Олимпийн шинэ мөч­лөгийн гарааны жилд Мон­голоос нэг бус Азийн аварга төрөв. Хамгийн анх гавьяат тамирчин Б.Сэр-Од марафоны төрөлд авар­галж алтан медалийн дар­дан замыг зассан гэхэд болно. Тэрээр өнгөрсөн хоёрдугаар сард Хонконгт болсон Азийн марафон гүйлтийн аварга шалга­руу­лах тэмцээнд хоёр цаг 17 минут 56 секундын амжилтаар Азийн аварга болсон.  Гавьяат тамирчин Б.Сэр-Одын хувьд гурван олимпод дараалан оролц­сон хашир туршлагатай тамирчин билээ. Тэрээр таван жилийн өмнө Японы Осакад Азийн аваргын мөнгөн медалийг  хүртэж байсныгаа ахиулсан нь энэ.

Тэгвэл алтан медаль булган сүүлтэй байж Энэт­хэгийн Дели хотноо зо­хиогд­сон дугуйн спортын Азийн аварга шалгаруулах тэмцээнд манай эмэгтэй дугуйчин Т.Энхжаргал алтан соёмбот далбайгаа намируулсан юм. Түүний энэ амжилт дугуйн спор­тын түүхэнд алтан үсгээр бичигдэх нь дамжиггүй. Тэрээр дугуйн спортоор хичээллээд ердөө нэг жил болж байгаа ч туршлагатай багшийн удирдлага дор бэлтгэл сургуулилтаа хийс­нээр 28 км замыг 39 минут 27.3 секундэд туулж аваргалсан билээ.

Улмаар өнгөрсөн долоо хоногт Тайландын нийс­лэл Бангкок хотноо бол­сон жүдо бөхийн Азийн аварга шалгаруулах тэм­цээ­ний татамид ОУХМ Д.Төмөрхүлэг 66 кг-ын жинд аваргалсан юм. Тэ­рээр хэсгийн аваргын тө­лөөх барилдаанд Хонкон­гийн Ю Люн Чуйг цэвэр ялж, дараагийн барил­даанд БНСУ, Японы бөх­чүүдийг дараалан юүко үнэлгээгээр ялж тивийн аварга болсон билээ. ОУХМ Б.Төмөрхүлэг Лон­доны олимпийн татамид 60 кг-ын жинд эх орноо тө­лөө­лөн оролцсон бөгөөд ирэх олимпийн оноо цуг­луулах тэмцээнд 66 кг-д зодоглож байгаа билээ.

Харин энэхүү баярт үйл явдалтай дөрөө холбо­сон алтан медалийг Энэт­хэгийн Нью Дели хотноо чөлөөт бөхийн ААШТ-ээс гавьяат тамирчин О.На­сан­бурмаа өрсөлдөгчдөө төвөггүй буулган авч алтан медалийн буухиаг ам­жилт­тай залгууллаа. Тэ­рээр 2004 оны чөлөөт бө­хийн Азийн аваргаас хүрэл медаль авч чөлөө­тийн мэр­гэжилтнүүдийн анхаар­лыг яахын аргагүй татсан нэгэн. Мөн 2008 оны Дэл­хийн аваргын дэвжээнээс мөнгөн медаль хүртэж, өнгөрсөн долоо хоногт болсон Ти­вийн аваргаас алтан ме­даль хүртсэнээр олон ул­сын өндөр зэрэг­лэлтэй тэмцээний ме­да­лийн цуг­луулгаар эмэгтэй тамирч­даа тэргүүлэх бол­лоо.

Ийнхүү шинэ олим­пийн мөчлөгт Монголын топ спортын залуу халаа эхний шалгалтаа амжилт­ тай өгөөд байна.