Б.УРАН
Монголын үйлдвэрчний эвлэлийн холбооноос хүнсний бараа, бүтээгдэхүүний үнэ ханшид хийсэн судалгааг өчигдөр танилцууллаа. Энэ нь сүүлийн нэг сарын хугацаанд хийсэн судалгаа аж. Тэд үнийн өсөлтийг огт үндэслэлгүй гэж үзэж байгаагаа хэлээд “галзуурсан үнэ ханш” гэж тодорхойллоо. Өөрөөр хэлбэл, судалгаагаар өргөн хэрэглээний бараа, бүтээгдэхүүний үнэ 3-45 хувиар нэмэгдсэн дүн гарчээ. Тодруулбал, өнгөрсөн нэг сарын хугацаанд дотоодын гурил гурван хувь, орос гурил 12 хувь, хонины цул мах таван хувь, үхрийн цул мах 15 хувь, шар будаа 12 хувь, төмс, хүнсний ногоо 5-45 хувийн нэмэгдэлтэй байгааг тус байгууллагын мэргэжилтнүүд тогтоосон гэв. Хэрэв цаашид шатахуун, гол нэрийн барааны үнэ ийнхүү өссөөр байвал хөдөлмөр нийгмийн зөвшлийн гурван талт хэлэлцээрт заасанчлан цалин хөлс, тэтгэвэр тэтгэмжийг нэмэгдүүлэх асуудлыг хөндөхөөс аргагүй гэж МҮЭХ-ныхон мэдэгдэж байна. Тиймээс хэлэлцээрээр хүлээсэн үүргээ биелүүлэх шаардлагыг Засгийн газарт хүргүүлэх болсноо мэдэгдлээ. Мөн манай улсын хөдөлмөрийн хөлсний доод хэмжээ 140400 төгрөг байгаа ч зарим салбарт энэ хэмжээг нэмэгдүүлээд байгаа гэнэ. Тухайблбал, Эрдэс баялаг, эрчим хүчний салбарт 224640 төгрөг, барилгын салбарт 182520 төгрөг, эрүүл мэндийн салбарт 182520 төгрөг, автотээврийн салбарт 210600 төгрөг болон тогтжээ. Тиймээс хөдөлмөрийн хөлсний доод хэмжээг нэмэх нь зүйтэй гэж хэвлэлийн хурлын үеэр мэдэгдлээ.
