Хэн нь хэн бэ?
Ө.СОНОР
Дэд сайд Д.Доржпүрэв гэж хэн бэ. Эрчим хүчний салбарыг М.Сономпилтэй хамт авч явах үүрэг хүлээсэн түүнийг улстөрчид, олон нийт хэрхэн таньдаг вэ. Үүнд “Хэн нь хэн бэ” булангаараа дамжуулан товчхон хариулахыг оролдъё. Тэрээр 1973 оны арваннэгдүгээр сарын 28-нд нийслэлийн октьябрын районд одоогоор бол Баянгол дүүрэгт төржээ. Гандангийн дэнжид тоглож өссөн тэрээр 1981-1987 онд нийслэлийн 22, 1991 онд 77 дугаар сургуулийг дүүргэж, 1994 онд Эдийн засгийн коллежийг банк, санхүүгийн эдийн засагч мэргэжлээр төгссөн, бизнесийн удирдлагын магистр зэрэгтэй гэж боловсролынх нь намтарт бичсэн байв. Харин улсад ажилласан жилийнх нь түүх гэвэл “Эрдэнэт” хот дахь “Хотш” банкинд эдийн засагч, “Финсервис”, “Би энд Жи Финанс ББСБ” компанийн захирал, “Дархан Сэлэнгийн цахилгаан түгээх сүлжээ” компанийн ТУЗ-ийн дарга, одоо Эрчим хүчний дэд сайд гээд дуусч байна. Түүнийг одоогийн дэд сайдын албан тушаалд суухад нэг зүйл туршлага болсон гэж үздэг юм билээ. “Дархан Сэлэнгийн цахилгаан түгээх сүлжээ”-нд очиж нэлээд өртэй байсан компанийг хоёрхон жилийн дараа ашигтай ажиллуулж чадсан онцгой менежменттэй залуу гэж ярих хүмүүстэй таарч байсан. Тэрээр Төв аймгаасаа хоёр ч удаа нэр дэвшээд УИХ-д орж чадалгүй өвдөг шороодсон юм. Харин орон нутгийн сонгуульд намаа удирдан амжилтад хүрсэн. Хэзээ ч ялж байгаагүй түүхэн ялалтыг Төв аймагт авчирсан гавъяа нь Д.Доржпүрэв дэд сайд болох шалтгаан байсан нь гарцаагүй. Цаад утгаар нь шагнал ч гэж хэлж болох юм шиг.
“Та хэзээ улс төрд орсон бэ” гэдэг асуултад тэрээр “2005 оноос хойш. Нэг сургуулийн Идэрцогт гэж залуу их нөлөөлсөн. Нийгмийн идэвхитэй, хувийн бизнес хийж байсан чам шиг хүмүүс улс төрд орох хэрэгтэй байна. Идэвхтэй дэмжигчээр яв гэлээ. Сонирхоод үзтэл өөрчилмөөр засвар хиймээр юм байгаад, саналаа гаргаж тавьж эхэлсэн. Намын дотоод ажилд оролцож яваад 2007 онд шийдвэр гаргаж 2008 оны сонгуульд нэр дэвшсэн. Дэмжлэг их, нөхцөл байдал сайн байсан ч үр дүн хүлээж байснаас тэс өөрөөр эргэсэн. Шинжлэх ухааны зарчмаар гаргасан тооцоо судалгаа бодит байдал дээр эсрэгээрээ байлаа. Шударга өрсөлдөөн ямар ч нөлөө үзүүлж чадаагүй. Шалгуулъя, харуулъя гэтэл тийм юм байхгүй гээд хаалга хаагдсан. Ийм байхад үнэнээр яваад үхэр тэргээр туулай гүйцнэ, иргэдийн дуу хоолой шударга юманд хүрнэ, жижиг дунд бизнес эрхэлж амьдралаа дээшлүүлнэ, хөгжинө гэдэг яриа байж болох уу. Үүнийг л өөрчилье гэж зорьсон” хэмээн хариулж байжээ. Тэгэхээр улс төрд орсон гэх тэр цагаасаа хойш сонгуульд өөрөө нэг ч удаа ялж үзээгүй боловч, намынхаа ялалтын буянаар дэд сайд болох аз нь гийсэн болж таарч байгаа юм.
Орон нутгийн сонгуульд Төв аймагт АН ялсны дараа Засаг даргаар хэнийг тавих тухайд нам дотроо бөөн юм болсон гэдэг. Өнгөрсөн сонгуулиар аймгийн ИТХ-ын төлөөлөгчдийн 18-д МАН, 20-д нь АН ялж Засаг даргаа тавих болжээ. Уг нь УИХ-ын дэд дарга асан До.Ганболд Засаг дарга болох байх гэтэл Д.Доржпүрэв наагуур, цаагуур гүйж Хорпүрэв болоод өөрийн хүн болох Б.Баярбатыг томилсон гэдэг юм. Гэтэл шинэхэн Засаг дарга нь тамга тэмдгээ авсан өдрөө архи ууж, агсам согтуу тавиад эрүүлжүүлэхэд орсон тухай үлгэр шиг юм өнөөг хүртэл Төв аймгийнхны ярианы сэдэвт байдаг юм.
Д.Доржпүрэвийн тухай ерөнхийдөө иймэрхүү. Зэр зэвсэг сонирхдог /буудлагын спорт шүү/, бүжигт дуртай /“Улаан сарнай” хамтлагийн гишүүн байсан/ гэж түүний энэ хоббиг нэрлэж болох юм билээ. Ямар боловч улс төрд мань хүн нэлээд хорчин ажиллагаа явуулдаг гэсэн. Харин одоохондоо эрчим хүчний салбарт ямар гавъяа байгуулсныг нь хэлж мэдэхгүй юм. Мэдэх хугацаа нь ч арай болоогүй байх л даа.
