Б.АЛТАНГЭРЭЛ

Сэтгүүлч Н.Өнөрцэцэгийн өмгөөлөгчийн зүгээс "Нийслэлийн Сонгинохайрхан дүүргийн Эрүүгийн хэргийн анхан шатны шүүхийн ерөнхий шүүгч Чингэлтэй дүүрэгт хилийн хориг тавьсан шийдвэрийг хүчингүй болгосон. Өөрөөр хэлбэл, сэтгүүлч Н.Өнөрцэцэгт нийслэлийн Чингэлтэй дүүргийн хилийн хоригийг тухайн дүүргийн ерөнхий шүүгчид прокурор гомдол гаргаж, хүчингүй болгох ёстой байтал СХД дээр шийдвэрийг хүчингүй болгосон. Чингэлтэй дүүргийн шүүгчийн захирамж хүчинтэй юм уу, үгүй юм уу. Иймэрхүү процессын алдаа гарсан. Өмгөөлөгчдийн багийн зүгээс холбогдох арга хэмжээг авч, тодорхой ажлыг хийж байна.

Өмгөөлөгч н.Хонгорзул “Сэтгүүлч Н.Өнөрцэцэгт СХД-ийн ерөнхий шүүгчийн шийдвэрээр энэ оны арванхоёрдугаар сарын 4-ны өдөр цагдан хорих, таслан сэргийлэх арга хэмжээ авсан. Эрүүгийн хэрэг хянан шийдвэрлэх тухай хуулийн 29.3-т зааснаар эрх бүхий байгууллагын мөрдөн шалгах ажиллагаатай холбоотой мэдээллүүдийг өгөх боломжгүй байгаа. Сэтгүүлч Н.Өнөрцэцэгийн хувьд Эрүүгийн хуулийн 13.14 зүйлд заасны дагуу илт худал мэдээлэл тараах, гэмт хэргийн шинжтэй үйлдлийг гаргасан байж болзошгүй гэж таван хэрэгт мөрдөн шалгах ажиллагаа явуулж байна. Үүнээс Чингэлтэй дүүрэгт шалгагдаж байгаа нэг хэрэгт яллагдагчаар татах тогтоолтой танилцах процесст эрүүл мэндийн шалтгаанаар тухайн ажиллагаа дуусгавар болсон байдаг. Үлдсэн дөрвөн хэрэг дээр түүнийг яллагдагчаар татах тогтоолыг танилцуулаагүй.

Тэгэхээр таван хэргийн нэгт л яллагдагч болсон байна. Үлдсэн дөрвөн хэрэгт яллагдагчаар татагдаагүй. Тухайн хэргүүдийг нэгтгэж, яллах тогтоолыг өөрчилснийг тайлбарлах ёстой. Үүний дараагаар цагдан хорих үндэслэл үүснэ. Сэтгүүлч Н.Өнөрцэцэгийн үлдсэн дөрвөн хэргийг нь танилцуулаагүй байхдаа цагдан хорих шийдвэрийг гаргалаа. Ийм учраас бид Эрүүгийн хуульд заасан үндэслэл журмын дагуу шийдээгүй байна гэдэг байр суурийг илэрхийлж байна” гэв.

Эх сурвалж: www.zms.mn