Ч.ЗОТОЛ
Ардчилсан намын 4:11 мэдээллийн цагт тус намын дэд дарга Ч.Отгочулуу, бүлгийн зөвлөх Д.Ганбаяр нар оролцож, байр сууриа илэрхийллээ. Мэдээллийн эхэнд АН-ынхан шүүхийн тогтолцоо ялзарсан, Э.Бат-Үүлийг 38 хоног шүүхийн шийдвэргүйгээр саатуулж байна гэж мэдэгдэв.
Г.Ганбаяр: Э.Бат-Үүлийг 38 хоног шүүхийн шийдвэргүйгээр саатуулж байна
УИХ дахь АН-ын бүлгийн зөвлөх Д.Ганбаяр хэлэхдээ “2021 оны арванхоёрдугаар сарын 16-ны өдөр Чингэлтэй дүүргийн Эрүүгийн хэргийн анхан шатны шүүхээс Э.Бат-Үүлд дөрвөн жилийн хорих ял оноосон байдаг. Эрүүгийн хуулийг хянан шийдвэрлэх тухай хуульд "Шүүхийн шийдвэр гарсан цагаас хойш 15 хоногийн хугацаанд шүүхийн шийдвэрийг гардуулж өгнө" гэж заажээ. Чингэлтэй дүүргийн шүүх Э.Бат-Үүлд шүүхийн шийдвэрийг өгөлгүйгээр 409 дүгээр хорих ангид 53 хоног саатуулсан. Х.Баттулгын томилсон Улсын дээд шүүхийн шүүгч Х.Сонинбаяр АН-ыг самарч байна. Х.Сонинбаяр нь Ц.Туваан нарт найр тавьж, хууль журам зөрчсөнийг тогтоосон. Угтаа энэ мэдээллийн санд өөрчлөлт оруулахдаа Дээд шүүхийн хуралдаанаар хэлэлцдэг журамтай. Гэтэл УДШ-ийн Иргэний хэргийн шүүхийн тэргүүн Х.Сонинбаяр уг журмыг зөрчин холбогдох ажилтанд цохолтоор үүрэг өгөх замаар шийдвэрлэсэн. Түүнчлэн АН хоёр дарга, тамгатай дотроо хагаралтай байгаа мэтээр нийгэмд харагдуулж байна. Цаашлаад АН-ын нэр хүндийг унагаах ажлыг өнгөрсөн жилээс эхлэн тасралтгүй зохион байгуулсан. Тиймээс Х.Баттулгын захиалгыг гүйцэтгэсэн УДШ-ийн Ерөнхий шүүгч Д.Ганзоригийг Шүүхийн сахилгын хороонд өгч огцруулах хүртэл арга хэмжээг авна” гэлээ.
Ц.Отгочулуу: “Хөгжлийн банк” -нд эрх баригч намын бүлэглэл зодолдож байна
АН-ын дэд дарга Ч.Отгочулуу эдийн засагтай холбоотой цаг үеийн асуудлаар мэдээлэл хийсэн юм. Тэрбээр хэлэхдээ “Цагаан сарын өмнө төсөвт тодотгол хийж тэтгэвэр нэмсэн нь талархалтай. АН тэтгэвэр нэмэх шаардлагыг удаа дараа хүргүүлсээр ирснийг хэлэх хэрэгтэй. Сүүлийн жилүүдэд инфляци нийлмэл байдлаар 30-40 хувиар унасан. УИХ-ын гишүүд төсөвт тодотгол хийхдээ инфляци Засгийн газарт ашигтай гэж байсан. Инфляци урт хугацаанд ажилгүйдэл ядуурлыг авчирдаг уршигтай. Хөгжлийн банктай холбоотой асуудлаар хэдэн зүйл хэлэхэд, тус банкийг анх байгуулахдаа эдийн засгийн хатангиршлын эсрэг байгуулсан. Монголын эдийн засаг сүүлийн 10 жил арав гаруй тэрбум ам.доллар дээр гацчихаад байна. Хөгжлийн банкыг эдийн засгийг тэлэх гэж байгуулсан. Гэтэл одоо эрх баригч намын бүлэглэл хоорондын зодоон болж хувирлаа. Энэ зодоонд АН-ыг татан оруулж хэрүүлдээ хутгах шаардлагагүй. Бүгдийг нь бас харлуулж болохгүй. Жишээ нь, ам.долларын ханшийн уналтаас болж анх авсан зээлээсээ хэд дахин илүү зээлийг эргэн төлөөд алдагдлаа үүрээд явж байгаа зээлдэгч нар ч бий.Цагаан сарын өмнө Цар тахлын хуулийг 2022 он дуустал сунгасан. Энэ хууль түр батлагдахдаа ганцхан удаа зургаан сараар сунгаж болно гэж заасан. Гэтэл үүнээс хойш хэдэн ч удаа сунгагдав. Хуульд зааснаар Засгийн газар сар бүр УИХ-д ажлаа тайлагнах ёстой ч хэрэгжүүлдэггүй. Цар тахлаар далимдуулж асар өндөр алдагдалтай төсөв баталсан. Цар тахлыг далимдуулж төсвийн хулгай гаарч байна” гэв.
Эх сурвалж: “Зууны мэдээ” сонин
2022 ОНЫ ХОЁРДУГААР САРЫН 11. БААСАН ГАРАГ. № 30 (6762)
