Бямбагэрэлийн БАЯРЖАВХЛАН
“Зууны мэдээ” сонины энэ удаагийн “Start-Up” буландаа эмийн ургамлаас зөгийн бал гаргаж авдаг “Бат-Эм” компанийн захирал Ж.Энхтуяатай намрын ногоон өдрүүд үзэсгэлэн худалдааны үеэр уулзаж ярилцсан юм.
-Танай зөгийн бал цайвар шаргал өнгөтэй юм. Эмийн ургамлаас гаргаж авдаг учраас тэр үү?
-Сайн байна уу. Ашиг орлого арвин байна. Бид намрын ногоон өдрүүд үзэсгэлэн худалдаанд оролцохоор Дорнод аймгийн Халх гол сумаас ирсэн. Манайх зөгийн балаа хоёр төрлийн ургамлаас гаргаж авдаг. Зүрхний эмэнд ордог тэмээн сүүл болон байгалийн олон цэцэгсээс бал гарган авч байна. Тэмээн сүүл нь цагаан цэцэгтэй бутлаг ургамал байдаг. Тиймээс зөгийн бал цайвар шаргал өнгөтэй, эмийн амттай гардаг.
-Яагаад Халх гол суманд зөгийн аж ахуй эрхлэх болов?
-Манай нөхөр Дорнодын халх гол суманд төрж өссөн. Зундаа гэр бүлээрээ Халх гол суманд очдог байсан. Зөгийн балыг зүрхний эмэнд ордог ургамлаас гаргаж авдаг гэдэг нь миний сонирхлыг татсан. Тиймээс бид 2018 онд байгаль сайтай газар аж төрж, гэр бүлийн аж ахуйн ажил эрхлж амьдрахаар шийдэж, тэр нутагт суурьшиж байлаа. 2019 оноос “Бат-Эм” компаниа байгуулан зөгийн бал үйлдвэрлэж эхэлсэн. Дорнод аймгийн Халх гол сум нь балт, ногоон ургамал сайтай газар. Тиймээс сайн зөгийн бал гардаг. Мөн Тэмээн сүүл гэдэг ургамал нь зөвхөн Халх голд ургадаг. Тиймээс энэ ховор ургамалд тулгуурлан зөгийн аж ахуй эрхэлж байна.
-Таныг зөгийн аж ахуй эрхлэхэд юу нөлөөлсөн бэ?
- Өмнө би Дорнод аймгийн Чойбалсан суманд нягтлан бодогч хийж байсан. Завгүй, ачаалалтай ажиллахаас гадна гэр бүлдээ цаг, зав гаргах нь ховор байлаа. Тиймээс гэр бүлээрээ бизнес хийе гэж шийдсэн. Зөгийн аж ахуй эрхлэх нь санхүүгийн хувьд албаны ажлаас илүү мөнгө олох боломжтой гэж тооцоолсон.
-Танайхтай ижил эмийн ургамлаас зөгийн бал гаргаж авдаг газар бий юу?
-Хувь хүмүүс байж магадгүй. Яг манайх шиг сав, баглаагаа шийдээд жилийн дөрвөн улиралд бүтээгдэхүүн үйлдвэрлэж байгаа газар одоохондоо байхгүй.
-Сав баглаа боодлоо загварлагаар шийдсэн байна. Хаанаас авч байна?
-Зөгийн балын шилээ хятад улсаас худалдаж авч байна. Харин даавуун торыг хөгжлийн бэрхшээлтэй иргэдээс захиалж авдаг. Хэрэглэгчид маань сав баглаа боодолд ач холбогдол өгдөг болжээ. Одоогийн шилэн сав болон уутанд сэтгэл хангалуун байгаа харагддаг.
-Үйл ажиллагаагаа эрхлээд зургаан жил болжээ. Анх эхэлж байсан үеэ бодвол үйл ажиллагаа нь нэлээд өргөжсөн гэж байна?
-Халх голд нүүж очоод байгаа мөнгөөрөө зөгийн нэг бүл худалдан авч байлаа. Харин одоо 10 ажилтантай 100-н гэр бүл зөгийтэйгөөр үйл ажиллагаа явуулж байна. Жилдээ 2-3 тонн зөгийн бал хурааж “Баатар” нэртэй зөгийн балаа тогтмол үйлдвэрлэдэг болсон. Мөн сахиатай бал, жили, тоосонцор, халбага, даавуун тор гэх мэт олон төрлийн бүтээгдэхүүн гаргаж байна. Анх ойр хавийн хүмүүстээ жимсний чанамалын шилэнд хийж худалддаг байсан бол одоо гэрээтэй дэлгүүрүүддээ худалдаж байна.
-Орон нутагт бизнес эрхлэх давуу болон сул талаас дурдвал?
-Орон нутагт үйл ажиллагаа эрхэлж буй аж ахуй нэгжийг төрөөс дэмжиж татварын хөнгөлөлтөд хамруулж байна. Мөн ажил хийх хүмүүс олдох нь сайн байдаг. Мөн зам тээвэр дэд бүтэц сайн хөгжсөн учир Улаанбаатар хотод борлуулахад ч хүндрэл бага болсон. Тодруулбал, манайх Халх голын баатар зөгийн бал цахим хаягаараа Улаанбаатар хотод хүргэлтээр бүтээгдэхүүнээ худалддаг.
Эх сурвалж: “Зууны мэдээ” сонин
2023 ОНЫ ЕСДҮГЭЭР САРЫН 26. МЯГМАР ГАРАГ. № 191 (7176)
