Р.Оюун
Сүүлийн үед манай улсын иргэд гадаадыг зорьж эмнэлгийн үйлчилгээ авдаг болсон. Энэ удаагийн "Онцлох фото" буландаа “Монгол Хьюндай" эмнэлгийг онцолж байна. Тус эмнэлэгт дэлхийн тэргүүлэх зэргийн чанартай АНУ-ын протез ашиглаж, олон жилийн туршлагатай солонгос эмч нар түнхний болон өвдөгний үе солихоос гадна бүх төрлийн гэмтэл, согогийн мэс засал, ясны идээт үрэвсэл, спортын гэмтлийн мэс заслыг хийж байна. Энэ тухай гэрэл зургийн сурвалжилгаас сонирхоно уу.
Эмчид үзүүлэхээр хүлээж буй үйлчлүүлэгчид.
Тус эмнэлгээр үйлчлүүлэхээр орж ирсэн өвчтөнүүд хэрэглэх тэргэнцрүүд.
"Монгол Хьюндай" эмнэлгийн эмнэл зүй эрхэлсэн орлогч дарга Б.Батсайхан "Манай эмнэлэг гэмтэл согог болон ерөнхий мэс заслын эмчилгээ үйлчилгээ үзүүлдэг. Үүнээс давтан хагалгаанд орж бүтэлгүйтэж хүндэрсэн өвчтөн их ирж байна" гэв.
Б.Ариунбүүвэй 30 настай. Тэрээр төрөлхийн хоёр талын түнхний мултралтай. Гурван настайдаа оношлуулж мэс засалд орсон ч амжилтгүй болжээ. Цаг хугацаа өнгөрөх тусам түнхний хазайлт нь нэмэгдэж сууж чадахгүй болсон байна. Тиймээс хаана эмчлүүлж болох талаар судлахад Солонгост 100 гаруй сая төгрөгөөр хийлгэх мэс заслыг Солонгосын Хьюндай эмнэлгийн салбар буюу Монголд үйл ажиллагаа явуулж буй "Монгол Хьюндай" эмнэлгийг олж 40 орчим сая төгрөгөөр, эх орондоо хагалгаа хийлгээд байгаа аж. Үйлчлүүлэгч "Өмнө нь автобусны шатаар гарч чаддаггүй, хөл нь тийм хэмжээнд салдаггүй байсан. Харин одоо хөлөө дэлгээд суухад ч өвдөхгүй болсон. Эмчилгээ дуусаж, эдгэх үед хэвийн хүн шиг явах найдвар төрж байна. Эх орондоо аав ээжийнхээ хажууд мэс засалд орсон нь сайхан байна" хэмээн ярьж байлаа.
Тэрээр одоо явдаг тэргэнцрээ тулаад хүссэн газартаа очиж чаддаг болжээ.
Тус эмнэлгээр ясны идээт үрэвсэлтэй, түнхний мултралтай хүүхдүүд, мэс засалд орж амжилтгүй болсон хүмүүс их ирдэг байна. Тэдний нэг 65 настай Б.Пагмсүрэн гуай юм. Тэрээр үений хагалгаанд ороод 12 хонож байгаа. Өмнө нь өөр эмнэлэгт үений мэс засалд орсон ч амжилтгүй болсон. Хоёр жил сайн гэсэн эмнэлгээр явсан ч үр дүнд хүрээгүй. Аргаа бараад байхдаа "Монгол Хьюндай" эмнэлгийн талаар олж мэдээд ирснээр хуучин зүйлээ авахуулж, идээд үрэвсэл дарах эмчилгээ хийлгэж байна. Өмнө нь өвдөгний үе нь их өвддөг байсан ч одоо өвдөлтгүй болсон. Удахгүй өөрт нь тохирсон үе суулгуулна гэж байв.
БНСУ-ын Хьюндай эмнэлгийн орлогч дарга Шим Ү Жонг тус эмнэлэгт ажиллахаар ирсэн байв. Тэрээр бамбай булчирхайн мэс засал, хөхний мэс засал, хоол боловсруулах эрхтэн тогтолцооны мэс засал, хэвлийн дурангийн мэс засал, хавдрын мэс засал, хөлийн судасны бүдүүрлийн мэс засал, ерөнхий мэс заслаар мэргэшсэн байна. Шим Ү Жонг нь БНСУ-ын Хьюндай эмнэлгийн орлогч дарга, эмнэлгийн ерөнхий мэс заслын профессор, Жүн-Ан анагаах ухааны дээд сургуулийн амбулаторийн профессор, тус сургуулийн хүндэт профессор, БНСУ-ын гэмтэл судлалын нийгэмлэгийн батламж, БНСУ-ын клиник хавдрын нийгэмлэгийн клиник хавдар судлалын батламж, БНСУ-ын хэвлийн дурангийн мэс заслын нийгэмлэгийн гишүүн ажээ.
Эх сурвалж www.zms.mn
