П.ЛХАГВАЖАРГАЛ
Хүүхэд бүр дахин давтагдашгүй ертөнцийн эзэд. Тэдний сэтгэлд гайхалтай их төсөөлөл, хүсэл мөрөөдөл, авьяас билэг, энэрэл хайр гээд гэгээн бүхэн оршиж байдаг. “Зууны мэдээ” сонин энэ удаагийн “Хүүхдийн ертөнц” буландаа “Олонлог Академи” сургуулийн “Тэнгэрийн бичиг” дугуйлангийн багш Д.Бямбажаргал болон түүний шавь нарын бүтээлийг онцолж байна.
-“Тэнгэрийн бичиг” дугуйлангийн онцлог юу вэ?
-Манай дугуйланд долоогоос дээш ангийн сурагчид өөрийн сонирхлоор хамрагдах боломжтой. Дугуйлангийн сурагчдыг анхан, дунд, ахисан түвшинд хуваан бийрэн бичлэгийн аргуудыг заадаг. Энэ хичээлийн жил гэхэд гурван багшийн удирдлагад 40-өөд сурагч хамрагдаж, сургуулийнхаа хэмжээнд тайлант үзэсгэлэнгээ гаргасан.
-Үзэсгэлэнгийн тухай хуваалцвал?
-Дугуйлангийн үйл ажиллагаа аравдугаар сараас эхэлж, хоёрдугаар сард сурагчид маань бүтээлийн үзэсгэлэнгээ гаргасан. Энэ жил XVI-XVII зууны үеийн монголын бичиг, соёлын үнэт өв болсон “Цогтын хадны бичээс”-ийн 400 жилийн ойтой холбогдуулан үзэсгэлэнгээ зохиомжилсон. Үзэсгэлэнд дугуйлангийн бүх сурагч нэгээс дөрвөн бүтээл хийж оролцсон бөгөөд бүтээлээ өөрсдийн чөлөөт уран сэтгэмжээр хийсэн.
-Уран бичлэгээр хичээллэсний давуу тал юу вэ?
-Уран бичлэгээр дамжуулан үндэсний бичгийн чадвараа нэмэгдүүлэхээс гадна багаар ажиллаж, бүтээлч сэтгэлгээгээ хөгжүүлж сурдгаараа онцлог. Мөн үүгээр зогсохгүй сууж сурах, анхаарлаа төвлөрүүлэх, аливаад бүтээлчээр хандах, аливаа хийж буй зүйлдээ нямбай хандах зэргээр хүүхдийн суурь хүмүүжилд ихээр нөлөөлдөг.
Эх сурвалж: “Зууны мэдээ” сонин
2025 ОНЫ ДӨРӨВДҮГЭЭР САРЫН 3. ПҮРЭВ ГАРАГ. № 61 (7558)
