Э.ЭРДЭНЭ
Өргөө II кино театрынхан залууст шинэ, содон зүйл хүргэхийн тулд үргэлж өөрийг эрж хайж байдгийг тэдний үйлчлүүлэгчид андахгүй. Тэгвэл Өргөө II кино театрын хамт олон дэлхийн дэвшилтэт технологийг эх орондоо нэвтрүүлж, залууст шинэ бэлгээ задалсан юм. Дэвшилтэт технологи бүхий сонирхолтой тоглоомуудыг угсарч дуусснаа тэд зарлалаа. Үйчлүүлэгчид, оюутан залуус руу чиглэсэн тэдний шинэ, шилдэг алхамуудын нэг яах аргагүй энэ байв. Таатай найрсаг үйлчилгээ, тав тухтай орчин, өнөө үеийн шинэ технологиор аялах боломжийг тус театрынхан олгож байна. Харин энэ шийдлийг “Өргөө II”-ын залуус хэрхэн хэрэгжүүлснийг тус кино театрын гүйцэтгэх захирал С.Санзайжаваас тодрууллаа.
-Залууст “Мах Rideг” тоглоомын тухай танилцуулахгүй юу?
-“Мах Rideг” хамгийн сүүлийн үеийн буюу 2013 онд шинээр гарсан тоглоом. Нийт 30 замаас сонголт хийж тоглоно. Үүгээрээ Монголд байгаа бусад тоглоомоос илүү юм. Сонголт хийх зам нь заалтны хэсэгт зураглал болон тоон дараалалтай. Зам тус бүрээс хүүхдэд зориулагдсан, адал явдалт, сонирхолтой гэх мэт сонголтыг хийх боломжтой. Тоглоомын давуу тал шинээр зургаан зам нэмэгдсэн нь. Шинээр ирсэн замууд бусад замтай харьцуулахад илүү сонирхолтой. Мөн сүүлийн үеийн загвар учраас төхөөрөмжийн 30 эффект нь илүү сайжирсан. Үүнээс гадна дуу, дүрсний өндөр төвшинд бүтээгдсэн байгаа.
-Тэгвэл “Sport Shooting Mongolia” Монголын залууст шинэ танил уу. Үүний онцлог нь юу вэ?
-Энэ нь Монголд анх удаа оруулж ирсэн төхөөрөмж бөгөөд бусад буудлагын тоглоомноос ихээхэн онцлогтой. Монголд анх удаа нэвтрүүлж байгаа гэдэг утгаар оюутан, залууст шинэ зүйл байж болох ч энэ талаар залуус мэдээлэлтэй байдаг юм билээ. Бууны онцлог нь цахилгаанаар ажилладаг учир цэнэглэх шаардлага байхгүй. Пластик үрлэн сумтай тул яль ч насныхан тоглоход тохиромжтой. Нийт 33 сумаар тоглоно. Түүний бай нь 10, 20, 30, 50 гэсэн тооны сонголт бүхий есөн байтай. Байны хэмжээнээс хамаарч оноо нь өөр байна. Дээрх есөн байг буудаж унагаасны дараа автоматаар дахин босож ирнэ. Буудаад авч болох хамгийн дээд оноо нь 1040. Мөн тодорхой оноонд нь тохирсон урамшуулалтай. Бууны дээд талын салбарт Нipoint тухайн өдөр хамгийн өндөр оноо авсан, буудсан оноо, үндсэн сумны тоо гарна.
-Энэ тоглоомуудын үйлчилгээний төлбөрийн талаар мэдээлэл өгөөч?
-“Sport Shooting Mongolia”, “Мах Rider” тоглоомын хэсэгт хоёр ажилтан ажиллана. Үйлчлүүлэгч тоглоомыг тоглохдоо попкорны хэсгээс тоглоомын тасалбарыг авахаар зохион байгуулсан байгаа. Үнэ ханшийн хувьд “Мах Rider” 3000 төгрөг, “Sport Shooting Mongolia”-ыг 2500 төгрөгөөр худалдан авах юм.
Энэ үеэр шинэ үйлчилгээ, шинэ шийдлийг сонирхохоор ирсэн оюутан залуусын төлөөлөлтэй уулзсан юм.
МУИС-ын дөрөвдүгээр курсын оюутан Г.Насанбуян: Өргөө II оюутан залуусын бүсэд байдгаараа онцлог
Бидэнд сургуульд ойрхон чөлөөт цагаа өнгөрүүлэх газар ховор байдаг. Их, дээд сургуулиудын дунд оршдог энэ театр биднийг цагаа тав тухтай орчинд боловсон өнгөрүүлэхэд чухал үүрэг гүйцэтгэдэг гэж боддог. Би ангийнхан, найзуудаараа энд чөлөөт цагаа өнгөрүүлдэг. Бидний үйлчлүүлэх төрөл нэгээр нэмэгдэж байгаад баяртай байна.
ШУТИС-ийн нэгдүгээр курсын оюутан С.Дарьсүрэн: Ийм орчин тамхинаас татгалзах боломж болно
Зарим оюутнууд цаг заваа зохистой өнгөрүүлэх орчингүйгээс болж дэмий тэнэж, тамхи татдаг. Мэдээж сургуулиас тараад харих замд залуусын сонирхол, анхаарлыг татсан ийм үйлчилгээний газрууд байвал тэд орж л таарна. Манай найзууд ч гэсэн заваараа энд ирэхийг илүүд үздэг. Бидний очдог газар улам өргөжиж байгаад манай найзууд олзуурхаж байгаа. Ер нь иймэрхүү орчин залуусыг тамхинаас татгалзах нэг боломж болно гэж бодож байна.
