Энэ жил махны нөөц бүрдүүлэх, үнийг тогтвор­жуулах дэд хөтөлбөр хэрэгжүүлсний үр дүнд үнийг хөөсрүүлэхгүй байх боломж бүрдсэн тухай албаны эх сурвалж хэлж байлаа. Нөөцийн махыг “Хүчит шонхор” зах, “Хар­хорин”, “АСА” цирк, “Мишээл экспо”, “Бэлх зах”, Оргил худалдааны төвөөр бөөнөөр худал­даалж байгаа бол жижиг­лэнгээр 10 гаруй цэгт үйлчилж байгаа аж. Энэ удаад жижиглэж савласан махны хувьд үхрийн мах 5900, хониных  5700, ямааных 4600 төгрөгөөр, гулууз болон өрөөл мах худалдаж авбал үхрийн мах 5700, хонь 5200, ямаа 4200 төгрөгөөр тус тус худалдаанд гаргаж байна. “Хүчит шонхор” захад өчигдөр өглөөний байд­лаар бөөнөөр худалдаалж буй хонины ястай мах 5200-5300, үхрийнх 5500-6300, ямааных 3800-4500 төгрөг байсан бол адууны мах 4100-4300 төгрөг бай­лаа. Харин жижиглэнгээр худалдаалж буй хонины ястай махны үнэ 6350, цул нь 7200, үхрийн ястай мах 7700, цул 8500, ямаа болон адууны мах 5400-5700 төгрөгийн үнэтэй байв. Харин худалдаачдын бор­луулж буй шинэ мах нь харьцангүй үнэтэй байсан. Энэ үеэр Баянзүрх дүүр­гийн иргэн С.Цэцэг “Өн­гөрсөн долоо хоногийн энэ үед үхрийн цул мах 7800 төгрөгийн ханштай бай­сан. Баяр ойртох бүр юмны үнэ өсдөг нь заншил болжээ” гэлээ. Албаныхан үнэ буурч байгаа гэх боловч иргэд өсч байгааг дуулгаж байлаа. Эндээс цаасан дээрх тоо, бодит амьдралд үйлчилдэг үнэ хоёрын ялгааг харж болох юм. Харин “Хүчит шон­хор” худалдааны төвийн худалдагч Б.Цэрэн “Бид ченжүүдээс авсан үнээс 100 төгрөг хардаг. Өнгө­рөгч жилийг бодвол үнэ харьцангүй тогтвортой байна. Цагаан сар өнгө­рөөд гүйлгээ муудаад эхэл­дэг болохоор энэ болом­жийг л ашиглаад махаа дуусгах санаатай байна” гэв. Мах хэрэглэгчийн гарт хүртлээ 3-4 дамждаг гэлцдэг. Энэ удаад өглөө­ний 07.00 цагийн байд­лаар малчид өөрсдөө ху­дал­даачдад махаа бор­луулж байгаа харагдлаа.