Б.Нандин

АНУ-ын Ерөнхийлөгч Дональд Трамп мягмар гарагт Канадын ган, хөнгөн цагаанд ногдуулахаар төлөвлөж байсан 25 хувийн татвараа хоёр дахин нэмэгдүүлж 50 хувьд хүргэх тухай мэдэгдэв. Тэрээр үүнийг Канадын Онтарио мужаас АНУ-д нийлүүлж буй цахилгааны үнийг 25 хувиар нэмж эхэлсэн шийдвэрийн хариу хэмээн нийгмийн сүлжээнд жиргэсэн юм. Харин үүнээс хэдхэн цагийн дараа Онтарио муж АНУ-ын гурван мужид цахилгаан эрчим хүчний экспортын татвараа бууруулах шийдвэрээ мэдэгдсэнээр Трамп нэмэлт 25 хувийн татвараа цуцлахаар болжээ. Ийнхүү нэг өдөрт Канадын ган болон металь бүхий бараа бүтээгдэхүүнд тавих татварын талаар хоёр өөр шийдвэрийг АНУ-ын ерөнхийлөгч гаргав.

Онтариогийн захирагч Даг Форд, АНУ-ын Худалдааны сайд Ховард Лутник нарын хамтарсан мэдэгдэлд дурдсанаар, Форд пүрэв гарагт Вашингтонд очиж, Лутниктэй уулзаж, хоёр орны бараа бүтээгдэхүүнд харилцан татвар ногдуулах эцсийн хугацаа ирэх сарын 2-нд болохоос өмнө талууд тохиролцох нь зүйтэй хэмээн үзсэн байна.