Д.ЧИМЭГ
Төрийн өмчит болон төрийн өмчийн оролцоотой хуулийн этгээдийн өнгөрсөн оны санхүү, эдийн засгийн үзүүлэлтийг Засгийн газрын хуралдаанаар өчигдөр танилцуулав. Нийт компаниудын 72 хувь нь өнгөрсөн жил ашигтай ажиллажээ. Зарим компаниуд алдагдалтай ажиллаж байгаа шалтгаан нь эрчим хүчний үнийг төрөөс зохицуулдаг, орон нутагт цахилгаан, дулаан үйлдвэрлэх үнэ өртөг өндөр, хэрэглэгч цөөн зэргээс үүдэлтэйг албаныхан тайлбарлав. Тухайлбал, Увс, Ховд, Өмнөговь, Говь-Алтай, Шарын гол, Налайх, Багануурт үйл ажиллагаа явуулж буй эрчим хүчний 10 компани алдагдалтай ажилласан аж. Төрийн өмчит компаниуд 2017 онд долоон их наяд төгрөгийн орлого олж, 859 тэрбум төгрөгийн цэвэр ашигтай ажилласан байна. Энэ нь өнгөрсөн оны мөн үетэй харьцуулахад орлого 1.6 их наяд төгрөгөөр цэвэр ашиг 2.6 дахин нэмэгдсэн нь эдийн засгийн үр ашиг, санхүүгийн чадавх сайжирсныг харуулж буйг албаныхан онцоллоо. Түүнчлэн өнгөрсөн оны ногдол ашиг төвлөрүүлэлт 2016 оны гүйцэтгэлтэй харьцуулахад 2.9 дахин нэмэгджээ. Мөн өглөг 2017 онд өмнөх оноос 15.1 хувиар буюу 700 тэрбум төгрөгөөр буурсан байна. Ийнхүү төрийн өмчит хуулийн этгээд ашигтай ажиллахад захирлуудтай хийх гэрээг нэг жил болгосон, тендерийг нээлттэй явуулах зорилгоор цахим хэлбэрт шилжүүлсэн нь нөлөөлж буйг онцлон тэмдэглэв.
Эх сурвалж: "Зууны мэдээ" сонин
