“Хурд” хамтлагийн уянгын дуунуудыг мэдэхгүй, сонсоогүй, дагаж аялдаггүй монгол хүн гэж үгүй. “Хурд” хэдийгээр рок хамтлаг ч уянгын дуунууд нь тэднийг илүү алдартай болгосон гэдэг. Тэгвэл хамтлагийнхан энэ удаа сонсогч фенүүддээ шинэхэн цомгоороо бэлэг барих гэж байна. Цомгийн хоолойны бичлэг дууссан гэнэ. Тэд “Хайрын салхи” цомгоо гаргаснаас хойш хэсэг хугацаанд уран бүтээлээ завсарлаад байсан билээ. “Эзэнтэй дуу” булангийнхаа энэ удаагийн дугаарт “Хурд” хамтлагтай холбогдож, шинэ цомгийнх нь тухай болон “Аавдаа би хайртай”, “Манлайлан дэвэгчийн дуу”гэсэн хоёр дууных нь бүтсэн түүхийг сонирхлоо.

Хурд хамтлагийн ахлагч Д.Ганбаяр:

ЭРчүүДЭЭ МАГТАН ДУУЛСАН ОЛОН САЙХАН ДУУ БИЙ

-Манай хамтлагийн шинэ цомог удахгүй сон­согчдын гарт очно. Цом­гийн баяраар уулзац­гаая. Сонсогчидоо удаан хү­лээл­гэсэнд ууч­лаарай гэж хэлмээр байна. Цомогт маань сэтгэлд хоногшсон хуучны болон шинэ уран бүтээлүүд багтсан. Эрчүү­дээ магтсан гайхалтай дуу­нууд ч байгаа. Ер нь манай хамтлагт эрчүүдээ магтан дуулсан олон сай­хан дуу бий. Эр хүний хийморь, эрч хүчийг бэл­гэдсэн, аавыгаа магтан дуулсан эдгээр дуунууддаа хайртай. “Аавдаа би хайр­тай” дуу­ны шүлгийг Зо­хиолчдын хорооны дарга байсан Б.Чи­лаажав гуай зохио­сон. Аялгууг С.Иш­хүү гэсэн ховор­хон авь­яас­тай залуу зо­хиож олны хүртээл бол­госон юм. Ха­рамсалтай нь энэ хүн одоо бидний дунд байхгүй. Зо­хиолч маань энэ дууг аав­даа зориулж зохиосон гэж дурс­сан бай­д­аг. Сэт­гэл шингэсэн дуу гэж үү­нийг л хэлэх байх. Тий­мээс ч сон­согчдын сэтгэлд хүр­сэн гэж боддог.

Харин “Манлайлан дэвэг­чийн дуу”-г Д.Данзан гуай зо­хио­сон. Аялгууг нь ма­най гитарчин Д.Отгонбаяр зо­хиосон. Манай спор­тын­хон андахгүй. “Та­мирч­ны алдар” гээд сай­хан дууны үгийг зохиосон хүн. Энэ дууг энэ цагийн их аварга Б.Бат-Эрдэнэд зориулж зохио­сон гэдэг. Бараг 10 жил болж байна. Үг нь хүртэл сүртэй шүү дээ. Яг л бөх хүн, аварга хүн алхаж яваа юм шиг. Харамсалтай нь одоо хүр­тэл дүрсжүүлж чадахгүй л явна. Хэзээ нэг өдөр сай­хан клиптэй болох байх.

Д.Отгонбаяр:

ХАМТЛАГИЙН ШИНЭ ТӨРХИЙГ ЦОМГООС ХАРААРАЙ

-Хамтлагийнхаа шинэ цомгоор сонсогчидтойгоо уулзах болсондоо баяртай байна. Манай хамтлагийн шинэ өнгө төрхийг энэхүү цомгоос харж болно. “Ман­лайлан дэвэгчийн дуу”-ны хувьд үг нь сай­хан бол аялгуу урсаад л гардаг. Энэ дуу яг л тийм дуу байсан. Аваргын тухай дууны аялгууг зохиосон­доо баярлаж, бэлгэшээдэг. Монгол түмний сэтгэлд хүрсэн сайхан бүтээл төр­сөн. Монгол эр хүн бүхний аялах дуртай дууны нэг. Удахгүй дуугаа дүрсжүүлнэ.