Д.ЖАВХЛАН
Ардын хувьсгалын 91 жилийн ойгоор шөвгөрсөн 16 бөхийн шинжилгээний хариу наймдугаар сарын дундуур олон нийтэд ил болж, улсын арслан Х.Мөнхбаатар, улсын начин цол шинээр хүртсэн Б.Сугаржаргал нараас сэргээшийн төрлийн бэлдмэл илэрсэн билээ. Холбогдох байгууллагууд шинжилгээний дүнг нотолсоноор Баяр наадмыг зохион байгуулах хороо өнгөрсөн хоёрдугаар сарын дундуур хуралдаж, улсын арслан Х.Мөнхбаатарын Ардын хувьсгалын 91 жилийн ойн баяр наадамд тав, зургаа, долоогийн давааг хүчингүй болгож, чимгийг нь хураах, улсын начин Б.Сугаржаргалын зургаан сар барилдах эрхийг хасаад байсан.
Тэгвэл өчигдөр Үндэсний баяр наадмыг зохион байгуулах үндэсний хорооны дарга, Шадар сайд Д.Тэрбишдагва дээрх бөхчүүдэд цолны даваанд унасан хоёр бөхөд шинэ цолыг нь нөхөн олгов. Тухайлбал, Ардын хувьсгалын 91 жилийн ойн баяр наадмын тавын даваанд Х.Мөнхбаатар арсланд өвдөг шороодсон улсын начин Ж.Оргил өсөх идэр чимэг, зургаагийн даваанд унасан улсын начин Ж.Амартүвшин шинээр харцага болон дэвшиж, долоогийн даваанд унасан улсын харцага Т.Санчирт шинээр заан цолны тэмдэг үнэмлэх гардууллаа. Харин улсын начин Б.Сугаржаргалд тавын даваанд унасан улсын заан Б.Соронзонболдод ч мөн чимэг нэмэх юм байна. Өчигдөр Төрийн ордонд шинээр заан цолоо авсан Өвөрхангай аймгийн Хархорин сумын харъяат, “Хилчин” спорт хороо, АПУ компанийн бөх улсын заан Т.Санчираас баярын сэтгэгдлийг нь хуваалцлаа.
Т.Санчир: 26 ЖИЛ ТАСАРСАН ЗААН ЦОЛЫГ ЗАЛГУУЛАХ ХУВЬТАЙ БАЙЖ
-Өвөрхангай аймгаас зургаан жилийн дараа та заан цолыг залгуулах хувьтай байж дээ. Танд баяр хүргэе?
-Хуртай, хувьтай сайхан өдөр болж байна. Баярлалаа. Манай Хархорин сумаас миний мэдэхээр “Том” хэмээх Ц.Санжаа ах маань 1960 онд, З.Дүвчин ах 1987 оны наадмуудад долоо давж заан цол хүртсэн байдаг. Би улсын наадмын зүлэг ногоон дэвжээнд 10 дахь жилдээ барилдаад, Хархорин сумын 26 жил тасраад байсан заан цолыг залгуулах хувьтай байж дээ. Өнөөдрийн орсон хур бороо сонин утга санааг илэрхийлж байгаа биз. Үндэсний баяр наадмын комисс хууль дүрмийнхээ дагуу надад өгөх ёстой заан цолыг цаг алдалгүй өгсөнд баяртай байна. Монгол бөхийн босоо цагаан хийморь намайг болон нутгийн зон олны хүссэн хүлээлтийг тайллаа.
-Та өнгөрсөн баяр наадмаар шинээр харцага цол авсан. Харин өнөөдөр заан цолоо нөхөн авч байна. Наадмын индэр дээрээс цол авах Төрийн ордноос цол авахын ялгааг тайлбарлахгүй юү?
-Зүлэг ногоон дэвжээнээ наадамчин олонтойгоо шинэ цолныхоо баярыг хуваах нь сайхан байлгүй яахав. Манай ард түмэн наадмын сураг чимээтэй хаяа нийлсэн энэ үед цолоо авч байгаа нь надад тааламжтай байна. Шинээр авсан цол маань надад удахгүй болох наадмын сэтгэл зүйд асар их өөрчлөлт авчрах байх аа.
-Өнгөрсөн наадмын бэлтгэлээ хаана, хэрхэн базаав?
-2012 оны наадмын бэлтгэлээ гавьяат дасгалжуулагч Д.Дашжамц багшийнхаа удирдлаганд “Хилчин” спорт хорооныхоо бөхчүүдтэй Бугын сангийн аж ахуйд гарсан. Ер нь тэнд л тогтмол гардаг юм. Би Бугын сангийн аж ахуйгаас аймгийн арслан, улсын начин, улсын харцага зэрэг сайхан цолуудаа авсан. Их өгөөжтэй, сайхан хангай байгаа юм. Энэ жил ч мөн тэндээ гарах бодолтой байна.
-Наадмын даваа болгон хүнд байдаг. Өнгөрсөн наадмын даваануудын талаар ярихгүй юү?
-Наадмын хоёрын даваанаас эхлээд л ширүүн өрсөлдөөн гардаг. Миний хоёрын давааны учраа Архангайн аймгийн арслан У.Батгэрэл байсан. Гуравт Завханы аймгийн харцага Э.Баасандорж гэж олон жил сайн барилдаж байгаа залууг амлаж давсан. Харин дөрвийн оноолтонд улсын харцага Ө.Даваабаатартай таарч даваад тавд Б.Ганбат арсланг давж начин цолоо баталсан. Зургаагийн даваанд улсын арслан Д.Азжаргалыг давж улсын харцага цолыг авсан даа.
