С.УРТНАСАН
20 гаруй жил үйл ажиллагаагаа явуулж байгаа “Иргэдийн шударга шүүх” ТББ их хурлыг зохион байгуулах талаараа мэдээлэл хийлээ. Энэ талаар тухайн байгууллагын тэргүүн, хуульч Х.Батялалт: “Манай байгууллага монгол хүнийхээ эрхийг хамгаалж, хөгжүүлье, нэгтгэе гэсэн тодорхой зорилгоор үйл ажиллагаагаа явуулдаг. Бид үндсэн хуулийн талаар л ярьдаг. Тиймээс Үндсэн хуулийн хүрээнд төр засагтаа хяналт тавьдаг байя Монголчуудаа гэж уриалъя. Монголчууд хүний эрхийг хамгаалах тухай ярихад өөрөө өөрийгөө хамгаалах чадваргүй нь харагддаг. Тийм ч учраас “Иргэдийн шударга шүүх” ТББ-аас “Үндсэн хуулийн дугуйлан” төслийг санаачлан хэрэгжүүлж эхэлсэн байдаг. Энэ төслийн зорилго ард иргэдэд хууль тогтоомжийг энгийн, хялбар байдлаар таниулан сурталчлах, хүн бүр хуулийн хэм хэмжээг ижил тэгш дагаж, мөрддөг болох, хуулийн зөв хэрэглээг дадал болгох цаашлаад Улаанбаатар хотыг эв нэгдлийн бүс болгох зорилтыг дэвшүүлж байсан.
Дараагийн яригдах асуудал нь 90-ээд онд зах зээл чөлөөт эдийн засагт шилжиж өөрчлөлт шинэчлэлт хийгдэхэд хуулийн зохицуулалтгүй өөрсдийн бор зүрхээр явдаг хэсэг хүмүүсийг гаргаж ирсэн. Тэр нь одоогийн төрөл бүрийн худалдаа наймаа эрхэлдэг 300 мянга гаруй худалдаа эрхлэгчид юм. Тэдний эрхийг хамгаалах эрх зүйн тогтолцоо манай улсад байдаггүй. Сүүлийн үед эдгээр хүмүүс ажлын байраа алдах, өнгөрсөн 30 жилийн хугацаанд тогтоосон уламжлалт худалдааны хэв маяг өөрчлөгдөж олгархиуд жирийн худалдаачны өрсөлдөх боломжгүй бөөний барааны төвүүдийг нээх зэрэг хөдөлмөрийн орчинд хүндрэл учрах асуудлуудтай тулгарч байна” гэж байлаа.
“Иргэдийн шударга шүүх” ТББ-аас “Монголын худалдаачдын холбоо” гэх холбоог байгуулсан бөгөөд холбоо мөн л худалдаачдын эрхийг хамгаалж, хөгжүүлэх, нэгтгэх зорилтыг өмнөө тавьсан байна. Тавдугаар сарын 29-ны өдөр Төрийн ордонд зохион байгуулагдах Их хурлаар худалдаа эрхлэгчдийн бүтэц зохион байгуулалтыг өөрчлөн шинэчилж, шинээр гишүүд дэмжигчдээ улс орон даяар нэгтгэх зорилгын хүрээнд ажиллана гэж байлаа.
Эх сурвалж: zms.mn
