Б.Нандин

АНУ-ын ерөнхийлөгч Дональд Трамп ОХУ-ын ерөнхийлөгч Владимир Путинтэй мягмар гаригт утсаар ярина гэдгээ өнгөрсөн ням гаригт сэтгүүлчдэд мэдээлсэн. Тэрээр “Бид энэ дайныг зогсоох ёстой. Хэтэрхий олон хүн амиа алдаж байна шүү дээ” хэмээн ерөнхийлөгчийн хөлөглөдөг “AirForce1” онгоцонд байхдаа ярилцлага өгчээ.

В.Путинтэй ямар асуудлаар голлон ярилцах тухай асуусан сэтгүүлчийн асуултад Трамп “Бид  газар нутгийн талаар болон цахилгаан эрчим хүчний асуудлуудыг ярилцана гэж бодож байна” гэсэн байна.

Өнгөрсөн долоо хоногт АНУ-ын санал болгосон гал зогсоох 30 хоногийн хэлэлцээг Украины тал хүлээж аваад байгаа бөгөөд зарим тодорхой нөхцлүүдийг тавьсан. Мөн ОХУ-ын ерөнхийлөгч албан ёсоор байр сууриа илэрхийлээгүй ч ярилцах тодорхой асуудлууд олон байна. Тохиролцож чадвал дэмжих боломжтой тухайгаа зарим эх сурвалжид мэдээлээд байгаа.

Д.Трампын Орос Украины асуудал хариуцсан  тусгай элч Стив Уиткофф өнгөрсөн долоо хоногт В.Путинтэй хэлэлцээ хийхээр Москвад очсон юм. Харин бямба гарагт АНУ-ын Төрийн нарийн бичгийн дарга Марко Рубио, ОХУ-ын Гадаад хэргийн сайд Сергей Лавров нар гал зогсоохтой холбоотой дараагийн үе шатны асуудлуудыг хэлэлцсэн бололтой.