М.ТИЛЕГЕН
Өнгөрсөн сард Гүржийн нийслэл Тбилиси хотод болсон Европын аварга шалгаруулах тэмцээний эмэгтэй чөлөөт бөхийн 67 кг-ын жинд Украины Алина Стадник түрүүлсэн аж. Түүний ярилцлагыг хүргэж байна.
-Алина, сүүлийн жилүүдэд Украины эмэгтэй баг Европын аваргааас хамгийн багадаа гурван алтан медаль авч байсан. Харин энэ удаа зөвхөн чи л аваргаллаа?
-Би энэ удаагийн тивийн аваргад түрүүлнэ гэдгээ мэдэрч байсан. 2011 онд Европын аварга шалгаруулах тэмцээний финалд гарсан. Харамсалтай нь гэмтлийн улмаас шийдвэрлэх барилдаанд ялагдсан. Тэгэхэд би Европт түрүүлж болно гэдгийг мэдсэн. Харин энэ удаа хоёр дахь мөнгөн медаль надад хэрэггүй байсан. Одоо миний гол зорилго бол дэлхий, олимпийн наадамд түрүүлэх.
-Хэрэв 2020 оны олимпоос бөхийг хасчихвал зорилгодоо хүрэхийн тулд чамд яаравчлах хэрэгтэй байна даа?
-Би тэр ярианд итгэхгүй байна. Бөхийн спортгүйгээр олимпийн хөдөлгөөн үүсэхгүй байсан. Бөхийн спорт бол хамгийн эртний олимпийн наадмын хөтөлбөрөөс эхэлж багтаж ирсэн шүү дээ.
-Тбилист Украины баг цамцандаа “Бөхийн спортыг олимпод хадгалж үлдэе” гэсэн уриа бичсэн байсан. Тэр хэний санаа байсан вэ?
-Манай холбооны удирдлага болон дасгалжуулагчдын санаа байлаа. Манай эрэгтэй, эмэгтэй шигшээ багийнхан бүгдээрээ тийм цамц өмссөн. Бидний тэр санааг бусад орны баг, тамирчид дэмжиж байсан нь сайхан санагдсан.
-Нөхөрт гарсныхаа дараа хоёр овогтой эмэгтэй тамирчид маш цөөн байдаг. Тэдний нэгт чи багтаж байна?
-Хоёр овогтой дуудах нь буруу. Европын аварга шалгаруулах тэмцээний турш миний овгийг Махиня-Стадник гэж буруу дуудлаа. Би гэрлэсний дараа нөхрийнхөө овгийг авч, намайг Алина Стадник гэж дууддаг болсон. Ойрын хугацаанд би Олон улсын бөхийн холбоонд хандаж миний овгийг засахыг хүснэ.
-Стадник гэсэн нэр Украины бөхийн ертөнцөд танигдсан. Гэвч бүгдээрээ тэрхүү нэрийг андуураад байх юм. 2008 оны олимпийн мөнгөн медальт Андрей Стадник олимпийн хошой медальт Мария Стадниктэй гэрлэсэн. Харин чиний нөхөр хэн юм бэ?
-Миний нөхөр Андрейн төрсөн дүү Роман. Одоохондоо тэрээр төрсөн ах шигээ нэрд гараагүй. Гэсэн ч миний Европын аваргаас хүртсэн алтан медалийн тал нь Романтай холбоотой. Тэр намайг үргэлж дэмжиж, сүүлийн хоёр жил намайг тэмцээнд бэлдэж, дасгалжуулж байна. Надад янз бүрийн мэх, бөхийн техникийг сургадаг.
-Мария Стадник Азербайжан, харин Андрейн эгч Яна Стадник Их Британийн нэрийн өмнөөс зодоглодог. Алина Стадник иргэншлээ солих бодолгүй байгаа юм уу?
-Үгүй. Би эх оронч, зөвхөн Украины нэрийн өмнөөс барилдана. Харин охидыг шүүмжлээд хэрэггүй. Иргэншлээ солих шийдвэр гаргахад тэдэнд ямар нэгэн шалтгаан байсан байх.
-Украины чөлөөт бөхийн эмэгтэй шигшээ багийг дэлхийн хамгийн хүчтэй төдийгүй хамгийн царайлаг гэж үздэг. Чи үүнийг мэдэх үү?
-Тийм ээ. Тэрхүү яриатай би 100 хувь санал нийлнэ. Бид их царайлаг үндэстэн. Тиймээс чи бөхийн спортыг сонгох уу, гимнастик руу явах уу гэдгээс шалтгаалахгүй.
-Яагаад бөхийн спортыг сонгох болов?
-Тохиолдлоор бөх болсон. Би багаасаа бүжгээр хичээллэдэг байлаа. Гуравдугаар ангид сурч байхдаа манайх хотын өөр дүүрэг рүү нүүх болж намайг дугуйлан руу хүргэж өгөх хүн байхгүйгээс би бүжгээ больсон. Тавдугаар ангид байхдаа манай сургуульд бөхийн дасгалжуулагч ирж секц хичээллүүлж эхлэхэд миний найз намайг тийшээ орохыг ятгасан. Тэгээд л бөхөөр хичээллэж эхэлсэн.
-Танай жинд дэлхийд хамгийн хүчтэй өрсөлдөгчид хэн вэ?
-Дэлхийд хамгийн хүчирхэг нь Азийнхан. Тэгээд Америк, Канадын тамирчид сайн. Дэлхийн аваргын тэмцээнд тэднийг ялахыг хичээнэ.
