2020 онд ерөнхийлөгчийн суудлаа алдаж, түүнийг дэмжигчид нь АНУ-ын Капитол руу халдлага үйлдсэний дараа улс төрийн хувьд гадуурхагдаж буруутгагдаж байсан ерөнхийлөгч асан Дональд Трамп лхагва гарагт Дэд ерөнхийлөгч Камала Харрисыг ялснаар дахин нэг бүрэн эрхийн хугацаанд сонгогдлоо.
Дөрвөн жилийн дараах түүний ялалт улс төрийн түүхэн дэх хамгийн гайхалтай эргэн ирэлтүүдийн нэг болж байна гэж USA today бичсэн байна.
Трамп ерөнхийлөгчийн сонгуульд ялалт байгуулахад шаардагдах электорал коллегийн 270-аас давсан сонгогчийн саналыг авч, өрсөлдөгчөө ялав. Хамгийн сүүлд Вискинсон мужид ялалт байгуулснаар түүний авсан санал 270-аас давсан гэдгийг Associated Press агентлагийн мэдээнд дурджээ. Илүү олон саналыг тоолох тусам түүний санал нэмэгдэх боломжтой гэж АНУ-ын томоохон хэвлэл мэдээллийн хэрэгслүүд мэдээлж байна.
АНУ-ын 45 дахь ерөнхийлөгч байх хугацаанд нь Д.Трампыг огцруулахаар хоёр удаа импичмент зарлаж байсан. Энэ сонгуулийн сурталчилгааны кампанит ажлын үеэр амь насанд нь халдах хоёр оролдлоготой нүүр тулсан. 2021 оны нэгдүгээр сарын 6-нд Капитолын ордон руу дайрахыг олон нийтэд уриалсантай холбоотойгоор буруутгагдаж, 34 хүнд гэмт хэрэгт буруутай эсэхийг тогтоох шүүхийн асуудалтайгаар дөрвөн жилийн дараа Дональд Трамп Цагаан ордонд эргэн ирж байна. Энэ бүхэн нь хэвлэлүүдэд түүний ялалтыг “түүхэн”, “гайхалтай эргэн ирэлт” гэх мэтээр тодотгох шалтгаан болж байна.
Дональд Трамп өчигдөр дэмжигчдэдээ хандаж үг хэлсэн бол түүний өрсөлдөгч Камала Харрис тухайн өдөртөө дэмжигчид, сонгогчдод хандсан мэдэгдэл хийхгүй гэдгээ зарласан билээ.
Эх сурвалж: www.zms.mn
