М.ОЮУНТҮЛХҮҮР
Наран өглөөний 05:29 цагт мандсанаар Улаанбаатарт шинэ өдөр айлчлан ирлээ. Шинэхэн долоо хоногийн эхлэлд нээлтээ хийж буй “Өглөөний гудамж”-ийг сурвалжлахаар Гутлын 22-ыг зорилоо. Өнгө алаглуулан будсан барилгууд гадаадын оронд буй мэт шинэлэг мэдрэмжийг төрүүлнэ. Өглөөний цэнгэг агаар, эртэч монголчуудын дулаан инээмсэглэл, бүүдгэр тэнгэр өнөөдрийн өнгө ажээ.
“Жишиг гудамж” болгох зорилготой уг “Өглөөний гудамж”-ийг Нийслэлийн Засаг даргын тамгын газраас эртэч улаанбаатарчуудад зориулан бүтээжээ. Өглөө эртлэн босдог өглөөний хүмүүст үүсдэг асуудлууд болох үсчин, гоо сайхан, олон үндэстний хоол, дэлгүүр, кофе шоп гэсэн үйлчилгээ нэг дор төвлөрсөн байна. Энэ гудмаар дамжуулан олон төрлийн соёлыг бий болгох, түгээн дэлгэрүүлэхийн төлөө ажиллах юм.
Өглөөний 06:00-09:00 цаг хүртэл ажиллах ба даваа, лхагва, баасан гарагт онцлог үйл ажиллагаанууд зохион байгуулахыг “Өглөөний гудамж” төслийн санаачлагчид онцолж байлаа.
“Өглөөний гудамж” төслийн талаар “MGC Star GROUP” ХХК-ийн захирал, төслийн удирдагч С.Батмөнхтэй ярилцсан юм.
- “Өглөөний гудамж” төслийн талаар уншигчдад мэдээлэл хүргээч?
-Өглөөний гудамж бол Улаанбаатар хотын ажил хэрэгч, эртэч, урлагт дуртай, эрүүл амьдралын хэв маягийг эрэлхийлэгч хүмүүст зориулсан гудамж юм. Цаашид бид уран бүтээлчид, артистуудтай хамтарч төрөл бүрийн арга хэмжээ, сонирхлын клубууд, бизнесийн бүлгүүдийн уулзалтуудыг тогтмол зохион байгуулахаар төлөвлөж байна. Долоо хоног бүрийн даваа, лхагва, баасан гарагт идэвхжүүлэлтийн арга хэмжээ зохион байгуулна. Арга хэмжээнүүд бизнес, урлаг, эрүүл амьдралын хэвшил гэсэн гурван зарчмын хүрээнд байна. Эртэч хүмүүс бизнес уулзалтаа хийх, дасгал хөдөлгөөн хийх, уран бүтээлчдийн үзэсгэлэнг тогтмол гаргах, залуус урлагийг сонирхох, ААН-үүдийг дэмжих боломжийг бий болгосон. Энэ төслөөр дамжуулан хүмүүст өглөө эрт босох жишгийг бий болгох, “өглөөний цай”-ны соёлыг сурталчилах зорилготой.
- “Өглөөний гудамж” амралтын өдрүүдэд үйл ажиллагаа явуулах уу?
- Амралтын өдрүүдэд ажиллана. Онцлог нь гэвэл, даваа лхагва баасан гарагуудад тогтмол арга хэмжээнүүд болно.
- Хувь хүн, байгууллагууд хамтарч үйл ажиллагаа эрхлэх боломжтой юу?
- Төрөл бүрийн үйл ажиллагаа явуулах сонирхолтой клубууд, аж ахуйн нэгжүүд, спорт урлагийнханд нээлттэй. Бид бүхэнтэй холбогдоод, хамтарч ажиллаж болно. Жишээ нь, фитнесс клубынхан ирж өөрсдийн танилцуулга үдэшлэгийг хийж өөрсдийгөө сурталчилах боломжтой.Хүүхдүүдэд зориулсан спорт клубууд, төрөл бүрийн бизнесийн networking арга хэмжээг зохион байгуулах боломжтой.
“Өглөөний гудамж”-нд явагдаж буй олон үйл ажиллагаан дундаас нэгэн зүйл зөрөн өнгөрөх хүмүүсийн анхаарлыг эрхгүй татаж байв. Энэ бол усан будгаар сүндэрлэх “уран зураг” юм.
