Монголын бодибилдинг фитнессийн холбооны Монголын мистер тэмцээний 1996, 1998, 2000 оны үнэмлэхүй аварга, олон улсын шүүгч А.Энхтайвантай ярилцлаа.

-Сүүлийн жилүүдэд Монголын спортын холбоод талцах нь энгийн үзэгдэл болсон. Энэ талцлын хар сүүдэр танай холбоог бас тойроогүй бололтой?

-Та надтай адил энэ спортын ирээдүйн төлөө санаа зовж явдаг уу. Боди­билдинг, фитнессийн спор­тыг Монголд хөгжүү­лэх анхны суурийг 1990 онд одоогийн Монголын бодибилдинг фитнесийн холбооны хэсэг нөхөд санаачилсан юм. Манай холбоо улсдаа төдийгүй тив, дэлхийд албан ёсны гишүүнчлэлтэй, Монгол Улсыг төлөөлөн олон улсын тэмцээн уралдаанд оролцох эрхтэй цорын ганц холбоо. Монголын бодибилдинг фитнессийн холбооны 20 гаруй жилийн түүх, тамирчдын гаргасан амжилт, бид бүхний үйл хэргийг хэсэг бүлэг хүн гэнэт гарч ирээд халааслах эрхгүй. Хэрэв тэд бидэн­тэй адил энэ спортыг хөгжүүлэхийн төлөө санаа зорилго нэг байгаа бол хөндлөнгөөс оролцохгүй байхыг хүсч байна. Нэг зорилго, нэг тэмүүллийн төлөө бид нэг удирдлага дор хөдлөх нь зүйд нийцнэ. Нэг спортод хоёр толгой хэрэггүй гэж бодож байна. Манай холбооноос хий­сэн хэвлэлийн бага хурлын гол зорилго нь энэ.

-Нөгөө холбоо нь хэзээ байгуулагдсан юм бол?

-Тэд 2009 оноос үйл ажиллагаагаа эхлүүл­сэн гэдэг. Энэ холбооны нэр нь Монголын боди­бил­д­инг фитнессийн нэгд­сэн холбоо. Хоёр холбоо ганц үгний зөрүүтэй учир энэ спортоор хичээллэх сонир­холтой хүүхэд, залуус жинхэнэ холбоог ялгаж салгах тал дээр будилах тохиолдол гарч байна. Тиймээс бид хэвлэлийн бага хурал зарласан хэрэг.

-Энэ спортоор хичээл­лэдэг мэргэжлийн тамирч­дын хэдэн хувь нь танай холбоонд харьяалагддаг вэ?

-Тухайн спорт холбоо­дын ажлыг мэргэжлийн хэмжээний тамирчдын тоо болон тэдний олон улсад гаргасан амжилтаар дүгнэх нь хамгийн энгийн. Энэ спортоор хичээллэдэг залуусын 95 хувь нь манай холбоонд харьяалагддаг. Харин нөгөө холбооны тамирчид ихэвчлэн сонирхогчид байдаг. Энэ нь Монголын бодибил­дингийн спорт хөгжих замд саад, бүр дайсан болно. Монголын боди­бил­динг фитнессийн нэгд­сэн холбооны сонирхогч тамирчид олон улсын тэмцээнд Монголын нэрийн өмнөөс оролцох нь бидний нэр хүндэд муугаар нөлөөлж байна.

-Та нөгөө холбоогоо арай хэтэрхий үгүйсгэж байгаа юм биш үү?

-Тэр холбоонд бидний журмын хэсэг нөхөд бий. Хүн алдаж болно. Харин алдаагаа хурдан засах чадвартай байх ёстой.

-Нэгэнт л хоёулаа нэг зорилгын төлөө байгуу­лагд­сан юм чинь нэгдээд ажиллаж болдоггүй юм уу?

-Харин та юу гэж бо­дож байна. Энэ байдлаар цааш үргэлжилбэл Мон­голын бодибилдинг фитнессийн улсын аварга шалгаруулах тэмцээн жилд хоёр удаа болох гээд байна. Ийм байж болох уу. Үүнд логикийн асар том эндүүрэл байгаа биз дээ. Манай холбоо долоо хо­ногийн эхээр Монголын үндэсний олимпийн хо­рооны гишүүнчлэлд албан ёсоор бүртгүүллээ. Энэ алхам нь биднийг тэднээс ялгарах хангалттай шалтгаан болно гэдэгт найдаж байна. Мөн Мон­голын бүх шилдэг мис­терүүд манай холбоонд байдаг нь олон асуултын эргэлзээг тайлна.

-Хоёр холбоо байснаар өрсөлдөөн гарах сайн тал бий гэж ярих хүн бас байна. Энэ талаар та ямар бодолтой байна?

