З.БАТЦЭЦЭГ
Америкийн дуучин Тина Тернер 83 насандаа таалал төгссөн тухай Sky News мэдээлэв. Түүнийг рок-н-роллын хатан хаан гэж нэрлэдэг байсан ба уран бүтээлчийн карьер нь 60 гаруй жил үргэлжилсэн бөгөөд олон арван хит дуу, сая сая борлогдсон цомогтой юм.
Т.Тернер 2013 онд иргэншлээ авсан Швейцарийн Кюснахт дахь гэртээ нас баржээ. Амьдралынхаа сүүлийн жилүүдэд Тернер эрүүл мэндийн олон асуудалтай тулгарсан. 2016 онд гэдэсний хорт хавдартай гэж оношлогдож, 2017 онд бөөр шилжүүлэн суулгах мэс засал хийлгэсэн. Тэрээр 2018 онд хэвлэгдсэн "Миний хайрын түүх" номонд бусад ноцтой өвчний талаар ярьсан байдаг.
Дуучин нас барсан тухай мэдээлэлд түүний ойр дотныхон нь “Дэлхий ертөнц хөгжмийн домог, үлгэр дуурайл болсон хүнээ алдлаа” гэж хэлсэн байна. Анна Мэй Буллок (жинхэнэ нэр) 1939 онд Теннесси мужид төрсөн бөгөөд хүүхэд байхдаа гэр бүлийнхээ хамт орон нутгийн талбайд хөвөн түүдэг байсан тухай дурсамждаа дурджээ. Эцэг эх нь түүнд хайргүй байсан гэж тэр нь хожим нь ярьсан байдаг.
Тэрээр бага насныхаа ихэнх хугацааг эмээтэйгээ өнгөрөөсөн бөгөөд эмээгээ нас барсны дараа л тэр үед Сент-Луис руу нүүсэн ээжтэйгээ эргэн нийлжээ. Анна Мэй Буллок Теннесси мужид сургуулийн найрал дуунд дуулж эхэлсэн байна. Сент-Луис хотод 16 настай охин хөгжимчин Айк Тернерийг Kings of Rhythm хамтлагтаа өөрийг нь гоцлол дуучинаар авхыг ятгажээ. Тэрээр B.B. King-ийн “Би чамд хайртай” дууг дуулжээ. Түүний хоолойг биширсэн Айк Тернер охиныг хамтлагт аваад, тун удалгүй болзож эхэлсэн бөгөөд түүнд Тина Тернер хэмээх нэр өгөөд зогсохгүй, хэрэв хамтлагаасаа гарвал нэрийг нь өөр дуучинд шилжүүлж болох үүднээс тэр даруйдаа нэрэнд нь патент авчээ.
Айк, Тина Тернер нарын анхны бичлэг болох A Fool in Love 1960 онд гарсан бөгөөд АНУ-ын чартуудын эхний 30-д багтаж байжээ. Дараагийн таван жилийн хугацаанд хосууд хэд хэдэн нэлээн амжилттай R&B сингл гаргаж, Kings of Rhythm хамтлагтай хамтран аялан тоглолт хийсэн. "The Big T.N.T" концертын шоуд тоглосны дараа Тина Тернер улс даяараа алдартай болж, 1967 онд Rolling Stone сэтгүүлийн нүүрэнд гарсан анхны эмэгтэй, анхны хар арьст дуучин болжээ. 1969 онд The Rolling Stones-ийн Америкт хийсэн аялан тоглолтонд оролцсоноор түүний алдар нэр бүр мөсөн баталгаажсан бөгөөд 1970-аад оны эхээр Proud Mary, I Want to Take You Higher, Nutbush City Limits, Sexy Ida зэрэг хэд хэдэн хит дуунуудаа гаргасан. Гэсэн хэдий ч амжилтыг Айк Тернерийн байнгын хүчирхийлэл дагалдаж байв.
1970-аад оны дундуур кокайнд донтох, Тинаг байнга зодоод зогсохгүй үргэлж хуурдаг асуудал нь дуучинг нөхрөөсөө салахад хүргэв. Тэрээр бие даасан карьераа эхлүүлсэн боловч Айктай хийсэн дуэт аялан тоглолтоо цуцалсны улмаас их хэмжээний өрөнд орж, телевизийн шоунууд болон Лас Вегас дахь концертуудаараа амьжиргаагаа залгуулахаас өөр аргагүйд хүрчээ. 1980-аад оны эхээр Тернерийг хуучин уран бүтээлч гэж үздэг байсан бөгөөд түүний өмнөх арван жилийн рок дива дүр төрх нь хуучирсан мэт харагдаж байв. Гэсэн хэдий ч 1984 онд Private Dancer цомог гарсны дараа "What's Love Got to with It" хэмээх супер хит дуугаараа поп дүрийн шинэ дүр төрхтэй болж, чартуудын тэргүүлж чадсан юм.
1980-аад оны хоёрдугаар хагаст Тернер дэлхийн хамгийн том поп оддын нэг болсон.
Түүний намтар, “Би Тина” бол хамгийн түрүүнд Айк Тернерийн хүчирхийлэл, хар тамхины донтолтоос ангижрах тухай өгүүлсэн бестселлер байсан. Тернер Холливудын алдрын гудамжинд одтой болсон бөгөөд түүний дараагийн цомог бүр хэдэн арван сая хувь борлогджээ.
1980-1990-ээд онд Тернерийн цэнгэлдэх хүрээлэнгээр хийсэн аялан тоглолтууд сая сая үзэгчдийн анхаарлыг татсан. "Томми", "Галзуу Макс 3", "Сүүлчийн үйл ажиллагааны баатар" зэрэг Холливудын хэд хэдэн кинонд тоглосон. Тина Тернер 12 Грэммийн шагнал хүртэж, 100 сая гаруй цомог борлуулж, Рок-н Роллын алдрын танхимд Айк Тернертэй хамт болон соло уран бүтээлчээр хоёр удаа орсон.
Түүний амьдарлаар “Хайр юу хийж чаддаг вэ?” кино хийж, гол дүрд А.Бассет тоглосон. Үүний дараа киноны өрнөл, Тернерийн дуунууд нь Бродвэйд амжилттай тоглогддог ижил нэртэй мюзиклийн үндэс суурийг тавьсан юм.
Эх сурвалж: www.zms.mn
