32 жилийнхээ түүхийг бичиж буй Монголын өдөр тутмын ууган сонин  “Зууны мэдээ” 2023 оноо амжилт бүтээл арвин үдэж байна. Бид хамт олноороо сурч хөгжихөд цаг гаргасан, мэргэжлийн хувьд шат ахисан үр бүтээлтэй 365 хоногийг өнгөрүүллээ. 2023 онд хамт олноороо чадавхижих амжилтаа ахиулж Данийн Хэвлэлийн хүрээлэнтэй хамтран Данийн эрэн сурвалжлах сэтгүүлчээс багаараа бүрэн хэмжээний сургалт авсан. Түүнчлэн олон улсын төсөл хөтөлбөрт шалгаран уламжлалт сэтгүүл зүйг дижиталтай хослуулан шинэ цагийн цахим “Зууны мэдээ”  болох бэлтгэл ажлаа хангаж байна. Мөн шинээр санаачлан хэрэгжүүлсэн “Удмын бахархал”, “Хэвшмэл ойлголтоо өөрчилье” булангаараа ном хэвлүүлснээр манай хамт олон өөрсдийн бүтээлээрээ тав дахь номоо өлгийдлөө.  Түүнчлэн “Зууны мэдээ” сонин “Амьдралын тойрог”, “Leaderships forum”, “Удмын бахархал”, “Эгэл Монгол”, “Трэнд зочин”, “Төрийн хишигтэн”, “Нэгдүгээр хүн”, “Төрийн хүн” зэрэг тогтмол булангууддаа ховор сонирхолтой зочин урьж ярилцаж, мартагдсан өв соёлыг сэргээж, таниулах зорилгоор “Өв соёл” цуврал булангаас гадна Монгол бичгээр соён гэгээрлийн булан бэлтгэн өдөр бүр бичиж таниулсаар байна. 2023 он “Зууны мэдээ” сонины хамт олны хувьд шинээр сурч хөгжиж, санаачлан хэрэгжүүлсэн олон шинэ ажилтай, амжилт бүтээл дүүрэн жил боллоо. Тиймээс бид уламжлал ёсоор оны шилдэг бичлэгээ зарлаж байна. Бидэнд итгэж, үргэлж хамт байдаг захиалагчиддаа, сонины үнэнч уншигчиддаа баярлалаа.