Б.ИРЭЭДҮЙ
АНУ-ын “Deep Space Industries” сансраар металлын олборлолт явуулах дэлхийн анхны компани байгуулснаа албан ёсоор зарлаж, төлөвлөгөөгөө танилцуулжээ. Тус компанийг үндэслэн байгуулагчдын нэг, гүйцэтгэх захирал Рик Тумлинсон “Манай компани задгай сансарт ажлаа явуулж тэндээс ховор металл олборлох зорилготой байна. Задгай сансрын жижигхэн чулуун биетийг өрөмдөж, тэндээс хэрэгтэй зүйлээ авна. Үүний тулд сансрын биетийг ямар бүтэцтэй, ямар сүүлт од, солирлын хэлтэрхий болохыг тогтооно” гэв.
Энэ төслүүд нь 2016 оноос эхлэх бөгөөд Рик Тумлинсон сансрыг эх дэлхийгээс илүү баялаг хэмээн онцолсон байна.
Рик Тумлинсон “Хэдхэн жилийн өмнөөс технологи асар хурдацтай хөгжих болсон. Бид шинэ технологи, нарийн программуудын ачаар сансарт үйл ажиллагаагаа амжилттай явуулна гэдэгт итгэлтэй байна. Сансрын биетээс гадна ойролцоогоор 1000 гаруй жижиг гаригт хүн төрөлхтөн очих боломжтой” гэжээ.
Түүний ярьснаар сансар бидний мэдэхгүй, хүн төрөлхтөнд асар их хэрэгцээтэй эрчим хүчний шинэ бөгөөд хямд эх үүсвэрээр баялаг аж. “Deep Space Industries” компанийн төсөлд “Google”-ийн Ларри Пэйж, Эрик Шмитд, кино найруулагч Жэймс Камерон болон техник технологийн гигантууд хамтран ажиллахаар төлөвлөсөн байна.
