Х.ОЮУНБОЛД
Хурдан хүлэг морь сонирхдоггүй, нүд унагаан сэтгэлээ хужирладаггүй монгол хүн гэж байхгүй биз. Хүлэг морьд янцгааж, халуунд ялаархан, голын уснаа сэрүүцэж буй агшныг дүрсэлсэн ”Агтан дууль” хэмээх үзэсгэлэн энэ сарын 1-нд “Алтан хаан” галерейд нээлтээ хийжээ. Энэ үзэсгэлэнд зураач С.Базарваань гарын ур, сэтгэлээ шингээж зурсан 40 гаруй уран бүтээлээ тавьсан аж. Галерейн туслах менежер С.Лхамсүрэн зураачийг жирийн нэгэн малчны хүү, бага насаа бусад хүүхдийн адил хурдан морь унаж, эмнэг хангал адууг сургаж номхруулан, адуу маллаж өссөн болохоор хүүхэд насны дурсамжаа ийн цааснаа буулгаж зурсан зураач С.Базарваань ганц морь биш хос морьд зурдаг нь түүний уран бүтээлийн онцлог гэж байлаа. Түүний зурагнаас салхи исгэрүүлэн давхиж яваа морины хурд хүч мэдэгдэхээс гадна эрч хүч, хайр, эрх чөлөө мэдрэгдэх аж. Сайн ажиглавал импрессионист чиглэлээр уран бүтээлээ туурвидаг моринд дуртай зураачийн уран бүтээлд шаргал голдуу өнгө зонхилжээ.
Үзэсгэлэнд дэлгэн тавьсан хүлэг морины сэдэвтэй зургуудаас “Зуны ааг”, “Тайван”, “Намрын ой”, “Эгч дүүс”,”Тэнгэрийн хүлгүүд”, “Эртний сайхан” гэсэн зураг нүднээ тусаж анхаарал татна. Ялангуяа, “Цуутын цагаагч гүү”-ний домгийг санагдуулам хар ногоон өнгийг уусгаж унагатай гүү зурсныг туслах менежер С.Лхамсүрэн онцолсон нь энэ. Монгол ахуй, морийг нарийн дүрсэлсэн зураач С.Базарваань өмнө нь бие даасан, хамтарсан үзэсгэлэн гаргаж байсан нэгэн аж. Тухайлбал, ”Төвөргөөн”, “Монгол өнгө”, “Говийн өнгө”, “Сэтгэлийн уянга”, “Сэтгэлийн хүлэг”, “Намрын өнгө” гэсэн үзэсгэлэнгээ толилуулж байжээ. Үүнээс үзэхэд зураач С.Базарваань монгол мориндоо хайртай нэгэн болохыг уран бүтээл нь илтгэх ажээ. Дашрамд дурдахад “Агтан дууль” үзэсгэлэнд тавьсан зургийг хэмжээнээс нь хамаараад 400 мянгаас дөрвөн сая төгрөгөөр худалдаж байна. Уран зургийн үзэсгэлэнг ихэвчлэн 30-аас дээш насныхан үзэж сонирхдог. Мөн 17-20 насны залуус ирж сонирхдог хэмээн туслах менежер ярьж байлаа. Түүнээс гадна гадаадын жуулчид ч их ирдэг гэсэн юм. Хүүхэд насаа морь унан уралдаж өнгөрүүлсэн уран зураачийн үзэсгэлэн энэ сарын 15-нгы хүртэл гарах ажээ.
Эх сурвалж: www.polit.mn
