Б.ГАРЬД
“...Орон нутгийн сонгуульд МАН яллаа” гээд л хөөрөөд байна. 2016 оны ялалтаасаа ухарчихсан. Найман аймаг “цэнхэртчихсэн” гэсэн дүн гарсан. Тэр утгаар нь яривал сонин л дүгнэлт гарна.
Түүчлэн “...Нийслэлд МАН яллаа. 45 суудлын 34-ийг нь авлаа” гээд л онгироод байна. Ингэхдээ “...Д.Сумъяабазар агуу удирдагч юм. Сонгуулийн стратегич гэдгээ харууллаа” гэсэн магтаал сонгуулийн дүн гарсан үдэш цахим орчинд нялайтал явлаа. Ингэж үзнэ гэвэл жинхэнэ дүн нь бас өөр болно.
НИТХ, дүүргүүдийн ИТХ-ын эцсийн дүнгээр МАН олонхи болсон. Энэ үнэн.
Гэхдээ УИХ-д 62 суудалтай, өмнөх Орон нутгийн сонгуулиар нийслэлд олонх болчихсон байсан суурь дээр “ноцолдох” шиг амархан юм гэж юу байх вэ дээ. Их яривал дориухан дарга 45 суудлыг бүгдийг нь чирээд л ирэхээр боломж юм шүү.
Мөн эрх баригч МАН-ын хувьд Нийслэлийн МАН-ын дарга Д.Сумъяабазарт эрх мэдлийг бол хангалттай өгсөн. МАН-аас НИТХ-д нэр дэвшсэн 45 хүний 35 нь Д.Сумъяабазарын хаягтай нөхдүүд байв. Ямар сайндаа л МАН-ын генсек Д.Амарбаясгалан, Нийслэлийн МАН-ын дарга Д.Сумъяабазар хоёр муудалцчихсан гэсэн яриа хүртэл гарч байх вэ дээ. Ил ийм мессеж явж байсан бол хөшигний ард МАН-ын удирдлагууд Д.Сумъяабазарт итгэл үзүүлсэн байжээ.
Тэгэхээр ялалт чухам хэнийх байсан бэ, ялсны гавьяаг хэн хүртэх ёстой вэ гэдгээ зөв хуваарилах ёстой юм.
Ямар ч байсан Нийслэлийн МАН-ын дарга Д.Сумъяабазарын ялалт бол биш. Сонгуулийн шөнө Д.Сумъяабазарыг “долооцгоосон” нь түүнтэй харилцах цаашдын харилцаагаа бодсон улстөрчдийн “пост” төдий зүйл юм. Магадгүй тэр хүмүүс өнөөдөр Д.Сумъяабазарын өрөөний үүдэнд сууцгааж байгаа байх.
Харин МАН-ын ялалт байгуулсан тойргууд дээр УИХ-ын гишүүд, дүүргийн намын дарга нар нь хар, шар аргуудаа тултал хийсэн. Гавьяа яривал тэр хүмүүсийнх гэсэн үг.
“Оргил” Ж.Ганбаатар гэхэд хурал чуулганаа таслан барин хэдэн өдөр гадаа зогссон. Хөөрхий минь, тэр түүний цагаан PR л даа. Гэхдээ тийм л юм болсон.
Хамгийн гол нэг зүйл бий. Нийслэлийн МАН нийслэлийн хамгийн гол дүүргийг алдсан. Олон сонгуульд “улайж” ирсэн , хэдхэн сарын өмнө УИХ-ын сонгуулиар МАН-ын нэр дэвшигчдийг цочирдтол дэмжиж байсан Сүхбаатар дүүргийнхэн Орон нутгийн сонгуулиар АН-ыг дэмжсэн.
Энэ бол Д.Сумъяабазарын л муугийнх. Үнэхээр л Нийслэлийн МАН-ын даргын эрэмбэтэй улстөрч, стратегич, агуу удирдагч юм бол Сүхбаатар дүүрэгт МАН ялах байсан.
Сүхбаатар дүүрэг бол Улаанбаатарын төв дүүргээс гадна жил хүрэхгүй хугацааны дараа 100 жилийн ойгоо тэмдэглэх гэж байгаа МАН-ын хувьд “өндөрлөг” нь байв. Энэ дүүрэг намынх нь үүсгэн байгуулагчаар нэрлэгдсэн юм.
Одоо МАН-ынхан 100 жилийнхээ ойгоор АН угшилтай Сүхбаатар дүүргийн дарга нараас Сүхбаатарын хөшөөнд цэцэг өргөх зөвшөөрлөө гуйна.
Ер нь бол Сүхбаатар дүүргийн хувьд МАН ихээхэн сулраад байсан. УИХ-ын сонгуулийн өмнө энэ дүүрэгт нэг насаараа нэр дэвшиж сонгогддог байсан Сү.Батболд дүрвээд хөдөө явчихсан.
Энэ жилийн давалгаа тус дүүрэгт нэр дэвшсэн Ц.Мөнх-Оргил, Д.Цогтбаатар, Ц.Мөнхцэцэг нарт тус болж сонгогдсон. Сү.Батболд энд алдаж тооцсон. Магадгүй, хаширлаад зугтсан байх.
Хамгийн гол нь Сүхбаатар дүүргийн МАН-ын хорооны дарга нь УИХ-ын гишүүн Д.Цогтбаатар гэж сул хүн бий. Хувь улстөрчийн хувьд мэдлэгтэй, эвтэйхэн имижтэй гэгддэг. Өөрөөр хэлбэл, тэр амиа л даасан улстөрч, харин лидер биш. Тэгэхээр Д.Цогтбаатартын дээд шатны удирдлага буюу Нийслэлийн МАН-ын дарга Сүхбаатар дүүрэгт тод байх ёстой байв. Гэвч Д.Сумъяабазар Сүхбаатар дүүрэгт ямар ч нөлөө үзүүлсэнгүй. Тэгэхээр Сүхбаатар дүүргийг алдана гэдэг Д.Сумъяабазарын муугийнх болж таарч байгаа юм.
Эх сурвалж: “Зууны мэдээ” сонин
2020.10.22 ПҮРЭВ № 204 (6429)
