Фолк рок этник урсгалаар уран бүтээлээ туурвидаг “Алтан ураг” Монголын ардын урлагийг орчин үеийн хөгжмийн урсгалаар шинэчилж, дэлхий дахинаа уламжлалт соёлоо таниулж чадсан хамтлаг билээ. Тус хамтлагийн ахлагч Б.Эрдэнэбаттай ярилцлаа.

-Өнгөрсөн сард танай­хан ОХУ-ын Крас­ноярск хотод “Ази номхон далайн орнуудын бүсийн олон улсын дуу хөгжмийн наа­дам”-д оролцсон. Энэ та­лаар болон сүүлийн үеийн уран бүтээлээсээ сонир­хуулаач?

-ОХУ-ын Крас­ноярскт “Ази номхон да­лайн орнуудын хөгжмийн наа­дам”-д оролцоод ир­сэн. Сүүлийн үед шинэ клип­ний ажилдаа орсон байна. Ерөнхийдөө хамт­лагийн­хан амарч байгаа. Есдүгээр сараас шинэ уран бүтээлдээ оро­хоор төлөвлөж байна.

-Сүүлийн үед танайхан­тай ижил хэв мая­гаар тоглодог хамтлагууд нэ­лээд бий болж байна. Танай хамтлагын хувьд бусад хамтлагуудаасаа ялгарах онцлог нь юу вэ?

-Бид Ардын урлагийг шинэ төвшинд гаргаж ирэхийн тулд бай­гуу­лагдсан. Тухайн үед хүмүүс ардын урлагийг сонсдоггүй. Тэр дундаа залуус ардын урлагаа со­нирх­доггүй байлаа. Харин бид гарч ирснээр залуус ардын ур­лагийг сонсож, сонирхох нь нэмэгдсэн гэж боддог. Бид “Folk rock” хөгжмийн төрөлдөө анхдагч нь юм.

-Ардын урлагийг шинэ төвшинд гаргасан хамт­лагийн хувьд өөр урлагийн төрлөөр тоглох уу?

-Бидний гол зорилго за­луучууддаа ардын ур­лагаа таниулж, ойлгуулах юм. Ганц ардын дуугаар уран бүтээл хийхээсээ илүү шинийг санаачилж, шинэ хэв маягыг бий бол­гох гэж явна. Тиймээс уран бүтээлийнхээ зохио­лыг өөрсдөө гаргадаг. 

-“Алтан ураг” хамтлаг ардын урлагийг Монголдоо төдийгүй дэлхийд гаргаж ирсэн. Гадаад орны үзэг­чид, манай орны үзэгчид хоёрын хооронд ялгаа байдаг уу?

-Сүүлийн үед залуус ардын урлагаа ойлгож сон­сох нь ихэссэн санагддаг. Тэр утгаараа Монголын үзэгчид маань бахархаж омогшсон сэт­гэлээр хүлээж авдаг. Ха­рин гадаадын үзэгчид гай­хан биширч, сонирхдог.

-Танай хамтлагыг сон­согч фэнүүд олон байгаа байх. Сонсогчдоос сонирхолтой санаа, санал ирж байсан уу?

-Биднийг сонсогчид дэлхийн өнцөг булан бүрт бий болжээ. Японд манай хамтлагийнхыг сонсдог залуус бидэнтэй адилхан хувцас хийлгэж өмсөөд “Фүжи” олон ул­сын хөгжмийн наадамд ирж зургаа ава­хуулж байсан. Мөн Гол­ландын зураач залуу манай хамтлагын зургийг зураад үзэс­гэ­лэнгээ гар­гаж бай­сан. Бид үзэгч сон­­согчид­тойгоо Фэйсбүүк болон мэйл хаягаараа байнга ха­рилцаа холбоо­той байдаг.

-Залууст ардын ур­лагийг рок стилиэр шинэ­чилж байгаа нь их таа­лагд­даг юм шиг санагддаг. Танай хамтлаг залгамж ха­лаагаа бэлтгэж байна уу?

-Сүүлийн үед “Фолк рок” урсгалыг сонирхож сонсох, хамтлагууд ши­нээр бий болж байна. Гэх­дээ бид ардын урлагийг шинэ төвшинд гаргаж чад­сан. Энэ амжилтыг шинэ гарч ирж байгаа залуус бууруулахгүй байгаасай гэж боддог. Бид залгамж халаа бэлдэх гэхээс илүү залууст шинэлэг са­наа, бүтээлч байдлыг ха­руулахыг зорьдог.

-Ойрын үед ямар уран бүтээл төлөвлөж байна. Тоглолт хийх үү?

-Одоогоор тоглолт хийх бодолгүй байна. Ха­рин ирэх арваннэгдүгээр сард олон улсын хөгжмийн фес­тивальд явах талаар ярилцаж байгаа.