Б.ДОЛЖИНЖАВ
Залуу уран бүтээлчдийн нэгдлээс “Алтан бийр” олон улсын үзэсгэлэнг 16 дахь жилдээ уламжлал болгон энэ сарын 05-наас 19-ний хооронд зохион байгуулж байна. Энэ жил нийт 109 залуу уран бүтээлчийн бүтээл оролцсоноос 80 гаруй бүтээлийг сонгон энэ үзэсгэлэнд дэлгэж нийтийн хүртээл болгож байна.
Залуу уран бүтээлчдийн нэгдэл нь Монголын дүрслэх урлагийн салбар бүрийг орхигдуулахгүй эн тэнцүү хөгжүүлэх зорилгоор жил бүр шилдэг бүтээлийг тодруулж, дэмжин ажилласаар ирсэн. Үүний үр дүнд жилээс жилд үзэсгэлэнгийн чанар илүүтэй сайжирч, залуу уран бүтээлчдийн хүсэн хүлээдэг томоохон үзэсгэлэн болж чадсан юм. Дүрслэх урлагийн мэргэжлийн сургуулийн оюутан, шинэхэн төгсөгч, уран бүтээлээ туурвиж буй 35 нас хүртэлх залуу уран бүтээлчдийг нэгтгэх, тэдний бүтээлийг нийтэд таниулах, нийгэмд урлагийн боловсролыг олгох зорилгоор үйл ажиллагаагаа явуулсаар ирсэн юм.
Монголын урчуудын эвлэлийн /МУЭ/ дэргэдэх Залуу уран бүтээлчдийн нэгдэл (ЗУБН)-ийн гол зорилго бол залуу уран бүтээлчдийг дэмжих, тэдний бүтээлийг дотоодод болон олон улсад сурталчлан таниулах, хамтарсан үзэсгэлэнг зохион байгуулах, олон нийтэд урлагийн боловсролыг түгээх юм. Мөн залуу уран бүтээлчдэд оюуны өмчийн талаарх мэдээ мэдээллийг мэргэжилтнүүдтэй хамтран олгох, А зэрэглэлийн биенналь, триенналь, фестиваль зэрэг олон улсын үйл ажиллагааны талаарх мэдээ мэдээллийг хүргэх, уран бүтээлчдийн CV, портфолио бэлтгэхэд зөвлөн туслах, төр засгийн болон бусад шагналд тодорхойлох зэрэгт МУЭ-тэй хамтран ажилладаг сайн дурын уран бүтээлчдийн нэгдэл юм.
“Алтан бийр” үзэсгэлэнгийн “Тэргүүн” байрт шалгарсан бүтээлийн эзэнд “Алтан бийр” цом, МУЭ-ийн уран бүтээлчдийн урланд уран бүтээлээ хийх нэг жилийн эрх, Арт галерейд уран бүтээлийн бие даасан үзэсгэлэнгээ гаргах эрх, “OGTAGON NFT Marketplace” дээр NFT гаргах эрхээр тус тус шагнан урамшуулах юм.
Мөн дэд байрт шалгарсан хоёр залуу уран бүтээлчийг Оросын Соёл шинжлэх ухааны төв “РНЦК”-д өөрийн бие даасан үзэсгэлэнгээ гаргах эрхээр шагнаж байна. Мөн ART of UB галерейн нэрэмжит шагнал, үзэсгэлэнгийн хүрээнд зохион байгуулах Таталбар зургийн уралдааны Тэргүүн байрт ОХУ-ын Эрхүү хотоор аялах эрх, дэд байрт Монументаль чимэглэлийн нийгэмлэгийн “M” Арт галерейд бие даасан үзэсгэлэн гаргах эрхээр шагнан урамшуулж байна.
Таталбар зургийн уралдаан, урлагийн лекц, хэлэлцүүлэг энэ сарын 9-нд 11:00 цагаас болно.
Эх сурвалж:www.polit.mn
