М.АРИУНЖАРГАЛ

Түймрийн нөхцөл байдлын талаар ОБЕГ-аас мэдээлэл өглөө.

Гал түймэртэй тэмцэх газрын дарга, хурандаа Ц.Нямбаяр “Түймэр унтраасны дараа хохирлыг тогтоохоор сум орон нутгуудад ажиллаж байна. Урдчилсан байдлаар 170 орчим га түймэрт өртөж, 38 гэр, 4 чингэлэг, 4 автомашин, 2 мотоцикл, 48 хашаа саравч, 3706 бог, 48 бод мал, 3500 орчим боодол өвс шатсан. Түймэр унтраасан Онцгой байдлын бүлгүүд анги байрлалдаа буцлаа. Одоогоор Сүхбаатар аймгийн Эрдэнэцагаан, Асгат суманд гарсан түймрийг бүрэн унтраахаар ажиллаж байна. 2025 онд цас бага орсон учраас хаврын хуурайшилт эрт эхэлж байгаа. Одоо түймрийн эрсдэлтэй 14 аймаг байна. Тиймээс хөдөө орон нутагт зорчих иргэд, тэнд үйл ажиллагаа явуулж байгаа хүмүүс, амьдарч буй иргэд, мөн нийслэлийн иргэд ч түймэр гарч болзошгүй жижиг гэлтгүй зүйлд онцгойлон сонор сэрэмжтэй байхыг анхааруулъя” гэв.

Эх сурвалж: zms.mn