Төсвийн хэвшмэл сэтгэлгээг халсан төсөл

ZMS.MN

22 цаг

1 мин унших

Ц.МЯГМАРБАЯР

Уламжлалт “донор-хэрэгжүүлэгч” гэсэн хэвшмэл сэтгэлгээнээс салж, илүү итгэлцэлд суурилсан, тэгш эрхтэй харилцааг бий болгох боломжтой төсөл хөтөлбөрүүдийг хэрэгжүүлэх нь чухал болжээ. Гадаад орнуудаас манай улсад өнгөрсөн 30 гаруй жилийн хугацаанд олон зуун тэрбум доллар, еврогийн төсөл хөтөлбөрийг хэрэгжүүлж үр дүнгээ өгснийг тоочоод барамгүй. Гэхдээ аливаа хандив, буцалтгүй тусламж, хөрөнгө оруулалтын төслийг хэрэгжүүлэхдээ хэмнэлттэй зарцуулахаас илүүтэй үргүй зардал гаргаж төслийг үр дүнгүй болгодог хэвшил тогтсон гэдгийг үгүйсгэх аргагүй. Ялангуяа буцалтгүй тусламжаар ирсэн хөрөнгө, мөнгийг хуваарилах нэрээр төслийн нэгж байгуулж, байр түрээслэх, гадаад зөвлөх авчрах, цалин зэргээр бусад олон үр дүнгүй урсгал зардлуудыг нэмэгдүүлж мэдээлэлд ойр байсан эрх мэдэл бүхий эрхмүүд ямар ч хяналтгүйгээр зарцуулсныг тоочвол олон баримт сөхөгдөнө. Бүр гадаадын хөнгөлттэй зээл тусламж, хандив, төсөл хөтөлбөрийг монголчууд хэрэгжүүлбэл “10 хувийн цавчаа” явагддаг гэсэн яриа хүртэл гарсан байдаг. Үүнийгээ донор орнуудын тусламж гэж нэрлэж энэ нь одоогийн халамжийн сэтгэлээг бий болгоход бас нөлөөлсөн байх магадлалтай гэдгийг зарим эдийн засагчид хэлдэг. Тэгэхээр одоо “донор хэрэгжүүлэгч” орон гэсэн сэтгэлгээг халж буцалтгүй төсөл хөтөлбөрийг илүү үр дүнтэй хэрэгжүүлж ил тодоор тайлагнах нь тухайн улсын Засгийн газруудын нэг ёсны соёл болох ёстой аж. Үр дүнд суурилсан төсөвлөлт нь үндэсний төсөв боловсруулах үйл явцыг урт болон дунд хугацааны стратеги төлөвлөгөөтэй илүү уялдуулахад чиглэсэн дэлхийн улс орнуудын Сангийн яамдын хэрэгжүүлэхийг зорьж буй шинэчлэлийн нэгэн чиглэл болоод байгаа аж.

Тусламжийг хүргэх хамгийн үр дүнтэй хэрэгсэл бол төсвийн дэмжлэг

Аливаа тусламжийг хэрэгцээтэй хэсэгт хүргэхэд төсвөөр дамжуулан хүргэх нь илүү үр дүнтэй болохыг Европын холбооноос манай улсын Засгийн газар хооронд хэрэгжүүлсэн 50.8 сая еврогийн буцалтгүй тусламж юм.