Т.САЙХАН
Ерөнхий сайд Л.Оюун-Эрдэнэ өчигдөр Баян-Өлгий аймгийн Баяннуур суманд ажиллаж, “Эрдэнэбүрэнгийн усан цахилгаан станц” төслийн явцтай танилцлаа. Эрдэнэбүрэнгийн усан цахилгаан станц ашиглалтад орсноор баруун бүсийн аймгуудын эрчим хүчний хэрэглээг дотоодоосоо бүрэн хангах боломжтой болох юм.
Эрчим хүчний салбар хараат байдлаас гарна
Засгийн газраас “Шинэ сэргэлтийн бодлого”-д дэвшүүлсэн Эрчим хүчний сэргэлтийн хүрээнд сэргээгдэх эрчим хүчний эх үүсвэрүүд, түүний дотор усан цахилгаан станцыг нэн тэргүүний зорилт болгож, 90 мегаваттын Эрдэнэбүрэнгийн усан цахилгаан станцын бүтээн байгуулалтыг дуусгаж, 220 мегаваттын Эгийн голын усан цахилгаан станцыг эхлүүлэхийн төлөө бүх боломжоо дайчлан ажиллаж буй. Эрчим хүчний салбараа хараат байдлаас гаргах, шинэ эх үүсвэрүүд барих, өсөн нэмэгдэж байгаа хэрэглээгээ дийлэхгүйд хүрсэн энэ салбарын үйл ажиллагааг нөхөж сэлбэх асуудал Монгол Улсын хувьд нэгдүгээрт байна. Энэ салбарт дэм болгож байгуулах хэд хэдэн станцын нэг нь яах аргагүй баруун бүсийн эрчим хүчний ачааг үүрэлцэх Эрдэнэбүрэнгийн усан цахилгаан станц юм. Салбарын хараат байдлыг засаж арилгахад энэ станц том хувь нэмэр үзүүлнэ гэдгийг Ерөнхий сайд Л.Оюун-Эрдэнэ онцлов.
Ерөнхий сайдын 2021 оны 06 дугаар сарын 24-ний өдрийн 112 дугаар захирамжаар төслийг хэрэгжүүлэх ажлыг шуурхай зохион байгуулахад дэмжлэг үзүүлэх ажлын хэсгийг Эрчим хүчний сайдаар ахлуулан холбогдох аймгийн Засаг дарга нар, яамдын газар хэлтсийн дарга нарыг оролцуулан байгуулсан.
Ажлын хэсэг нь төсөлд дэмжлэг үзүүлэх асуудлаар хоёр удаа хуралдсан бөгөөд төслийн нөлөөлөлд өртөж буй айл өрх, соёлын өвийг нүүлгэн шилжүүлэх ажлыг зохион байгуулах төлөвлөгөөг батлан хэрэгжүүлж байна.
Цагааннуур боомт 30 тэрбум төгрөгийн орлого төвлөрүүлжээ
Мөн Ерөнхий сайд Л.Оюун-Эрдэнэ өчигдөр Баян-Өлгий аймгийн Ногооннуур сумын нутагт байрлах Цагааннуур боомтын үйл ажиллагаатай танилцлаа.
Засгийн газрын 2021 оны 155 дугаар тогтоолоор Баян-Өлгий аймгийн нутаг дэвсгэрт байрлах авто замын Цагааннуур боомтыг 24 цагийн байнгын ажиллагаанд шилжүүлсэн.
Цагааннуур боомтоор ОХУ-аас баруун аймгуудын хэрэглээний нефть болон хүнсний бүтээгдэхүүн, малын тэжээл, бусад бараа бүтээгдэхүүнийг импортлон оруулж ирдэг. Үүнд шатах тослох материал 60 хувь, малын тэжээл 15 хувь, хүнсний зүйл болон бусад бараа материал 25 хувийг эзэлж байна.
