Б.БАРС

Франц-Исланд-5:2.

Сен-Дени хот. Долдугаар сарын 3. “Стад де Франс” цэнгэлдэх хүрээлэн. 76 833 үзэгч.

Гоолууд: Жиру, 12 – 1:0. Погба, 20 – 2:0. Пайет, 43 – 3:0. Гризманн, 45 – 4:0. Сигтоурссон, 56 – 4:1. Жиру, 59 – 5:1. Б.Бьяндасон, 84 – 5:2.

Франц: Ллорис (ахлагч), Санья, Юмтити, Косьелни (Мангала, 72), Эвра, Сиссоко, Матуиди, Погба, Гризманн, Пайет (Коман, 80), Жиру (Жиньяк, 60).

Ахлах дасгалжуулагч: Дидье Дешам.

Исланд: Халлдоурссон, Сайварссон, Ауднасон (Ингасон, 46), Р.Сигурдссон, Скуласон, Гвюдмундссон, Г.Сигурдссон, Гюннарссон (ахлагч), Б.Бьяднасон, Сигтоурссон (Гудьонсен, 83), Бедварссон (Финнбогасон, 46).

Ахлах дасгалжуулагч: Ларс Лагербек.

Талбайн эзэд тэмцээний гол шуугианыг таригч эрэлхэг мөсөн арлынхныг түвэггүй буулган авч хагас шигшээд шалгарлаа. Хана хэрэм мэт хамгаалалт, хурдан шуурхай довтолгоогоороо дуулиан тарьж тив тивийн хөлбөмбөгийн хорхойтнуудын хайр хүндлэлийг хүлээн 330 мянгахан хүн амтай бяцхан арлынхаа жинхэнэ баатрууд, нэрийн хуудас болсон Исландын багийн гайхамшиг үргэлжилсэнгүй. Гэвч тэд эцсээ хүртэл тэмцэн хөлбөмбөгийн элит баг Францад хоёр гоолоор хариу бариад зогсолгүй нэмж хоёр ч гоол оруулах дөхсөн.

Францын довтолгооны олон хувилбар үнэхээр үзүүштэй сайхан болж байлаа. Тоглолтын эхэнд Жиругийн хаалгачийн хоёр хөлний завсраар оруулсан бөмбөгийн дараа Погба энэ тэмцээнд анх удаа гоолдсон. Улмаар энэ тэмцээний нээлт болсон Пайет 16 метрийн торгуулийн талбайн гаднаас шороон буланд оновчтой цохиж тооны харьцааг 3:0 болгож, төдөлгүй алсын дамжуулалтаар хаалгачийн эсрэг ганцаар гарч ирсэн Гризманн өөрийн боломжоо алдаагүй.

Завсарлагын дараа исландууд бууж өгөлгүй эцсээ хүртэл тэмцэлдсээр Сигтоурссон, Бьяндассон нар Францын хаалгыг мялааж цэнгэлдэх хүрээлэнд багаа дэмжихээр хүрэлцэн ирсэн Исландын хүн амын бараг 10 хувийн өмнө нүүр цэх байж чадсан юм. Гоолоор баян сайхан тоглолт үзүүлсэн Франц браво, Исланд баярлалаа!

Ийнхүү шөвгийн наймын тоглолтууд өндөрлөж, хагас шигшээд энэ сарын 6-нд Португал-Вэльс, 7-нд Франц-Герман тоглохоор болж байна.

Эх сурвалж: www.polit.mn