“UB Art festival” олон улсын дүрслэх урлагийн наадмыг энэ жил зохион байгуулахаар ажиллаж байна. Энэ наадмын хүрээнд “Өглөөний гудамж”-наас усан будгийн симпозиумын эхлэлийг эхлүүлж байгаа бөгөөд “Монголын усан будгийн нийгэмлэг”-ийн уран бүтээлчид “Өглөөний гудамж”-ийг зурж эхэлж байна. Энэ үйл ажиллагаанаас цаашдын олон үйл ажиллагааны эхлэлийг тавихаар төлөвлөсөн” хэмээн “UB Art festival”-ийн зохион байгуулагч дурдсан юм.
Өглөөний гудамжны онцлох цэг “MOTHER” EXHIBITION
Нүд хужирлах олон бүтээн байгуулалтын нэг нь “Ээж” үзэсгэлэн байлаа. Үзэсгэлэнгийн эзэн Б.Солонго нь зохиолч мэргэжилтэй. Зураачаар мэргэжлийн сургуульд сураагүй ч, бага ахуй цагаас зурж эхэлжээ. Энэ үзэсгэлэн нь 2019 онд Занабазарын музейд бүтнээрээ гарсан. Тэрбээр зөөлөн баримлын төрлийн бүтээлүүдээ голлон дэлгэсэн байна. “Ээж” үзэсгэлэнгээ өөрийн номын хамт гаргасан бөгөөд эдгээр бүтээлийг хийхийн тулд Монголын уламжлалт хээ угалз, наамал зэргийг судлахад их хугацааг зарцуулсан ажээ.
Ястангуудын наамал нь эрэгтэй эмэгтэй, нөхөрт гарсан, ганц бие гэсэн олон хүний онцлогийг тусгадаг. Зарим бүтээлийг маань хүмүүс “Савдагнууд” хэмээн нэрийдэж байна. Эдгээр бүтээлийг байгалийн чулуу, мод зэргээр олон зүйлийг бэлгэдэж хийсэн” хэмээн ярьсан юм.
Энэ төсөл дээр ажиллаж буй олон залуусын төлөөлөл болсон “Гэрэлт гудамж”-ийн санаачлагч, “Өглөөний Улаанбаатар” төслийн зөвлөх О.Билгүүн:
-Эртэч улаанбаатарчууддаа өглөөний мэнд хүргэе. “Өглөөний гудамж” цар тахлын нөхцөл байдалд тулгуурлан өөрсдийн болон иргэдийн аюулгүй байдлыг хангах үүднээс “soft opening” байдлаар буюу албан ёсны зарлалгүйгээр, хоёр талын үзэсгэлэн гаргаж, зураачдыг урьж, өнөөдөр нээлтээ хийж байна. Улаанбаатарт өглөөний амьдрал хараахан байдаггүй. Шинээр нээгдэж байгаа “Өглөөний гудамж” маань иргэдийн эрүүл мэндэд их ач холбогдолтой. Өглөө эрт сэрнэ, дасгал хөдөлгөөн хийнэ, орой эрт унтана, наашаа ирэхийн тулд яардаг болно, ажлаа эрт эхэлнэ гэдэг нь маш чухал. Гэртээ өглөөний цайгаа бэлдэх боломжгүй хүмүүс маань өдрийнхөө энергийг авангаа хооллох бүрэн боломжтой болж байгаа юм. Өглөөний гудамж зөвхөн нийслэлд төдийгүй орон нутагт ч “жишиг гудамж” болоосой хэмээн зохион байгуулагч бидний зүгээс хүсч байна. Энэ хүмүүст тусламж дэмжлэг шаардлагатай бол бид бүхэн нээлттэй байгааг уламжилмаар байна. Та бүхэн соёлтой байж, эерэгээр үйлчлүүлэхийг хүсье. “Өглөөний Улаанбаатар” уриан дор хамгийн зөв зүйлүүдийг энд нутагшуулах болно” гэлээ.
Өглөөний гудмаар нүд дүүрэн инээн холхих залуусын цуваа тасрахгүй. Тэд эртэч бас жишиг залуус…
Эх сурвалж: “Зууны мэдээ” сонин
2021.8.3 МЯГМАР № 150 (6627)