-Бид өнөөдөр хоорон­доо өрсөлдөөд юу хожих вэ. Бидэнд өрсөлдөгч хангалттай олон бий. Тив, дэлхийн шилдгүүдтэй өрсөлдөхийн тулд хамгийн түрүүнд бид өөр хоорондоо эвтэй, санаа зорилго нэг байх нь хамгийн чухал.

-Монголд “А” зэрэг­лэлийн хоёр шүүгч бий. Нэг нь та. Мэргэжлийн шүүгчдийг бэлтгэх талаар танай холбоо ямар ажил хийж байгаа вэ?

-Сайхан асуулт байна. Мэдээж “А” зэрэглэлийн шүүгчтэй Монголын боди­билдинг фитнессийн хол­боогоо бусдад дүгнүүлэх хамгийн дөт арга нь энэ байж мэдэх юм.

-Хоёулаа ярианыхаа сэдвийг бага зэрэг өөр­чилье. Ирэх наймдугаар сард болох Ази тивийн аварга шалгаруулах тэм­цээнд манай тамирчдын чансаа харагдах учиртай. Энэ тэмцээн нэг ёсондоо та бүхний ажлыг дүгнэх байх. Тэмцээнд оролцох тамирчдыг хэрхэн сонгох вэ?

-Манай холбоо олон улсын тэмцээнд оролцох тамирчдаа сүүлийн хоёр жилийн хугацаанд гарга­сан амжилтыг нь харгал­зан үзээд хэн явахыг шийд­дэг. Энэ жилийн Азийн аваргын эрчүүдийн ангилалд тав, эмэгтэй­чүүдэд 2-3 тамир­чин явна.

-Спортын ихэнх холбоод шигшээ багаа байгуулсан бай­на. Харин танай холбоо энэ тал дээр сураггүй гэхэд болно?

-Манай холбоо улсаас дэмжлэг, та­таас авч байгаа­гүй. Тэг­лээ гээд шиг­шээ багаа бүрдүүлэх тал дээр хойрог хандаж бай­сангүй. Бид наадмын дараа шигшээ багийнхаа тамирчдыг сонгон шал­гаруулах бодолтой байна. Шигшээ баг маань удах­гүй болох Азийн аваргын өмнө байгуулагдана. Үүний дараа Дэлхийн аваргын тэмцээн манай тамирчдыг хүлээж байна. Хоёр том тэмцээний мөчлөгийн эгзэгтэй үед шигшээ багаа байгуулах нь бидний ажлын арга барил гэж ойлгоход болно. Энэ тэмцээн ирэх аравдугаар сард болох юм.

-Танай холбооны үүд хаалга хөдөө орон нутагт аль хэр нээлттэй байна? 

-Салбар хариуцсан яам маань үндэсний болон олимпийн топ гэх тодотголтой спортын төрлүүдэд арай илүү анхаараад байх шиг. Төр засаг олимпийн болон олимпийн бус спортын төрлүүдэд тэгш хандах үүрэгтэй. Гэтэл өнөөдөр тэгж чадахгүй байна шүү дээ. Монголын спортыг залгамжлах хойч үе маань шагнал, урамшууллаа дагаад явчих гээд байна. Энэ байдал цааш удаан үргэлжилбэл Монголын спортын хөгжил топ гэгдэх хэдхэн төрөл дээр тогтох болж таарна. Бүх спортыг жигд хөгжүүлэхийн тулд цалин урамшууллыг ялгаваргүй өгөх нь чухал. Нэг жишээг дурдахад бодибилдинг фитнессийн спортод өндөр амжилт гаргах хугацаа нь багаар бодоход 10 жил байдаг. Энэ хугацаа нь хүний амьд­ралын хамгийн идэвхтэй насыг дайрч өнгөрдөг. Тиймээс амжилт гаргасан тамирчин бүгд спортын төрөл зүйлээс хамаарахгүйгээр адилхан урамшуулалд хамрагдах ёстой.

-Монголын бодибил­динг фитнессийн эмэгтэй тамирчдын ур чадвар ахис­ныг Зүүн азийн тэмцээнээс олж харлаа. Амжилтаа хадгалж үлдэхийн тулд танай холбоо ямар ажил хийж байна вэ?

-Сүүлийн жилүүдэд эмэгтэйчүүдийн ангилалд түлхүү анхаарч байгаа. Манай эмэгтэй тамирч­дын ур чадвар азийн хэмжээнд өндөр хөгжсөн. Тэд сургалтын тусгай арга барилтай болсон. Хамгийн гол нь төр засгаас тэднийг бага ч болов дэмжих хэрэг­тэй байна. Хэрэв манай тамирчдыг дэмжээд өгвөл тэдэнд их нөөц бий шүү. Харин Монголын олим­пийн хорооны удирдлагууд бодлогын болон бусад талаар дэмжих нь бидэнд урам болдог юм. Энэ даш­рамд тэдэндээ баярлаж явдагаа хэлмээр байна.