Базарбямбын НЯМСҮРЭН
БНЭУ-ын ICCR байгууллагын урилгаар тус улсад айлчилж байгаа Монгол Улсын гурав дахь Ерөнхийлөгч Н.Энхбаяр тус улсын томоохон их сургуулиудын нэг Ж.Неругийн их сургуульд зочилж, лекц уншлаа. Түүний лекцийг сонсохоор Дели хотын их сургууль болон Ж.Неругийн нэрэмжит их сургуульд сурч буй монгол оюутнууд зорин ирсэн бөгөөд тус сургуульд багшилдаг монголч эрдэмтэн судлаач, профессор багш нар зэрэг хүндэт зочид байлцав. БНЭУ-ын анхны ерөнхий сайд Ж.Неругийн нэрээр нэрлэгдсэн тус сургуульд манай улсаас Л.Өлзийт профессор ажилладаг юм байна. Түүний аав нэрт эрдэмтэн Чой.Лувсанжав олон жилийн өмнө Энэтхэгт суралцаж байсан бол хүү нь өдгөө Ж.Неругийн нэрэмжит сургуульд монгол судлалын тэнхим байгуулахыг зорин ажиллаж байгаа юм. Мөн профессор Л.Өлзийтөөс гадна магистрын хөтөлбөрт Ж.Неругийн нэрэмжит их сургуульд одоогоор нэг оюутан сурч байгаа. Харин нийслэл Дели хотын их сургуульд арав гаруй оюутан сурдаг аж.
Ерөнхийлөгч асан Н.Энхбаяр Монгол Улсын буддын шашны хөгжилд Энэтхэгийн оруулсан хувь нэмэр, Монголд хөгжсөн буддын шашны онцлог зэрэг сонирхолтой сэдвээр лекц уншсан. Ялангуяа манай улсын бурхан шашны томоохон зүтгэлтнүүд эрт дээр үеэс Жагарын орон гэгддэг Энэтхэгт ирж суралцдаг байсан. Өдгөө ч олон залуучууд болон залуу лам нар тус улсад суралцаж байна.
Манай улсын буддын шашны хөгжилд томоохон үүрэг гүйцэтгэсэн, Энэтхэг Монголын харилцаанд онцгойлон ханддаг байсан Бакула Ренбүүчигийн талаар гурав дахь Ерөнхийлөгч Н.Энхбаяр дурсан ярьж байлаа. Тэрбээр Бакула Ренбүүчийг амьд ахуй цагт ихэд хүндэтгэн, дотно сайхан харилцдаг байсан юм.
Амритсар сурч буй монгол оюутнуудтай уулзжээ
БНЭУ-д зочилж буй Монгол Улсын гурав дахь Ерөнхийлөгч Н.Энхбаяр Амритсар хотод байрлах LPU их сургуулийн кампуст зочилж, тус сургуульд сурч буй монгол оюутнуудтай уулзлаа. Энэтхэгийн шилдэг 20 сургуулийн нэгд тооцогддог LPU их сургуульд 11 монгол оюутан суралцаж байна. Тэдний олонх нь мэдээллийн технологи, инженер, санхүү, нягтлан бодох мэргэжлүүдийг сонгожээ. Монгол Улсын Ерөнхийлөгчийн “Илгээлт 2100” тэтгэлгээр суралцаж буй эдгээр оюутнууд нь Улаанбаатар хотоос гадна Хөвсгөл, Архангай, Говь-Алтай, Ховд аймгуудаас иржээ. Одоогоор 11 оюутан сурч байгаа бөгөөд ирэх намраас гурван оюутан нэмэгдэнэ гэдгийг Монгол Улсаас БНЭУ-д суугаа Элчин сайд Д.Ганболд хэлж байлаа. Тэрбээр өмнө нь хэд хэдэн удаа ирж, сургуулийн удирдлагуудтай уулзаж, монгол оюутнууддаа тусалж дэмжиж байдаг нь тэдний дотно уулзалтаас нь харагдаж байв. “Эх орноосоо хол байгаа иргэддээ ах дүү шиг элгэмсэг хандах нь Элчин сайд бүрийн үүрэг шүү дээ” хэмээн Д.Ганболд сайд хэлж байлаа. Монгол Улсын гурав дахь Ерөнхийлөгч Н.Энхбаяр болон Элчин сайд Д.Ганболд нар залуучууддаа хандаж эх орныхоо нэрийг өндөрт өргөж цаашид Монголоос ирэх дүү нартаа үлгэр дуурайлал үзүүлж хичээлдээ шамдаж сайн суралцахыг захьсан. Мөн хичээлээ хийж, мэргэжлээ эзэмшихийн зэрэгцээ усанд сэлэлтээр заавал хичээллэх, хинди хэл сурах, олон улсын оюутан залуучуудтай нөхөрлөж, өөрсдийгөө бүх талаас нь хөгжүүлэхийг ч онцгойлон хэлж байлаа.
Улсдаа төдийгүй дэлхийн хэмжээнд дээгүүрт эрэмбэлэгддэг LPU буюу Lovely professional university-д дэлхийн 65 орны 50 орчим мянган оюутан 150 гаруй мэргэжлээр суралцаж байна. Тиймээс ч тохилог анги танхим, тоног төхөөрөмжийг бүрэн хангаснаас гадна сургуулийн орчин, ногоон байгууламж, спорт заал, талбай бүхий цогцолбор байгуулжээ. Олимпийн стандартыг хангасан усан бассейн, буудлагын спортын танхим, сагсан болон хөл бөмбөгийн иж бүрэн талбай зэргийг байгуулж оюутан залуусыг чөлөөт цагаа зөв өнгөрүүлж, суралцах таатай нөхцлийг бүрдүүлж чадсан байна.
Тиймээс ч эндэхийн оюутнууд усанд сэлэлтийн амжилтаар улсдаа тэргүүлдэг төдийгүй арав гаруй Олимпийн медальтан энэ сургуулиас төрөн гарчээ.
Эх сурвалж: “Зууны мэдээ” сонин
2023 ОНЫ НАЙМДУГААР САРЫН 10. ПҮРЭВ ГАРАГ. № 157 (7142)
