Б.БАРС
Спортын ертөнцөд нэр хүнд, цар хүрээ, үзэгч сонирхогчдын тоогоороо хөлбөмбөгийн ДАШТ, зуны олимпийн наадмын дараа л ордог Европын АШТ 15 дахь удаагаа эхлэх гэж байна. Тус тэмцээнийг анхлан санаачлагч Анри Делоны эх нутаг Францын 10 хотын ногоон талбайд “хуучин” тивийн шилдэг 24 баг өнөөдрөөс эхлэн бүтэн сарын турш өрсөлдөх юм. Франц улс ойрд үзэгдээгүй үер, ажил хаялт, алан хядах ажиллагааны аюул зэрэгтэй тулгарч байгаа ч тив тивийн хөлбөмбөгийн хорхойтнуудын дөрвөн жил хүлээдэг тус тэмцээн амжилттай болж өндөрлөх биз ээ.
“Евро 2016”-д анх удаа 24 баг зургаан хэсэгт дөрөв дөрвөөрөө сугалаагаар хуваагдан тойргоор өрсөлдөж, хэсэг тус бүрт эхний хоёр байр эзэлсэн нийт 12 баг хасагдах шатанд шууд шалгаран үлдэх юм. Дээр нь, хэсгүүдэд гуравдугаар байр эзэлсэн шилдэг дөрвөн баг нэмэгдэн шөвгийн 16-г бүрдүүлэх билээ.
Тус тэмцээний нээлтийн тоглолт Франц, Румыны шигшээ багуудын хооронд Улаанбаатарын цагаар зургадугаар сарын 11-ний 04.00 цагт эхлэнэ. Ингээд, 51 тоглолт бүхий “Евро 2016” тэмцээний хэсгүүдийн бүрэлдэхүүнийг эргэн сануулж байна.
“А” хэсэг
Франц, Румын, Албани, Швейцар
“В” хэсэг
Англи, ОХУ, Вэйлс, Словак
“С” хэсэг
Герман, Умард Ирланд, Польш, Украин
“D” хэсэг
Хорват, Чех, Испани, Турк
“E” хэсэг
Бельги, Итали, Ирланд, Швед
“F” хэсэг
Португал, Исланд, Австри, Унгар
Эх сурвалж: www.polit.mn
