Б.АЛТАНГЭРЭЛ
Урьдчилан хорих 461 дүгээр ангид нэг жил хоригдоод буй "ЭТТ" ХК-ийн захирал асан Б.Ганхуягийн эрүүл мэндийн шалтгааны талаар түүний гэр бүлээс мэдээлэл хийж, гомдол гаргаад байгаа билээ.
ШШГЕГ-аас хоригдогч Б.Ганхуягийн биеийн байдлын талаар мэдээлэл өглөө. ШШГЕГ-ын Хорих ял эдлүүлэх албаны дэд дарга хурандаа Ч.Нэргүй “Нийгэмд тэнцвэртэй мэдээлэл хүргэх үүднээс албан ёсны мэдээлэл өгч байна. Хорих 461 дүгээр ангид өнөөдөр 800 гаруй хоригдогч байна. Бүгдээрээ нэг гал тогооноос хоол ундаа идэж, уудаг. Хоригдогч Б.Ганхуягийн хувьд биенээс нь хүнцэл илэрсэн гэж ярьж байна. Энэ нь хүний биед тодорхой хэмжээгээр зайлшгүй байдаг химийн элемент”.
461 дүгээр хорих ангийн ерөнхий эмч, хошууч Г.Эрдэнэчимэг “Анх хоригдох үеийн эмчийн үзлэгээр биеийн байдал тогтвортой, амин үзүүлтүүд хэвийн, хэсэг газрын үзлэгээр хоёр хөлийн шилбэнд хуучин харшлын сорвитой гэсэн тэмдэглэлээр хүлээж авсан. Б.Ганхуягийг хоригдсон цагаас нь эхлээд хариуцсан эмчийн байнгын үзлэг хийлгэж, хяналтад байдаг. Тус эмнэлэгт гурван удаа хэвтэн эмчлүүлсэн. Мөн хорих 401 дүгээр нэгдсэн эмнэлэгт хяналтын комиссын шийдвэрээр лавлагаа, шатлалын эмнэлэгт таван сар, арван нэгдүгээр сард “Сонгдо” эмнэлэгт хэвтэн эмчлүүлж тусламж үйлчилгээ авсан.
Хоригдож байх хугацаанд хяналтын үзлэгт хамрагдаж, 14 хоног тутамд урьдчилан сэргийлэх үзлэг, эмчийн хяналтад байдаг байсан. Тус эмнэлэгт зургаан удаа лабораторийн шинжилгээ, гурван удаа багажийн шинжилгээнд хамрагдсан байдаг. Шинжилгээний хариуд эмгэг, өөрчлөлт илэрсэн зүйл байхгүй. Өнөөдрийн байдлаар Б.Ганхуягийн биеийн эрүүл мэндийн байдал зовуурьгүй, амин үзүүлэлт нь тогтвортой, шинжилгээнээс гарсан өөрчлөлт байхгүй байна.
Эмнэлгийн мэргэжлийн хэлтсийн дарга, хурандаа Ч.Лхамсүрэн "Хүнцэл гэдэг хүнд металлын элемент. Олон улсад болон манай улсад стандарт тогтоосон байдаг. Ундны усанд олон улсын стандартаар 0.05 мг/л хэмжээтэй, монгол улсад 0.01 мг/л хэмжээтэй байдаг. Нэг литр усанд ийм хэмжээгээр агуулагдаж байна гэсэн үг. Хүнсний бүтээгдэхүүн үр тариа, мах махан бүтээгдэхүүн, жимс хүнсний ногоо, сүү сүүн бүтээгдэхүүн, далайн бүтээгдэхүүнд стандарт хэмжээ байдаг. Хүний биед агуулагдах хэмжээ хэтэрвэл хордлого, хор болдог. Хүний биед хордлого учруулах хэмжээ нь 0.01-0.05 грамм, үхэлд хүргэх хэмжээ нь 0.06-2 гр байдаг.
Хүнцлийн хордлогод далайн бүтээгдэхүүн, вино дарс, навчин тамхи хэрэглэдэг хүмүүс илүү их өртдөг. Мөн харшил, арьсны өвчин, үрэвслийн өвчний үед хэрэглэсэн эм, тосон түрхлэг зэрэг нөлөөлөх боломжтой.
Лавлагаа шатлалын эмнэлгээс хийсэн шинжилгээний хариуг дамжуулаад авсан. Үүнд хүнцлийг үс, цус, шээсний дээжээс авсан. Цусанд 9.29 мг/л хэмжээтэй гарсан байна. Энэ нь Эрүүл ахуй хор судлалын лабораторийн шинжилгээ дээр лавлах хэмжээг ард нь бичиж өгөөгүй байна. Ямар ч шинжилгээнд лавлах хэмжээг тавьж өгөх ёстой. Мэргэжлийн бус хүмүүс ямар хэмжээтэй байгааг хэлж чадахгүй. 9.29 мг/л бол хэвийн байна гэсэн үг" гэв.
Эх сурвалж: www.zms.mn