Тус боомтын хувьд байнгын ажиллагаатай болсноос хойш зорчигч болон ачаа тээврийн эргэлт эрс нэмэгдэж энэ онд улсын төсөвт 30 гаруй тэрбум төгрөгийн орлого төвлөрүүлжээ.
Засгийн газраас дэвшүүлсэн “Шинэ сэргэлтийн бодлого”-ын Боомтын сэргэлтийн хүрээнд Баян-Өлгий аймгийн Цагааннуур боомтыг 24 цагийн үйл ажиллагаатай болгон өргөтгөсөн бол одоо олон улсын транзит хурдны зам барих, хилийн боомтыг хатуу хучилттай авто замаар холбох ажил хийгдэж байгаа юм байна.
Цагаануур-Улаанбайшинт чиглэлийн 27.8 км автозамын ажил өнгөрсөн жилээс эрчимжиж ирэх наймдугаар сард ашиглалтад орохоор хүлээгдэж байна. Энэ зам ашиглалтад орсноор Монгол Улсын импортын ачаа тээврийн хэмжээ нэмэгдэхээс гадна ОХУ, БНХАУ-ын хооронд манай улсын нутаг дэвсгэрээр дамжин өнгөрөх транзит тээврийн олон улсын нэг том гарц бий болох юм. Энэ үеэр
Ерөнхий сайд Л.Оюун-Эрдэнэ "Манай Засгийн газраас дэвшүүлсэн “Шинэ сэргэлтийн бодлого”-ыг хөгжлийн хурдасгуур гэж ойлгож болно. Зургаан том зорилт дэвшүүлсний нэг нь Боомтын сэргэлт. Манайх далайд гарцгүй улс учраас бүх боомтоо авто замаар, Алтанбулаг, Замын-Үүдийг хурдны замаар холбохоос гадна шинээр 5-6 төмөр замын экспортын томоохон гарц гаргах зайлшгүй шаардлагатай. Энэ хүрээнд төмөр замын төслүүд хэрэгжээд явж байна. Бид өнөөдөр ес дэх боомт дээр ажиллаж байна. Энэ нь боомтын ажилтай биечлэн танилцахаас гадна хоёр хөршдөө ач холбогдол өгч буйн илэрхийлэл гэж ойлгож болно. ОХУ, БНХАУ-ын Засгийн газартай хамтарсан томоохон коридоруудын төслүүд нэлээн урагштай явж, үйл ажиллагаа нь эрчимжиж байна. Бид боомтуудаа авто болон төмөр замаар аль болох хурдан холбож байж тээвэр ложистикийн өрсөлдөх чадвар дээшилнэ.
Ингэснээр экспорт нэмэгдэж, эдийн засаг тэлнэ. Баруун аймгийнхан бензин шатахуунаас эхлээд хүнсний бордоо зэрэг голлох стратегийн бүтээгдэхүүнээ авдаг боомт бол Цагаан нуур. Баруун бүс нутаг хөгжиж өрсөлдөх чадвар дээшлэхийн хэрээр нийслэл Улаанбаатар хотын түгжрэл багасах, төвлөрөл саарах зэрэг олон талын ач холбогдолтой. “Шинэ сэргэлтийн бодлого”-ын хүрээнд экспортын таван төмөр замын гарц бий болгохоор төлөвлөн ажил эхэлсэн. Ирэх жилдээ багтаад эхэлсэн төмөр замууд ашиглалтад орчихвол манай улсын түүхэнд байгаагүй, өрсөлдөх чадвар, үсрэнгүй дэвшил, том гарц болно. Мянганы замын төслийг эхлүүлээд 21 жилийн дараа энэ жил дуусгасан. Одоо орхиод байсан боомтууддаа анхаарна" гэлээ.
Эх сурвалж: “Зууны мэдээ” сонин
2022 ОНЫ ДОЛДУГААР САРЫН 18. ДАВАА ГАРАГ. № 135 (6867)
