Б.БАРС
92 жилийн тэртээ Францын Альпийн нуруунд орших 2000 оршин суугчтай Шамони суурингаас өвлийн олимпийн наадмын түүх эхэлжээ. 1924 оны нэгдүгээр сарын 25-нд Шамонид Олон улсын олимпийн хорооноос “Парист болох олимпийн VII наадамд зориулсан өвлийн спортын долоо хоног” тэмцээн зохион байгуулсан нь дэлхий даяар олон нийтийн анхаарлыг татсан аж. Иймээс ч Олон улсын олимпийн хороо дараа жил нь Прагад болсон их хурлаараа өвлийн олимпийн наадмыг тогтмол зохион байгуулахаар шийдвэрлэж, Шамонигийн тэмцээнийг анхны цагаан олимп гэж албан ёсоор зарласан байна. Анхдугаар өвлийн олимпод спортын есөн төрөлд 16 орны 293 тамирчин, үүний дотор 13 эмэгтэй 16 багц медалийн төлөө өрсөлджээ. Тус бүр гурван алтан медаль хүртсэн Норвегийн цаначин Торлев Хауг, Финландын тэшүүрчин Клас Тунберг Шамонигийн тэмцээний гол баатруудаар тодорсон байдаг.
1755 он
Оросын нэрт эрдэмтэн М.Ломоносовын идэвхтэй оролцоотойгоор Москвагийн улсын их сургууль байгуулагджээ. Тэр цагаас хойш М.Ломоносовын нэрэмжит тус их сургууль өргөжин хөгжсөөр дэлхийн нэр хүндтэй, томоохон их сургуулиудын нэг болсон юм.
1832 он
“Ойн хаан” нэр авсан Оросын алдарт байгалийн зураач И.Шишкин мэндэлжээ. Тэрээр эх орныхоо байгалийн сайхныг магтан дуулсан “Тариан талбай”, “Нарсан ой дахь өглөө” гэсэн зургаараа дүрслэх урлагийн түүхэнд мөнхөрчээ.
1843 он
Германы хөгжмийн зохиолч Ф.Мендельсон В.Шекспирийн “Зуны шөнийн зүүд“ жүжигт зориулан “Хуримын марш” гэдэг аяз зохиожээ. Үүнээс 15 жилийн дараа Английн хатан хаан Викториа Пруссийн хунтайж Фридрихтэй гэрлэх ёслолоор мартагдсан “Хуримын марш”-ийг эгшиглүүлсэн гэдэг. Тэр цагаас хойш Европ маягийн хуримын ёслолын салшгүй нэг хэсэг нь Ф.Мендельсоны “Хуримын марш” болсон аж.
1882 он
Английн нэрт зохиолч эмэгтэй Виржиниа Вулф мэндэлжээ. XX зууны эхний хагасын модернист уран зохиолын гол төлөөлөгчдийн нэг болсон түүний “Хатагтай Дэлловэй”, “Орландо” зэрэг роман дэлхийд алдаршжээ.
1938 он
Оросын домогт дуучин, жүжигчин, яруу найрагч В.Высоцкий төржээ.
1942 он
“Хар ирвэс” гэж алдаршсан Португалын алдарт хөлбөмбөгчин Феррейра да Силва Эйсебио төржээ. Тэрээр 1965 онд Европын шилдэг хөлмбөгчний “Алтан бөмбөг”, 1968, 1973 онд Европын шилдэг мэргэн буучийн “Алтан шаахай” шагналыг авч байсан билээ.
1949 он
АНУ-ын баруун Европыг сэргээн босгох “Маршаллын төлөвлөгөө”-ний хариу болгож ЗХУ, Болгар, Польш, Румын, Унгар, Чехсловак улс Эдийн засгийн хамтран туслалцах зөвлөлийг байгуулжээ. Тус зөвлөлд хожим Албани, БНАГУ, БНМАУ нэгдэн орсон юм.
2011 он
Египетийн нийслэл Каирт, улмаар тус улсын бусад хотод Засгийн газрын эсрэг олон хүн оролцосон жагсаал цуглаан болж эхэлжээ. Ард иргэдийн эсэргүүцлийн хөдөлгөөний улмаас мөн оны хоёрдугаар сард Египетийг 30 жилийн турш тасралтгүй удирдсан Хосни Мубарак огцорчээ.
Эх сурвалж: “Зууны мэдээ” сонин
