Ч.ГАНТУЛГА
“Зууны мэдээ” сонин энэ удаагийн “Амжилтын эзэн” буландаа билльярдын тамирчин Э.Тэмүүжинг онцолж байна. Тэрээр саяхан ААШТ-нд түрүүлсэн билээ.
Азийн аварга
Катар улсын нийслэл Доха хотод хятад пүүл билльярдын Ази тивийн аварга шалгаруулах тэмцээн амжилттай болж өндөрлөлөө. Энэхүү тэмцээнд манай улсаас Э.Тэмүүжин, Б.Нарантуяа, Б.Баттуяа, Э.Ариунцэцэг гэсэн шилдэг тамирчид өрсөлдсөн юм. Үүнээс ОУХМ Э.Тэмүүжин алтан медаль хүртэж, Монгол Улсаас билльярдын спортын анхны Ази тивийн аварга болсон. Түүний хувьд өмнө нь 2016, 2017 онд америк пүүл билльярдын өсвөр үеийнхний ДАШТ-ээс хошой мөнгөн медаль хүртэж байв. Ингээд 2024 оны снукер билльярдын УАШТ-ээс алтан медаль хүртсэн амжилттайгаар Доха хотыг зорьсон юм. Ази тивийн аварга Э.Тэмүүжингийн хувьд анх 12 настайгаасаа энэхүү спортоор хичээллэж эхэлжээ. Түүний анхны багшийг н.Батхүү гэдэг аж. Тэрээр билльярдаар хичээллэж эхэлсэн үеэсээ тогтмол амжилт үзүүлсээр ирсэн, Монголын өсөх ирээдүйтэй, шинэ, залуу тамирчны нэг юм. Тухайлбал, өсвөр үе болон насанд хүрэгчдийн тэмцээнд тогтмолт оролцож, удаа дараа шилдэг тамирчнаар тодрохын зэрэгцээ клубүүдийн тэмцээнд тасралтгүй тэргүүн болон шагналт байр шалгарсаар иржээ. Үүнээс гадна
Шилдэг тамирчин
Э.Тэмүүжингийн хувьд “Метропүүл” клубт харьяалагддаг ажээ. Тэрээр анх 2014 онд “Champions” клубийн цомын аварга болсон. Ингээд 2016 онд пүүл билльярдын насанд хүрэгчдийн улсын аваргын хоёрдугаар байрыг эзэлж байв. Э.Тэмүүжин 2015-2018 онд “SHINE POOL OPEN” шилдэг тамирчин шалгаруулах тэмцээний гурван удаагийн аварга болсон байдаг. Ийнхүү амжилтын буухиа нь үргэлжилсээр 2018, 2019 онд дараалан пүүл билльярдын өсвөр үеийн улсын аварга болжээ. Үүнээс гадна 2020 онд зургаан улаан цомын аварга шалгаруулах тэмцээнээс гуравдугаар байр, хүрэл медалийг авсан. Э.Тэмүүжин нь Монголын анхны билльярдын спортын мэргэжлийн тамирчин юм. Тиймээс ч өнгөрсөн онд Тайвань Улсын “FURY” брэндтэй таван жилийн 150 сая төгрөгийн гэрээг байгуулсан байдаг. Э.Тэмүүжин лигийн хамгийн залуу тамирчин бөгөөд түүний нэг цохиураар авсан хамгийн өндөр оноо нь 72 байгаа аж.
Эх сурвалж: “Зууны мэдээ” сонин
2024 ОНЫ АРАВДУГААР САРЫН 31. ПҮРЭВ ГАРАГ. № 31 (7455)
