөн хүрээтэй дайрах” амбицтай гэдгээ нотлон харууллаа” гэсэн байна.
АНУ-ын Батлан хамгаалахын Стратегийн командлал Пхеньянаас хоёр пуужин хөөргөснийг батлаад, нэг пуужин нь хөөрсөний дараа дэлбэрсэн гэж мэдээлэв. “Бид өөрсдийгөө болон холбоотнуудаа ямар ч дайралт халдлагаас урьдчилан хамгаалахад бэлэн. Сэтгэл зовниж байгаагаа НҮБ-д мэдэгдэж байна” хэмээн АНУ-ын Төрийн департаментын хэвлэлийн төлөөлөгч Анна Ричи-Аллен хэлэв.
БНАСАУ өнгөрсөн сард далай руу гурван пуужин харвасан билээ. Пхеньянаас БНСУ болон АНУ-ын пуужингаас эсэргүүцэн хамгаалах систем байгуулах талаар өнгөрсөн сард танилцуулсныг эсэргүүцэж хариу өгнө хэмээн заналхийлсэн. Түүнээс хойш далай руу пуужин харваад байна.
Эх сурвалж: “Зууны мэдээ” сонин
