М.АРИУНЖАРГАЛ

Жил бүрийн гуравдугаар сарын 1-7-ны хооронд төрийн өмчийн бүх музей иргэдэд үнэ төлбөргүй үйлчилж “Музейн нээлттэй өдрүүд” арга хэмжээг зохион байгуулдаг. Харин энэ жил Монголын уламжлалт Цагаан сарын баяр давхцаж буйтай холбоотойгоор уг арга хэмжээний хугацааг сунгаж, гуравдугаар сарын 7-13-ны өдрүүдэд зохион байгуулжээ. Энэ удаад "Бүсчилсэн хөгжил ба эх оронч үзэл" сэдвийн хүрээнд үйл ажиллагаагаа өрнүүлж байгаа юм.

Энэ талаар Боловсролын ахлах аргазүйч Б.Үлэмж: “Музейн нээлттэй өдрүүд”-ийн хүрээнд Чингис хаан Үндэсний музейд дөрөв хоногийн хугацаанд 4000 гаруй хүн зочилсон бөгөөд тэдний 2000 гаруй нь хүүхэд байлаа.

Музейн тухай хуулийн 9.1-д Монгол Улсын харьяат 0-16 насны хүүхэд музейн үзүүллэгийн танхимаар үнэ төлбөргүй үйлчилгээг өдөр бүр үзүүлдэг учраас, нээлттэй өдрүүдийн үеэр музейн ачаалал хэт ихэсдэг тул бага насны хүүхдээ музейд дагуулж ирэх нь хүүхдийн эрүүл мэнд, аюулгүй байдалд сөрөг нөлөөтэй юм. Олон нийтэд энэхүү мэдээлэл дутмаг байгаагаас болж хүүхдүүд халдварт өвчний эрсдэл өндөр энэ үед хүйтэнд удаан хүлээх зэрэг асуудал гарч байна.

Музей үзэх нь зөвхөн сонирхох төдий зүйл биш, харин түүх, соёлын томоохон танин мэдэхүйн орчин юм. Тиймээс үзэгчдэд зориулан музейн эрхлэн гаргасан ном, судалгааны бүтээлүүдийг танилцуулж, түүх, археологийн чиглэлээр суралцаж буй оюутнуудад сан хөмрөгөө нээлттэй үзүүлж байна. Музейн шилэн хоргонд байрлуулсан үзмэрүүдээс гадна олны өмнө тэр бүр дэлгэдэггүй ховор нандин үзмэрүүд бий. Энэ удаад тэдгээр үзмэрүүдийг олон нийтэд танилцуулж байгаа нь онцлог юм.

Иргэдийг “Музейн нээлттэй өдрүүд”-ийн үеэр болон бусад үед музейг зорин ирж, түүх соёлын өвийг судлах, сонирхохыг уриалж байна гэв.

Эх сурвалж: zms.mn