Б.Балжинням найруулагчийн мэндэлсний 80 жилийн ой, түүний бүтээсэн “Мөнх тэнгэрийн хүчин дор” түүхэн уран сайхны киноны 30 жилийн ой энэ онд тохиож байна. “Кино найруулагч Бэгзийн Балжинням сан” сангаас аравдугаар сарын 17-оос 24-ний ойн арга хэмжээг зохион байгуулахаар болжээ. Тус сан нь 2021 оны арванхоёрдугаар сард байгуулагдсан бөгөөд Төрийн шагналт, урлагийн гавъяат зүтгэлтэн нэрт кино найруулагч Б.Балжиннямын монголын кино урлагт оруулсан хувь нэмэр, уран бүтээлийг судлах, сурталчлан таниулах, түүний бүтээсэн урлаг соёлын их өвийг хойч үедээ өвлүүлж, нэрийг нь мөнхлөх зорилготой ажиллаж байна.
Кино найруулагч Б.Балжиннямын мэндэлсний 80 жилийн ойн арга хэмжээг Соёлын яам, Архивын ерөнхий газар, Монголын Үндэсний Кино Урлагийн Академи, Монгол Арт галерей, Чингис Фильм ХХК, ЭсТи студи, СинеАрт студи ГАММА фото агентлаг, КУДС, СУИС, РТМУДС, Зохиомж – БСЭЗДС, ЖИКОМ пресс ХХК, МҮОНРТВ, UBS ТВ, NEWS.MN, СЭНГЭРАГИ арт галерей дэмжин зохион байгуулж байна.
Үүнээс гадна ОХУ-ын Эрхүү хот дахь Монгол Улсын Ерөнхий Консулын газар, Саха Якут Улсын Гадаад харилцааны яам, Улс үндэстний найрамдлын Ордон, Монгол -Саха Нийгэмлэг зэрэг байгууллагууд Монголын киноны өдрүүдийг зохион байгуулахаар ажиллаж байгаа юм.
Тус сан нь ойрын ирээдүйд хийх маш олон арга хэмжээ төлөвлөж байгаа бөгөөд заримаас нь дурьдахад Б.Балжинням найруулагчийн нэрэмжит шагнал бий болгох, Улсын төв архивт Б.Балжиннямын сан хөмрөг үүсгэх, киноны дээд сургуулийн нэг оюутны төлбөрийг жил бүр хариуцах гэх мэт олон ажил хийхээр төлөвлөжээ.
